ប្រជាពលរដ្ឋជាច្រើនសហគមន៍នៅស្រុកមេមត់ ខេត្តត្បូងឃ្មុំ នាំគ្នាធ្វើយុទ្ធនាការទាមទារឲ្យរាជរដ្ឋាភិបាល និងតុលាការ ដោះលែងមន្ត្រីសិទ្ធិមនុស្ស ៤រូប និងមន្ត្រី គ.ជ.ប ១រូបដែលកំពុងជាប់ឃុំ។
យុទ្ធនាការនេះ ប្រជាសហគមន៍ធ្វើឡើងដោយអហិង្សាលើដីចម្ការរបស់ខ្លួន ដោយលើកបដាមានអត្ថន័យផ្សេងៗចាប់ផ្ដើមពីថ្ងៃទី១០ ឧសភា។ ចំណែកអភិបាលរងខេត្តត្បូងឃ្មុំ បញ្ជាក់ថា សកម្មភាពរបស់ប្រជាសហគមន៍ គឺជារឿងនយោបាយ ហើយអាជ្ញាធរនឹងចាត់វិធានការតាមផ្លូវច្បាប់ ប្រសិនបើពួកគេនៅតែបន្តធ្វើបែបនេះទៀត។
ប្រជាសហគមន៍ពីរឃុំ គឺឃុំជាំក្រវៀន និងឃុំទន្លូង លើកឡើងថា ការឃុំខ្លួនមន្ត្រីការពារសិទ្ធិមនុស្សសមាគមអាដហុក (ADHOC) និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ដោយតុលាការ គឺជារឿងអយុត្តិធម៌។ បញ្ហានេះ ពួកគេនាំគ្នាប្រមូលផ្តុំនៅតាមដីចម្ការរបស់ខ្លួនលើកបដាផ្សេងៗ ដើម្បីទាមទារឲ្យរាជរដ្ឋាភិបាល និងតុលាការ ដោះលែងអ្នកទាំងនោះឲ្យមានសេរីភាពដោយគ្មានលក្ខខណ្ឌ។
ប្រជាសហគមន៍មួយរូបនៅឃុំទន្លូង លោក យ៉ែម គង់ មានប្រសាសន៍ថា យុទ្ធនាការនេះ គឺចាប់ផ្ដើមកាលពីថ្ងៃទី១០ ឧសភា ដោយមានពលរដ្ឋចូលរួមប្រមាណ ១០០គ្រួសារ ដើម្បីទាមទារឲ្យដោះលែងមន្ត្រីសិទ្ធិមនុស្ស និងមន្ត្រី គ.ជ.ប ផង។ លោកបន្តថា ពលរដ្ឋនាំគ្នាធ្វើដោយការពេញចិត្ត ព្រោះមន្ត្រីសិទ្ធិមនុស្សទាំងនោះជាអ្នកជួយបណ្តុះបណ្តាលឲ្យប្រជាសហគមន៍យល់ដឹងពីសិទ្ធិមនុស្ស និងតម្លៃនៃជនជាតិដើមភាគតិច ជាដើម៖ « ជាសមាគមការពារសិទ្ធិមនុស្ស ការពារពលរដ្ឋស្លូតត្រង់ និងអ្នកក្រ។ ខ្ញុំសង្ឃឹមថា រាជរដ្ឋាភិបាលនឹងយល់ពីការរស់នៅរបស់ប្រជាសហគមន៍ជនបទមួយចំនួន »។
ពលរដ្ឋមានដើមកំណើតជាជនជាតិដើមភាគតិចស្ទៀង រូបនេះបញ្ជាក់ថា យុទ្ធនាការទាមទារឲ្យដោះលែងមន្ត្រីសិទ្ធិមនុស្ស នឹងធ្វើជាបន្តបន្ទាប់ ប្រសិនបើតុលាការនៅតែបន្តឃុំខ្លួនពួកគេទាំងនោះទៀត។
ស្រដៀងគ្នានេះ ប្រជាសហគមន៍មានវិវាទដីធ្លីនៅឃុំជាំក្រវៀន សុំមិនបញ្ចេញឈ្មោះលើកឡើងថា ការឃុំខ្លួនអ្នកទាំង ៥រូប គឺជារឿងអយុត្តិធម៌ ដ្បិតពួកគេមិនមានកំហុសឡើយ។ ម្យ៉ាងការឃុំខ្លួនមន្ត្រីសិទ្ធិមនុស្ស គឺធ្វើឲ្យប៉ះពាល់ដល់ប្រជាពលរដ្ឋទន់ខ្សោយដូចជាពួកគាត់៖ « ព្រោះគាត់ជាប់ឃុំឃាំង អ៊ីចឹងធ្វើឲ្យខាតផលប្រយោជន៍ទីមួយដល់ប្រជាពលរដ្ឋដែលមិនបានយល់ដឹង បានគាត់ហ្នឹងជាអ្នកដឹកនាំផ្លូវឲ្យពួកខ្ញុំយល់ដឹង »។
ទីតាំងដែលប្រជាសហគមន៍ជួបជុំគ្នានោះ គឺស្ថិតនៅតំបន់ទួលគ្រួស លើដីចម្ការរបស់ពួកគាត់ដែលធ្លាប់បង្កបង្កើនផលកន្លងមក ដោយពួកគាត់យល់ថា វាមិនបណ្ដាលឲ្យប៉ះពាល់សណ្ដាប់ធ្នាប់សាធារណៈ ឬកកស្ទះចរាចរណ៍ឡើយ។
មន្ត្រីសិទ្ធិមនុស្សសមាគមអាដហុក ៤រូប រួមមាន លោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុនី្ន ព្រមទាំងមន្ត្រី គ.ជ.ប ១រូប គឺលោក នី ចរិយា ត្រូវបានអង្គភាពប្រឆាំងអំពើពុករលួយ កោះហៅមកសាកសួរតាំងពីថ្ងៃទី២៧ មេសា និងឈានដល់ឃាត់ខ្លួនកាលពីយប់ថ្ងៃទី២៨ មេសា រួចបញ្ជូនមកតុលាការនៅល្ងាចថ្ងៃទី៣០ មេសា ពាក់ព័ន្ធនឹងអំពើពុករលួយ ជុំវិញការចោទប្រកាន់របស់អ្នកនាង ខុម ចាន់តារាទី ហៅ ស្រីមុំ។ រហូតដល់ថ្ងៃទី២ ឧសភា តុលាការសម្រេចបញ្ជូនពួកគេទៅឃុំខ្លួនបណ្ដោះអាសន្ន ក្រោមបទចោទសូកប៉ាន់សាក្សី និងសមគំនិតសូកប៉ាន់សាក្សី។
ទាក់ទងយុទ្ធនាការរបស់ប្រជាពលរដ្ឋពេលនេះ អភិបាលរងខេត្តត្បូងឃ្មុំ ទទួលបន្ទុកដីធ្លី លោក ហាក់ សុខមករា មានប្រសាសន៍នៅថ្ងៃទី១១ ឧសភា ថា សកម្មភាពពលរដ្ឋទាំងនោះជារឿងនយោបាយ។ លោកថែមទាំងព្រមានថា ប្រសិនបើពលរដ្ឋនៅតែបន្តធ្វើសកម្មភាពដែលខុសពីច្បាប់ ឬគោលការណ៍របស់ក្រសួងមហាផ្ទៃ បែបនេះទៀត ខាងអាជ្ញាធរខេត្តនឹងចាត់វិធានការតាមផ្លូវច្បាប់៖ « គាត់គួរឈរលើគោលនយោបាយរបស់គាត់ឲ្យបានច្បាស់លាស់ ថាគាត់ចង់បានអី ? ឃ្លានអី ? រមាស់កន្លែងណា ? មិនមែនរមាស់ខ្នង ហើយឲ្យគេអេះជើងទេ »។
ទោះបីជាយ៉ាងណាក៏ដោយ មន្ត្រីសម្របសម្រួលអង្គការការពារសិទ្ធិមនុស្សលីកាដូ (LICADHO) ខេត្តកំពង់ចាម លោក ប៊ូ វីរៈ យល់ថា សកម្មភាពទាមទារឲ្យដោះលែងមន្ត្រីសិទ្ធិមនុស្ស គឺពុំមែនជារឿងនយោបាយឡើយ ប៉ុន្តែជាការបង្ហាញភាពមិនពេញចិត្តទៅនឹងចំណាត់ការរបស់តុលាការ ដែលស្របទៅនឹងរដ្ឋធម្មនុញ្ញប្រទេសកម្ពុជា ហើយការសម្រេចបែបណានោះ គឺជាសិទ្ធិរបស់តុលាការ។ លោកថា ការទាមទារ ឬប្រមូលផ្តុំដោយសន្តិវិធី គប្បីអាជ្ញាធរចូលរួមការពារទៀតផង៖ « ព្រោះថាការចាប់សកម្មជនការពារសិទ្ធិមនុស្សអាដហុក នេះ គឺធ្វើឡើងមើលទៅដើម្បីឲ្យសង្គមស៊ីវិលហ្នឹងខ្លបខ្លាចទៅវិញ »។
លោក ប៊ូ វីរៈ បញ្ជាក់ថា ប្រសិនបើការបញ្ចេញមតិទាមទារដោយអហិង្សារបស់ប្រជាសហគមន៍ត្រូវបានរារាំង ឬត្រូវបានអាជ្ញាធរបង្ក្រាបនោះ គឺជារឿងខុសច្បាប់ ហើយជាការរំលោភទៅនឹងរដ្ឋធម្មនុញ្ញប្រទេសកម្ពុជា។ ម្យ៉ាង បង្ហាញឲ្យឃើញថា ពន្លកលទ្ធិប្រជាធិបតេយ្យកំពុងរីកលូតលាស់ ត្រូវរួញស្វិតទៅវិញ និងស្ដែងឲ្យឃើញថា សិទ្ធិសេរីភាពបញ្ចេញមតិដោយស្របច្បាប់ ត្រូវបានធ្លាក់ចុះថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។