មជ្ឈមណ្ឌលសិទ្ធិមនុស្សកម្ពុជា អំពាវនាវជាថ្មីទៀតឲ្យដោះលែងលោក ម៉ម សូណង់ដូ ជាបន្ទាន់ ដោយសំអាងថា ពុំមានភស្តុតាងណាមួយដែលអាចភ្ជាប់ប្រធានវិទ្យុសំបុកឃ្មុំរូបនេះ ទៅនឹងព្រឹត្តិការណ៍នៅភូមិប្រម៉ា ខេត្តក្រចេះ ឡើយ។
សេចក្ដីអំពាវនាវរបស់មជ្ឈមណ្ឌលសិទ្ធិមនុស្សកម្ពុជា ធ្វើឡើងតាមរយៈសេចក្ដីថ្លែងការណ៍ដែលចេញនៅថ្ងៃទី១២ ខែមីនា គឺ២ថ្ងៃនៅមុនពេលសាលាឧទ្ធរណ៍គ្រោងប្រកាសសាលដីកាលើនាយកវិទ្យុសំបុកឃ្មុំរូបនេះ។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ស្តីពីការអង្កេតដំណើរការសវនាការរយៈពេលពីរថ្ងៃនៅសាលាឧទ្ធរណ៍ លើលោក ម៉ម សូណង់ដូ បានលើកឡើងថា ព្រះរាជអាជ្ញាទម្លាក់បទចោទជាប្រភេទបទល្មើសឧក្រិដ្ឋ ដោយប្ដូរមកជាបទចោទថ្នាក់មជ្ឈិមវិញ គឺជាសញ្ញាវិជ្ជមានសម្រាប់រឿងក្ដីនេះ។ ប៉ុន្តែ ការចោទប្រកាន់ពីបទល្មើសថ្មីលើលោក ម៉ម សូណង់ដូ គឺពុំត្រឹមត្រូវ ដោយពុំបានផ្ដល់ឱកាសអោយមានការការពារខ្លួន ម្យ៉ាងទៀតសាលាឧទ្ធរណ៍បានខកខានក្នុងការកោះហៅសាក្សី ៧នាក់ ដែលជាសហជនជាប់ចោទជាមួយលោក ម៉ម សូណង់ដូ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា នៅពេលដែលព្រះរាជអាជ្ញាចាត់ទុកការចោទប្រកាន់នៅសាលាដំបូងមិនត្រឹមត្រូវ សាលាឧទ្ធរណ៍គួរទម្លាក់បទចោទទាំងអស់លើលោក ម៉ម សូណង់ដូ និងមិនគួរដាក់ទោសលោកទៅតាមបទចោទថ្មីណាមួយឡើយ។
កាលពីថ្ងៃទី៦ ខែមីនា ព្រះរាជអាជ្ញាអមសាលាឧទ្ធរណ៍ លោក ហ៊ាន រិទ្ធិ បានសម្រេចផ្លាស់ប្ដូរបទចោទលើលោក ម៉ម សូណង់ដូ ក្នុងនោះលោកត្រូវចោទប្រកាន់ពីបទមេគំនិតអោយមានបទល្មើសព្រៃឈើ តាមមាត្រា៩៧ ចំណុចទី៦ នៃច្បាប់ព្រៃឈើ និងជ្រៀតជ្រែកមុខងាររាជការសាធារណៈមានស្ថានទម្ងន់ទោស តាមមាត្រា៦០៩ និង៥០៤ នៃក្រមព្រហ្មទណ្ឌ។
នៅសាលាដំបូងរាជធានីភ្នំពេញ លោក ម៉ម សូណង់ដូ ត្រូវចោទពីបទផ្ដើមគំនិតញុះញង់អោយប្រជាពលរដ្ឋកាន់អាវុធប្រឆាំងរាជការ កុបកម្ម ជ្រៀតជ្រែកកិច្ចការសាធារណៈ តាមមាត្រា២៨ ៤៥៦ ៤៥៧ និង៤៦៤ នៃក្រមព្រហ្មទណ្ឌ ពាក់ព័ន្ធនឹងការបង្កើតចលនាតំបន់អបគមន៍ក្នុងភូមិប្រម៉ា ស្រុកឆ្លូង ខេត្តក្រចេះ។ តាមរយៈបទចោទទាំងនេះ លោកត្រូវកាត់អោយមានទោស ២០ឆ្នាំ និងពិន័យប្រាក់ ១០លានរៀល។
សហមេធាវីការពារក្ដីអោយលោក ម៉ម សូណង់ដូ គឺលោក សម សុខគង់ មានប្រសាសន៍ថា ប្រសិនបើចៅក្រមផ្ដន្ទាទោសកូនក្ដីរបស់លោកទៅតាមបទចោទថ្មីណាមួយ គឺជាការសម្រេចដែលមិនអាចទទួលយកបាន។
សេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ក៏បានសាទរចំពោះក្រុមប្រឹក្សាជំនុំជម្រះសាលាឧទ្ធរណ៍ ដែលបានទទួលយកទៅពិចារណានូវឯកសារវិភាគផ្លូវច្បាប់ ដែលបានស្នើឡើងដោយប្រធានមជ្ឈមណ្ឌលសិទ្ធិមនុស្សនេះ។ ឯកសារនោះ បានលើកឡើងពីបទពិសោធន៍នៃការអនុវត្តច្បាប់នៅតាមបណ្ដាប្រទេសជាច្រើនក្នុងពិភពលោក ពាក់ព័ន្ធនឹងសេរីភាពនៃការបញ្ចេញមតិ និងការចោទប្រកាន់អ្នកសារព័ត៌មាន ដូចប្រធានវិទ្យុសំបុកឃ្មុំ លោក ម៉ម សូណង់ដូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។