មជ្ឈមណ្ឌលសិទ្ធិមនុស្សកម្ពុជា (CCHR) សង្កេតឃើញថា សេរីភាពជាមូលដ្ឋានខាងការបញ្ចេញមតិ និងការប្រមូលផ្តុំនៅកម្ពុជា កំពុងប្រឈមនឹងការជ្រៀតជ្រែក និងរឹតត្បិតខ្លាំងឡើងៗ ពីសំណាក់អាជ្ញាធរមូលដ្ឋាន និងថ្នាក់ជាតិ។
របាយការណ៍ប្រចាំខែសីហា របស់អង្គការនេះចេញផ្សាយកាលពីថ្ងៃទី១ ខែកញ្ញា បង្ហាញពីទិដ្ឋភាពជាក់ស្ដែងមួយចំនួនដែលទាក់ទងនឹងការបង្ក្រាបលើសិទ្ធិបញ្ចេញមតិ និងការប្រមូលផ្តុំ ដូចជាបង្ក្រាបលើ "យុទ្ធនាការថ្ងៃចន្ទពណ៌ខ្មៅ" ដែលប្រជាពលរដ្ឋចាប់ផ្ដើមធ្វើតាំងពីខែឧសភា មកនោះ ត្រូវបានអាជ្ញាធរព្រមាន និងរារាំង ដោយចាត់វិធានការធ្ងន់ធ្ងរមួយចំនួន ដូចជាការដាក់ពង្រាយកម្លាំងសមត្ថកិច្ច និងបិទផ្លូវជាច្រើនកន្លែង រំខានដល់អ្នកចូលរួម ព្រមទាំងឃាត់ខ្លួនជនបរទេសដែលចូលរួមក្នុងយុទ្ធនាការនេះជាដើម។
ក្រសួងមហាផ្ទៃ បានហៅការចូលរួមក្នុង "យុទ្ធនាការថ្ងៃចន្ទពណ៌ខ្មៅ" គឺជាការញុះញង់ ហើយធ្វើឲ្យប៉ះពាល់សណ្ដាប់ធ្នាប់សាធារណៈ។
របាយការណ៍ដដែលបង្ហាញទៀតថា "យុទ្ធនាការថ្ងៃចន្ទពណ៌ខ្មៅ" លើកទី១៥ នៅថ្ងៃទី១៥ ខែសីហា បានឈានដល់ការចាប់ខ្លួនសកម្មជនបឹងកក់ ពីរនាក់ គឺអ្នកស្រី ទេព វន្នី និងអ្នកស្រី បូវ សោភា ដោយអាជ្ញាធរចោទពីបទញុះញង់ និងបញ្ជូនទៅតុលាការ ហើយតុលាការបានចោទពីបទប្រមាថ និងត្រូវបានកាត់ទោសឲ្យជាប់ពន្ធនាគាររយៈពេល ៦ថ្ងៃ។
មជ្ឈមណ្ឌលសិទ្ធិមនុស្សកម្ពុជា បានលើកពីទិដ្ឋភាពផ្សេងទៀត ដូចជាការរាំង គំរាមកំហែងដល់យុទ្ធនាការប្រមូលស្នាមមេដៃរបស់គណបក្សសង្គ្រោះជាតិ ប្រឆាំងនឹងការប៉ុនប៉ងចាប់ខ្លួនលោក កឹម សុខា ជាដើម។
អាស៊ីសេរី ពុំទាន់អាចសុំការឆ្លើយតបពីរដ្ឋាភិបាលបានទេ កាលពីថ្ងៃទី១ ខែកញ្ញា។
មជ្ឈមណ្ឌលសិទ្ធិមនុស្សកម្ពុជា ចាត់ទុកការជ្រៀតជ្រែករបស់អាជ្ញាធរលើសេរីភាពបញ្ចេញមតិ និងប្រមូលផ្ដុំនេះថាជាការបន្ទច់បង្អាក់មួយដល់គំនិត និងការពិភាក្សាផ្នែកនយោបាយ និងការធានាដល់ការចូលរួមយ៉ាងសកម្មរបស់សង្គមស៊ីវិល ក្នុងការជំរុញឲ្យដំណើរការនៃលទ្ធិប្រជាធិបតេយ្យរឹងមាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។