ការស្រាវជ្រាវរបស់មជ្ឈមណ្ឌលសិទ្ធិមនុស្សកម្ពុជា (CCHR) រកឃើញថា ការគោរពសិទ្ធិទទួលបានសវនាការជាសាធារណៈក្នុងតុលាការកម្ពុជា បានធ្លាក់ចុះនៅចុងឆ្នាំ២០១៦ និងដើមឆ្នាំ២០១៧។
ព្រឹត្តិបត្រព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ស្ដីពីការសង្កេតសិទ្ធិទទួលបានការជំនុំជម្រះដោយយុត្តិធម៌ ផ្សព្វផ្សាយនៅថ្ងៃទី២០ ខែកុម្ភៈ ឲ្យដឹងថា មជ្ឈមណ្ឌលសិទ្ធិមនុស្សកម្ពុជា បានបង្កើតគម្រោងសង្កេតការណ៍សវនាការព្រហ្មទណ្ឌក្នុងតុលាការកម្ពុជា និងវាយតម្លៃអំពីការអនុវត្តបទដ្ឋានជាតិ និងអន្តរជាតិនៃការជំនុំជម្រះដោយយុត្តិធម៌។ ចាប់តាំងពីខែមីនា ឆ្នាំ២០១៣ គម្រោងនេះបានសង្កេតការណ៍សវនាការនៅសាលាឧទ្ធរណ៍ក្នុងរាជធានីភ្នំពេញ។
មជ្ឈមណ្ឌលសិទ្ធិកម្ពុជា អះអាងថា អ្នកសង្កេតសវនាការ តាមដានសវនាការព្រហ្មទណ្ឌនៅសាលាឧទ្ធរណ៍ជាលក្ខណៈប្រព័ន្ធ និងប្រើប្រាស់តារាងសង្កេតការណ៍សវនាការដែលបានរៀបចំជាពិសេស ដើម្បីសង្កេតមើលថា តើតុលាការគោរពសិទ្ធិទទួលបានការជំនុំជម្រះដោយយុត្តិធម៌បានកម្រិតណា។
លទ្ធផលនៃការសង្កេតការណ៍បង្ហាញថា ពីខែវិច្ឆិកា ឆ្នាំ២០១៦ ដល់ខែមករា ឆ្នាំ២០១៧ ក្នុងចំណោមសវនាការចំនួន ១៣៣ ពុំឃើញមានករណីណាមួយត្រូវបានតុលាការបិទផ្សាយជូនដំណឹងអំពីសវនាការនៅក្រៅបន្ទប់សវនាការឡើយ។ លទ្ធផលនេះត្រូវបានមជ្ឈមណ្ឌលសិទ្ធិមនុស្សកម្ពុជា ចាត់ទុកថា ការគោរពសិទ្ធិទទួលបានសវនាការជាសាធារណៈបានធ្លាក់ចុះ។
ទោះជាយ៉ាងណា មជ្ឈមណ្ឌលសិទ្ធិមនុស្សកម្ពុជា សង្កេតឃើញថា ចាប់ពីខែមីនា ឆ្នាំ២០១៣ ដល់ខែមិថុនា ឆ្នាំ២០១៥ សិទ្ធិទទួលបានសវនាការជាសាធារណៈត្រូវបានគោរព ដោយមានបិទផ្សាយព័ត៌មានអំពីពេលវេលា និងទីតាំងសវនាការនីមួយៗ។ មជ្ឈមណ្ឌលសិទ្ធិមនុស្សកម្ពុជា ស្វាគមន៍ចំពោះការអនុវត្តល្អនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។