ក្លិបអ្នកកាសែតកម្ពុជា ថ្កោលទោសចំពោះមន្ត្រីកងរាជអាវុធហត្ថលើផ្ទៃប្រទេស ដែលបានប្រើហិង្សាវាយដំ និងចាប់ខ្លួនអ្នកសារព័ត៌មានក្នុងពេលអ្នកសារព័ត៌មាន បានចុះយកព័ត៌មានទាក់ទងនឹងការរកស៊ីឈើខុសច្បាប់។ អង្គការការពារអ្នកកាសែតមួយនេះ បានអំពាវនាវដល់ស្ថាប័នរដ្ឋាភិបាលពាក់ព័ន្ធ បើកការស៊ើបអង្កេត និងនាំយកជនបង្កហេតុ មកដោះស្រាយតាមផ្លូវច្បាប់។
ក្លិបអ្នកកាសែតកម្ពុជា សម្ដែងការព្រួយបារម្ភយ៉ាងខ្លាំងអំពីសុវត្ថិភាពអ្នកសារព័ត៌មាន និងអំពីសេរីភាពបញ្ចេញមតិនៅកម្ពុជា។ ការព្រួយបារម្ភនេះ កើតឡើងបន្ទាប់ពីស្ថាប័នការពារអ្នកកាសែតមួយនេះ បានកត់សម្គាល់ឃើញថា អ្នកសារព័ត៌មានមួយចំនួនបានប្រឈមមុខជាបន្តបន្ទាប់ជាមួយមន្ត្រីសមត្ថកិច្ចកងរាជអាវុធហត្ថលើផ្ទៃប្រទេស ខណៈដែលអ្នកសារព័ត៌មានទាំងនោះបានចុះយកព័ត៌មាន ជុំវិញសកម្មភាពឈ្មួញរកស៊ីឈើខុសច្បាប់ ហើយត្រូវបានសមត្ថកិច្ច និងឈ្មួញរកស៊ីឈើខុសច្បាប់ ចាប់ខ្លួន និងវាយដំយ៉ាងដំណំ។
កាលពីថ្ងៃទី១០ ទី១១ និងថ្ងៃទី១២ ខែមេសា ឆ្នាំ២០១៤ អ្នកសារព័ត៌មានចំនួន ៣នាក់ ត្រូវបានសមត្ថកិច្ចកងរាជអាវុធហត្ថ និងឈ្មួញរកស៊ីឈើខុសច្បាប់ធ្វើបាប ក្នុងនោះម្នាក់ត្រូវបានសមត្ថកិច្ចចាប់ខ្លួន និង ២នាក់ផ្សេងទៀត ត្រូវបានសមត្ថកិច្ច និងឈ្មួញរកស៊ីឈើខុសច្បាប់វាយដំលើរូបរាងកាយ និងដកយកម៉ាស៊ីនថត ក្នុងពេលពួកគេចុះយកព័ត៌មាន និងថតសកម្មភាពរកស៊ីឈើខុសច្បាប់នៅខេត្តព្រះវិហារ ខេត្តពោធិ៍សាត់ និងខេត្តកំពង់ចាម ក្នុងនោះក៏មានការចូលរួមពីមេបញ្ជាការរងកងរាជអាវុធហត្ថខេត្តព្រះវិហារ លោក ឡាយ សុភាព ផងដែរ។
ប្រធានក្លិបអ្នកកាសែតកម្ពុជា លោក ប៉ែន សមិទ្ធិ បានមានប្រសាសន៍នៅថ្ងៃទី១៩ មេសា ថា ជាទូទៅសកម្មភាពចាប់ខ្លួន និងវាយដំទៅលើអ្នកសារព័ត៌មាន វានឹងជះឥទ្ធិពលអាក្រក់ ឬក៏ធ្វើឲ្យប៉ះពាល់ដោយផ្ទាល់ទៅលើអារម្មណ៍ និងកិច្ចការរបស់អ្នកសារព័ត៌មាន។ ប៉ុន្តែ លោកយល់ថា បញ្ហាទាំងអស់នេះ គឺបង្កឡើងដោយបុគ្គលពាក់ព័ន្ធនឹងការរកស៊ីឈើខុសច្បាប់ វាមិនមែនជាការបង្ក្រាបធ្វើឡើងទូទៅដោយសមត្ថកិច្ច ដើម្បីបំភិតបំភ័យអ្នកសារព័ត៌មានឡើយ៖ «ប្រតិកម្មទាំងឡាយដែលយើងពិនិត្យមើលទៅ វាជាប្រតិកម្មភ្លាមៗ ដូច្នេះវាមិនមែនជាគម្រោងថាត្រូវធ្វើអ៊ីចឹង ដើម្បីកុំឲ្យពួកលើកក្រោយ អ្នកកាសែតក្រោយៗហ៊ានតទៅទៀតអី ខ្ញុំមិនគិតអ៊ីចឹងទេ ខ្ញុំគិតថា វាជាប្រតិកម្មភ្លាមរបស់មនុស្សដែលគាត់ធ្វើកិច្ច ដែលមិនស្របច្បាប់»។
ទោះយ៉ាងណាក្តី ក្លិបអ្នកកាសែតកម្ពុជា ចាត់ទុកសកម្មភាពចាប់ខ្លួន និងវាយដំលើអ្នកសារព័ត៌មាន ជាការគំរាមកំហែងយ៉ាងធ្ងន់ធ្ងរដល់ស្មារតី និងសុវត្ថិភាពអ្នកសារព័ត៌មាន និងជាចេតនារារាំងដល់ការអនុវត្តសិទ្ធិសេរីភាពនៃការបញ្ចេញមតិ ព្រមទាំងបន្ទច់បង្អាក់ដោយផ្ទាល់ដល់ដំណើរការនៃការអនុវត្តលទ្ធិប្រជាធិបតេយ្យនៅកម្ពុជា។ អង្គការការពារ និងបម្រើផលប្រយោជន៍អ្នកកាសែតមួយនេះ បានអំពាវនាវឲ្យស្ថាប័នអនុវត្តច្បាប់នៅកម្ពុជា ធ្វើការស៊ើបអង្កេត និងវែកមុខជនបង្កហេតុ ដើម្បីនាំយកពួកគេមកដោះស្រាយតាមផ្លូវច្បាប់ និងដើម្បីផ្តល់យុត្តិធម៌ដល់អ្នកសារព័ត៌មានរងគ្រោះ។
ទាក់ទងបញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ បានមានប្រសាសន៍ថា រដ្ឋាភិបាលទទួលយកការអំពាវនាវនេះ៖ «សូមទទួលនូវក្តីអំពាវនាវនេះ បន្ថែមទៅលើការស៊ើបអង្កេតកន្លងមករបស់សាក្សី ដើម្បីយើងធ្វើកិច្ចការយ៉ាងណាឲ្យបានស្វែងរកជនល្មើសដែលខុសច្បាប់ហ្នឹងទៅតុលាការ ព្រោះសមត្ថកិច្ចមិនដែលគិតថា អ្នកណាជាខាងណា អ្នកណាជាខាងណីទេ ឲ្យតែបទល្មើស យើងគិតទៅតាមច្បាប់នោះឯង»។
ក្លិបអ្នកកាសែតកម្ពុជា អះអាងថា នឹងបន្តតាមដានដោយយកចិត្តទុកដាក់ចំពោះករណីនេះ ដើម្បីការពារសេរីភាពសារព័ត៌មាន និងស្វែងរកយុត្តិធម៌ពិតប្រាកដឲ្យដល់ជនរងគ្រោះ។
អង្គការការពារសេរីភាពសារព័ត៌មានឈ្មោះ ហ្វ្រីដឹម ហៅស៍ (Freedom House) កាលពីឆ្នាំ២០១៣ បានដាក់ចំណាត់ថ្នាក់ខាងសេរីភាពសារព័ត៌មាននៅកម្ពុជា ស្ថិតក្នុងប្រភេទប្រទេសមានពណ៌ក្រហម មានន័យថា ជាប្រទេសដែលគ្មានសេរីភាពសារព័ត៌មានទាំងស្រុង។ នៅកម្ពុជា ក្នុងរយៈពេល ២០ឆ្នាំចុងក្រោយនេះ មានអ្នកសារព័ត៌មានប្រមាណ ១០នាក់ហើយ ត្រូវបានគេសម្លាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។