អង្គការសិទ្ធិមនុស្សបានរកឃើញថា ការរំលោភបំពានលើសិទ្ធិជនស៊ីវិលនៅតាមតំបន់ព្រំដែនខ្មែរ-ថៃ ពីកងកម្លាំងប្រដាប់អាវុធមួយចំនួន បានកើតមានជាបន្តបន្ទាប់នៅឡើយ។
ប្រភពពីប្រជាពលរដ្ឋនៅឃុំអំពិល ស្រុកបន្ទាយអំពិល បានឱ្យដឹងថា កូនប្រុសម្នាក់ជាទាហានប្រចាំនៅព្រំដែនខ្មែរ-ថៃ បានយកអាវុធបាញ់រះជាច្រើនគ្រាប់ នៅពេលដែលមានជម្លោះជាមួយម្តាយខ្លួនឯង កាលពីល្ងាចថ្ងៃទី១០ ខែឧសភា កន្លងទៅ។
បុរសអ្នកភូមិជប់គគីរខាងកើតម្នាក់ ដែលសុំមិនបញ្ចេញឈ្មោះ បានមានប្រសាសន៍កាលពីព្រឹកថ្ងៃអាទិត្យ ទី១២ ខែឧសភា ថា ស្ត្រីចំណាស់ម្នាក់ឈ្មោះ ខៀវ យ៉ុម អាយុជាង ៥០ឆ្នាំ ជាអ្នកភូមិជាមួយគ្នា ត្រូវកូនប្រុសបង្កើតឈ្មោះ យ៉ង់ សំអាត បាញ់កាំភ្លើងរះជាច្រើនគ្រាប់គំរាមរូបគាត់ ដោយសារតែកំហឹង។
បុរសដដែលបញ្ជាក់ថា មុនពេលកើតហេតុគេដឹងថា អ្នកស្រី ខៀវ យ៉ុម បានឈ្លោះប្រកែកនិងកូនប្រសាស្រីបណ្ដាលឱ្យកូនប្រសានោះចុះចោលផ្ទះ។ បន្ទាប់មកកូនប្រុសបង្កើតមានការខឹងសម្បាជាមួយម្ដាយពីរឿងធ្វើឱ្យប្រពន្ធចុះចេញ ទើបទៅផឹកស្រាស្រវឹងហើយរករឿងឈ្លោះជាមួយម្ដាយ រហូតដល់បាញ់កាំភ្លើងជាច្រើនគ្រាប់។ ក៏ប៉ុន្តែការបាញ់នោះមិនបណ្ដាលឱ្យស្ត្រីជាម្ដាយ ឬក៏អ្នកជិតខាងណាម្នាក់បានរងរបួសទេ។
អ្នកស្រី ខៀវ យ៉ុម៖ «ប្អូនថ្លៃហ្នឹងថាបងអើយប៉ុណ្ណោះបានហើយ មិនបាច់និយាយទេ ខ្ញុំដឹងពីបញ្ហាបងឯងហើយ។ ថាប៉ុណ្ណោះវាបាញ់ពីក្នុងមក បាញ់ទម្លុះជញ្ជាំងវាមក ៤-១០គ្រាប់ដែរ។ ម្ដាយនោះឮសូរកូនបាញ់កញ្ឆក់ម៉ូតូបានបញ្ឆេះជិះរត់ទៅលិចផុតទៅ។ អានោះវាបាញ់រួច វារត់ចេញពីផ្ទះទៅពួនក្នុងព្រៃ»។
អ្នកភូមិជប់គគីរខាងកើត បានឱ្យដឹងថា ឈ្មោះ យ៉ង់ សំអាត ដែលប្រើអាវុធបាញ់ដោយខឹងម្ដាយឯងនោះ គឺជាទាហាននៃតំបន់ប្រតិបត្តិការសឹករងក្នុងស្រុកបន្ទាយអំពិល។
អង្គការសិទ្ធិមនុស្សក្រៅរដ្ឋាភិបាលប្រចាំខេត្តឧត្តរមានជ័យ បានឱ្យដឹងថា បច្ចុប្បន្នគេនៅតែមានកង្វល់លើបញ្ហាទាហានខ្លះ ប្រើអាវុធគំរាមកំហែងប្រជាពលរដ្ឋនៅតាមតំបន់ព្រំដែនខ្មែរ-ថៃ នៃខេត្តនេះ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន បានមានប្រសាសន៍ថា លោកនឹងចុះស្រាវជ្រាវករណីកូនប្រើអាវុធបាញ់សំដៅម្ដាយឯងនេះនៅពេលឆាប់ៗ។ បន្ថែមលើការអង្កេតអង្គការអាដហុក ក៏បានប្រាប់រឿងទៅមន្ត្រីតុលាការ ដើម្បីឱ្យជួយចាត់វិធានការផ្លូវច្បាប់ដែរ។
លោក ស្រី ណារ៉េន៖ «កន្លងមកហ្នឹងយើងធ្លាប់បាននិយាយទាក់ទងនឹងការប្រើប្រាស់អាវុធ បាញ់គំរាមទៅលើប្រជាពលរដ្ឋ។ យើងស្នើឱ្យគ្រប់មេបញ្ជាការតាមអង្គភាពខាងទាហានហ្នឹង សុំឱ្យមានការរឹតបន្តឹង ពីព្រោះយើងមានការព្រួយបារម្ភ បើសិនជាបណ្ដែតបណ្ដោយឱ្យក្រុមយោធិនកាន់អាវុធសេរីអ៊ីចឹង គឺគាត់នៅតែដើរបាញ់គំរាមកំហែងលើប្រជាពលរដ្ឋ អ៊ីចឹងវាជារឿងមួយដែលខុសច្បាប់ ហើយមួយទៀតឱ្យគាត់ហ្នឹងមានភាពថ្លៃថ្នូរផង បើសិនជាគាត់ជាទាហាន ហើយនៅតែបាញ់តាមអំពើចិត្ត អាហ្នឹងវាអត់ត្រឹមត្រូវទេ»។
ទោះយ៉ាងណា វិទ្យុអាស៊ីសេរី មិនអាចទាក់ទងលោកឧត្ដមសេនីយ៍ ម៉ុក សុវណ្ណ ដែលជាមេបញ្ជាការយោធាខេត្តឧត្តរមានជ័យ ដើម្បីសុំការអធិប្បាយជុំវិញការពង្រឹងវិន័យយោធាដែលនៅក្រោមការគ្រប់គ្រងរបស់លោកនោះបានថា យ៉ាងណានៅឡើយ។ ជាច្រើនលើកមកហើយកម្លាំងប្រដាប់អាវុធដែលបានប្រើហិង្សាទៅលើជនស៊ីវិលនេះ គេមិនដែលឃើញមានការដាក់វិន័យណាមួយទៅលើអ្នកទាំងនោះទេ។
អង្គការអាដហុក ឱ្យដឹងថា ចាប់ពីអំឡុងខែមេសា រហូតមកដល់ពេលនេះ កម្លាំងប្រដាប់អាវុធបានប្រើហិង្សាលើជនស៊ីវិល ក្នុងខេត្តឧត្តរមានជ័យ ចំនួន ៤លើកហើយ។
ក្រុមអ្នកភូមិជប់គគីរខាងកើត ខ្លះ បានឱ្យដឹងថា នៅតំបន់ពួកគេ ពេលដែលមានបុណ្យ និងរាំកម្សាន្តម្ដងៗ គេឃើញទាហានខ្លះតែងស្ពាយកាំភ្លើងច្រងេងច្រងាងចូលមក។ ពួកគេមិនចង់ឃើញទាហាន យកអាវុធមកជាប់ខ្លួន នៅពេលមិនចាំបាច់ ដូចជាការចូលរាំលេងជាមួយអ្នកភូមិនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។