ពន្ធនាគារកាន់តែចង្អៀតណែនក្រោយពីអាជ្ញាធរអនុវត្តយុទ្ធនាការបង្ក្រាបគ្រឿងញៀន
2017.01.18
ស្ថានភាពអ្នកទោសរស់នៅក្នុងពន្ធនាគារបណ្ដោះអាសន្ន ដែលជាអតីតរោងកុនខេត្តប៉ៃលិន កាលពីថ្ងៃ២៥ ខែសីហា ឆ្នាំ២០១១។
Photo: RFA
មន្ត្រីពន្ធនាគារអះអាងថា ចំនួនអ្នកជាប់ឃុំនៅពន្ធនាគារបានកើនឡើងយ៉ាងគំហុក បន្ទាប់ពីរដ្ឋាភិបាលអនុវត្តយុទ្ធនាការប្រយុទ្ធប្រឆាំងគ្រឿងញៀន។ បញ្ហានេះ បានបង្កជាក្តីព្រួយបារម្ភទាក់ទងនឹងការខ្វះខាតបន្ទប់ឃុំឃាំង អនាម័យ ម្ហូបអាហារ និងសុវត្ថិភាពរបស់អ្នកជាប់ឃុំ។ មន្ត្រីអង្គការសង្គមស៊ីវិល ស្នើឲ្យរដ្ឋាភិបាលដោះស្រាយបញ្ហានេះជាបន្ទាន់ ដើម្បីធានាការគោរពសិទ្ធិជនជាប់ឃុំ។
អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា បញ្ជាក់ប្រាប់អាស៊ីសេរី នៅថ្ងៃទី១៧ មករា ថា ខាងពន្ធនាគារកំពុងជួបប្រទះបញ្ហាចង្អៀតណែននៃអ្នកជាប់ឃុំ ក្រោយពេលសមត្ថកិច្ចបានចាប់ខ្លួនអ្នកពាក់ព័ន្ធគ្រឿងញៀន បញ្ជូនមកកាន់ពន្ធនាគារកាន់តែច្រើន។
លោកបន្តថា បញ្ហានេះបានបង្កជារឿងស្មុគស្មាញចំពោះការគ្រប់គ្រងពន្ធនាគារ៖ «ចំពោះដំណោះស្រាយបឋម និងជាបន្ទាន់នោះ គឺយើងមើលលទ្ធភាពពន្ធនាគារដទៃដែលមានលទ្ធភាពអាចទទួលយកការផ្ទេរអ្នកដែលនៅកន្លែងចង្អៀតខ្លាំង ទៅកន្លែងដែលមិនសូវចង្អៀត»។
លោកបញ្ជាក់ថា រដ្ឋាភិបាលកំពុងសាងសង់អគារឃុំឃាំងបន្ថែមនៅតាមមណ្ឌលកែប្រែតាមបណ្ដាខេត្តនៅទូទាំងប្រទេស ដើម្បីដោះស្រាយបញ្ហាចង្អៀតណែននេះ។
រដ្ឋាភិបាលបានអនុវត្តយុទ្ធនាការប្រយុទ្ធប្រឆាំងគ្រឿងញៀនសម្រាប់រយៈពេល ៦ខែ ដោយចាប់ផ្ដើមពីខែមករា ដល់ខែមិថុនា ខាងមុខ។ គ្រាន់តែរយៈពេល ២សប្ដាហ៍នៃការដាក់ចេញនូវវិធានការក្តៅនេះ សមត្ថកិច្ចបានបង្ក្រាបបទល្មើសគ្រឿងញៀនបានចំនួនជាង ៥០០ករណី និងឃាត់ខ្លួនជនសង្ស័យបានជាង ១ពាន់នាក់។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ព្រួយបារម្ភជុំវិញបញ្ហានេះ។ លោកថា ការចង្អៀតណែននៃមន្ទីរឃុំឃាំង នឹងបង្កជាហានិភ័យជាច្រើន ដូចជាការរំលោភសិទ្ធិ អំពើហិង្សា និងសុវត្ថិភាពអ្នកជាប់ឃុំជាដើម ដែលទាមទារឲ្យរដ្ឋាភិបាលត្រូវគិតគូរ និងដោះស្រាយបញ្ហានេះជាបន្ទាន់៖ «វាប៉ះពាល់តាំងពីការគេង អនាម័យ របបហូបចុក បរិស្ថានផ្សេងៗក្នុងពន្ធនាគារ ហើយជាពិសេសគឺជំងឺឆ្លង។ ទីពីរ យើងបារម្ភពីសុវត្ថិភាព និងសន្តិសុខនៅក្នុងពន្ធនាគារ។ បញ្ហាកើតឡើងរវាងអ្នកទោស និងអ្នកទោស កាលណាចង្អៀតណែនពេកទៅ វាធ្វើឲ្យថប់អារម្មណ៍។ អ៊ីចឹងវាអាចបង្កជាជម្លោះផ្សេងៗ មានការវាយតប់គ្នាជាដើម។ បញ្ហាទីបី វាអាចមានហានិភ័យកើតឡើង កាលណាច្រើនពេក ពន្ធនាគារនីមួយៗមានមន្ត្រីតិច មិនអាចគ្រប់បាន វាអាចមានឧបទ្ទវហេតុផ្សេងៗក្នុងនោះ»។
តួលេខអ្នកកំពុងជាប់ឃុំឃាំងក្នុងពន្ធនាគារនៅទូទាំងប្រទេស មានប្រហែល ២ម៉ឺន ២ពាន់នាក់ ក្នុងនោះជាង ៤០ភាគរយ គឺជាអ្នកជាប់ឃុំពាក់ព័ន្ធនឹងបទល្មើសគ្រឿងញៀន។
ក្រៅពីបញ្ហាចង្អៀតណែនក្នុងពន្ធនាគារនេះ មណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀន ក៏អាចនឹងមានបញ្ហាប្រឈមដូចគ្នានេះដែរ។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បញ្ជាក់ថា ចំនួនមណ្ឌលស្ដារនីតិសម្បទានៅទូទាំងប្រទេស នឹងមិនគ្រប់គ្រាន់ឡើយ បើសិនជាចំនួនអ្នកប្រើប្រាស់គ្រឿងញៀនដែលត្រូវបានឃាត់ខ្លួនមានការកើនឡើងច្រើនបែបនេះ៖ «យន្តការក្នុងការស្ដារនីតិសម្បទា យើងមាន ក៏ប៉ុន្តែពាក់ព័ន្ធទៅនឹងទីកន្លែងសម្រាប់ផ្តល់សេវាស្ដារនីតិសម្បទាហ្នឹង នៅពេលខាងមុខវាអាចមានការចាល់ បើសិនជាចំនួនអ្នកប្រើប្រាស់ (គ្រឿងញៀន) ត្រូវបានឃាត់ខ្លួនមានចំនួនច្រើន»។
មណ្ឌលព្យាបាល និងស្ដារនីតិសម្បទាអ្នកញៀនគ្រឿងញៀននៅទូទាំងប្រទេសមានចំនួន១០ ក្នុងនោះ ៧ គ្រប់គ្រងដោយរដ្ឋ និង ៣ ទៀត គ្រប់គ្រងដោយឯកជន។ ក្រៅពីនេះ មានមណ្ឌលសុខភាព និងមន្ទីរបង្អែកចំនួន ២៦៨កន្លែងនៅទូទាំងប្រទេស ដែលទទួលព្យាបាលអ្នកញៀនគ្រឿងញៀន។
រដ្ឋាភិបាលគ្រោងសាងសង់មជ្ឈមណ្ឌលបណ្តុះបណ្តាលវិជ្ជាជីវៈថ្នាក់ជាតិមួយកន្លែងនៅលើផ្ទៃដីទំហំ ២០ហិកតារនៅខេត្តព្រះសីហនុ ដើម្បីផ្តល់ការព្យាបាល និងបណ្តុះបណ្តាលវិជ្ជាជីវៈសម្រាប់អ្នកញៀនគ្រឿងញៀន ប៉ុន្តែដោយសារកង្វះខាតថវិកា គម្រោងនេះមិនទាន់ត្រូវបានអនុវត្តនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
