ជនពិការកម្ពុជា ទាំងមនុស្សចាស់ និងកុមារ ប្រមាណ ២០០នាក់ បានប្រារព្ធទិវាជនពិការ ៣ធ្នូ ជាមួយក្រសួងកិច្ចការនារី នៅថ្ងៃទី២៨ ខែវិច្ឆិកា។ ពួកគេបានស្នើឲ្យមានការគិតគូរដល់ជនពិការ ទាំងមុខរបរ ការងារ និងបច្ចេកវិទ្យា ដើម្បីឲ្យពួកគេអាចរស់នៅក្នុងជីវភាពសមរម្យ និងដើរទាន់ការអភិវឌ្ឍនៅក្នុងសង្គមនាពេលបច្ចុប្បន្ន។
តំណាងជនពិការកម្ពុជា បានស្នើឲ្យរដ្ឋាភិបាលបន្តជំរុញឲ្យមន្ត្រីស្ថាប័នរដ្ឋ និងឯកជន បញ្ឈប់ការរើសអើងលើជនពិការ និងផ្ដល់សិទ្ធិស្មើគ្នាដូចពលរដ្ឋដទៃទៀតនៅចំពោះមុខច្បាប់។
នាយកប្រតិបត្តិសមាគមតន្ត្រីសំនៀងជនពិការ លោក ចាប តូ ដែលជាជនពិការភ្នែកមួយរូប មានប្រសាសន៍ថា ជនពិការបច្ចុប្បន្ននៅតែទទួលរងនូវការរើសអើងនៅក្នុងសង្គម តាមរូបភាពផ្សេងៗ ដូចជា ការមិនផ្ដល់តម្លៃដល់ជនពិការ ការមើលងាយ ជេរប្រមាថ ការកេងប្រវ័ញ្ចលើជនពិការ។ រីឯក្រសួងស្ថាប័នរដ្ឋ កង្វះកិច្ចសហការដល់ជនពិការ និងការផ្ដល់សេវាសាធារណៈដល់ជនពិការ មិនសម្រួលដល់ពួកគេ។ ចំណែកក្នុងវិស័យឯកជន ក៏នៅតែមានការរើសអើងមិនផ្ដល់ការងារដល់ជនពិការឡើយ បើទោះជាពួកគាត់មានសមត្ថភាពដូចមនុស្សធម្មតាក៏ដោយ។ បញ្ហានេះ បានធ្វើឲ្យប៉ះពាល់ដល់ផ្លូវចិត្ត និងសេដ្ឋកិច្ចរបស់ជនពិការ ដែលមិនអាចឲ្យពួកគេរស់នៅក្នុងសង្គមមួយមានជីវភាពសមរម្យ ថ្លៃថ្នូរ និងមានភាពស្មើគ្នាដូចមនុស្សដទៃបាន។
លោកត្អូញថា អាជ្ញាធរដែនដី នៅពេលពួកគាត់ទៅសុំច្បាប់ប្រគំតន្ត្រី អភិបាលខេត្តមិនជាបញ្ហាអ្វីទេ ប៉ុន្តែសំខាន់ គឺមន្ត្រីថ្នាក់ក្រោមនៅស្ទើរតែ ២៥រាជធានីខេត្ត ច្រើនមើលងាយជនពិការ។
ការថ្លែងនេះ នៅក្នុងពិធីអបអរសាទរទិវាជនពិការជាតិលើកទី១៦ និងខួបលើកទី៣២ ស្ដីពីសិទ្ធិជនពិការអន្តរជាតិ ក្រោមប្រធានបទ ផ្ដល់លទ្ធភាពអាចប្រើប្រាស់បាន រួមបញ្ចូលទាំងមុខរបរ ការងារ និងបច្ចេកវិទ្យា ដើម្បីការអភិវឌ្ឍប្រកបដោយនិរន្តរភាព រៀបចំដោយនៅក្រសួងកិច្ចការនារី ថ្ងៃទី២៨ វិច្ឆិកា។
ឆ្លើយតបបញ្ហានេះ អគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា ទទួលស្គាល់ថា ជនពិការនៅតែទទួលរងនូវការរើសអើងពិតប្រាកដមែន ដោយសារតែការផ្សព្វផ្សាយច្បាប់ស្ដីពីកិច្ចការពារ និងលើកកម្ពស់សិទ្ធិជនពិការនៅមានកម្រិតនៅឡើយ ដែលទាមទារឲ្យបន្តអប់រំ និងផ្សព្វផ្សាយដល់មជ្ឈដ្ឋាននានា។
លោកបន្តថា រដ្ឋាភិបាលបានចេញផែនការយុទ្ធសាស្ត្រជាតិ ស្ដីពីពិការភាពឆ្នាំ២០១៤-២០១៨ ដើម្បីបញ្ជ្រាបឲ្យក្រសួងស្ថាប័នទាំងអស់ យកចិត្តទុកដាក់អនុវត្ត និងបញ្ចូលកម្មវិធី ដើម្បីឲ្យជនពិការមានសិទ្ធិពេញលេញ។
លោក ឯម ច័ន្ទមករា បន្តទៀតថា ក្រុមការងារនៃប្រឹក្សាសកម្មភាពជនពិការ បានផលិតវីដេអូអប់រំ និងកិច្ចពិភាក្សានានា ដើម្បីចាក់ផ្សាយឲ្យបានច្រើននៅតាមស្ថានីយទូរទស្សន៍ នៅក្នុងឱកាសប្រារព្ធទិវាជនពិការឆ្នាំនេះ ដើម្បីបង្ហាញពីសមត្ថភាពរបស់ជនពិការ។
ជំរឿនរបស់ក្រសួងផែនការ ឆ្នាំ២០១៣ បានឲ្យដឹងថា ក្នុងចំណោមប្រជាជនជាង ១៤លាននាក់ មានជនពិការជាង ៣០ម៉ឺននាក់។ ដោយឡែកការទទួលជនពិការចូលបម្រើការងារនៅតាមក្រសួងស្ថាប័នរដ្ឋចំនួន៤០ គិតដល់ពាក់កណ្ដាលឆ្នាំ២០១៤ មានជិត ២ពាន់នាក់។ យ៉ាងណា ចំនួននេះ អង្គការធ្វើការលើកកម្ពស់សិទ្ធិជនពិការរិះគន់ថា ជាចំនួនមួយមិនទាន់ឆ្លើយតបតម្រូវការរបស់ជនពិការនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។