ក្រុមគ្រួសារ និងភរិយាអ្នកកាសែតមាគ៌ាកម្ពុជា ឈ្មោះ សួន ចាន់ នៅឃុំពាមឆ្កោក ស្រុកជលគីរី ខេត្តកំពង់ឆ្នាំង ដែលត្រូវបានគេព្រួតគ្នាវាយសម្លាប់ កាលពីចុងខែមករា ឆ្នាំ២០១៤ កំពុងបារម្ភអំពីសុវត្ថិភាពផ្ទាល់ខ្លួន។ ក្រុមជនសង្ស័យក្នុងរឿងឃាតកម្មនេះ បានបង្ហាញមុខជាសាធារណៈ ប៉ុន្តែខាងសមត្ថកិច្ចមិនទាន់ឃើញមានវិធានការអ្វីទៅលើជនសង្ស័យទាំងនោះនៅឡើយ ដែលជាហេតុធ្វើឲ្យក្រុមគ្រួសារជនរងគ្រោះកាន់តែមានភាពភ័យខ្លាច។
ក្រុមគ្រួសារជនរងគ្រោះ ឲ្យដឹងនៅថ្ងៃទី២០ ខែមេសា ថា ជនសង្ស័យថាបានវាយសម្លាប់ លោក សួន ចាន់ បានបង្ហាញមុខតាំងពីថ្ងៃទី១ នៃពិធីបុណ្យចូលឆ្នាំខ្មែរ និងកំពុងរស់នៅយ៉ាងមានសេរីភាពនៅក្នុងភូមិ បន្ទាប់ពីរត់គេចខ្លួនមួយរយៈមក។
ភរិយាលោក សួន ចាន់ បានដាក់ពាក្យប្ដឹងករណីនេះទៅសាលាដំបូងខេត្តកំពង់ឆ្នាំង ដើម្បីឲ្យមានការផ្ដន្ទាទោសជនល្មើសទៅតាមផ្លូវច្បាប់ និងទារសំណងជាទឹកប្រាក់ចំនួន ១ម៉ឺន ៥ពាន់ដុល្លារ (១៥.០០០) ជនសង្ស័យទាំង ៤នាក់ មានទី១ឈ្មោះ យឿន នុន ទី២ យឿន ណាក់ ទី៣ នាង រ៉ា និងទី៤ ឈ្មោះ សាំង សេងអៀង។
ភរិយាជនរងគ្រោះអ្នកស្រី ទៀង ថាវ មានប្រសាសន៍ថា គ្រួសារជនសង្ស័យបាន បង្ហើរពាក្យសម្ដីតាមរយៈអ្នករស់នៅជិតខាងមកថា គេសុខចិត្តបង់លុយឲ្យប៉ូលិស និងមន្ត្រីតុលាការ ប៉ុន្តែគេនឹងមិនបង់លុយឲ្យគ្រួសារអ្នកស្រីតាមការទាមទារនោះទេ។
អ្នកស្រីមានការតក់ស្លុតយ៉ាងខ្លាំង បន្ទាប់ពីឃើញជនសង្ស័យមានសេរីភាព និងរងនូវការតិះដៀលពីក្រុមគ្រួសារជនសង្ស័យទាំងនោះជាបន្តបន្ទាប់៖ «ខ្ញុំវារន្ធត់ក្នុងខ្លួនអស់ហើយបងអ្ហើយ! យប់ឡើងដេកមិនពេញភ្នែកខ្ញុំខ្លាចគេណាស់។ កូនចូលឆ្នាំ អាធំហ្នឹងអត់ឲ្យដើរទេ បង្គាំងទុកនៅផ្ទះខ្លាចគេមានការគុំកួនអីតទៅទៀត ព្រោះគេសម្លាប់ប្ដីខ្ញុំនេះវាមិនដឹងមុខមានមូលហេតុអីសោះ។ មិនមែនត្រឹមថាជនសង្ស័យទេ គឺជនដៃដល់ពិតប្រាកដដែលវាយលោកពុកដួលកណ្ដាលថ្នល់ ហើយកូនខ្ញុំរត់ទៅគ្របលោកពុកវាយទាំងកូនឈ្លេចកទៀត ផ្ទាល់ដៃ បានខ្ញុំខ្លាចហ្នឹង»។
ឆ្លើយតបបញ្ហានេះស្នងការរងទទួលបន្ទុកបទល្មើសព្រហ្មទណ្ឌ នៃស្នងការដ្ឋាននគរបាលខេត្តកំពង់ឆ្នាំង លោក ប្រាក់ វុទ្ធី មានប្រសាសន៍ថា ខាងសមត្ថកិច្ចមិនអាចទៅចាប់ ឬនាំខ្លួនជនសង្ស័យដោយគ្មានដីកាបាននោះទេ ដោយសារតែសំណុំរឿងនេះបានបញ្ជូនដល់ដៃតុលាការរួចហើយ។
លោកថា ក្នុងករណីដែលគ្រួសារជនរងគ្រោះបារម្ភអំពីសុវត្ថិភាពផ្ទាល់ខ្លួនអាចទៅទាក់ទងមន្ត្រីប៉ូលិសមូលដ្ឋាន ដើម្បីជួយសម្រួលលើបញ្ហានេះ៖ «អារឿងហ្នឹងតាមពិតទៅយើងបញ្ជូនសំណុំរឿងទៅតុលាការអស់ហើយ ប៉ុន្តែតុលាការវាអត់ទាន់ចេញដីកាឲ្យយើង។ លើកមុនខ្ញុំដូចមានដំណឹងប្ដឹងដែរ ប៉ុន្តែប៉ូលិសមូលដ្ឋានឃ្លាំមើលដែរហើយ ប៉ុន្តែយើងរង់ចាំ ហើយយើងបានជួបទៅតុលាការបន្ថែមហើយ»។
ចំណែកនាយកក្រឡាបញ្ជីអយ្យការនៃសាលាដំបូងខេត្តកំពង់ឆ្នាំង លោក ហ៊ឹម ពុទ្ធាសុរិយៈ ថ្លែងថា សំណុំរឿងនេះកំពុងស្ថិតនៅក្នុងដៃរបស់ព្រះរាជអាជ្ញារង ប៉ុន្តែលោកមិនបានចាំច្បាស់ថា នៅក្នុងដៃរបស់ព្រះរាជអាជ្ញារងមួយណានោះទេ ហើយដំណើរការនៃនីតិវិធីក្នុងសំណុំរឿងនេះដល់ណាក៏លោកមិនដឹងដែរ។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក គង់ ច័ន្ទមុនី មានប្រសាសន៍ថា ករណីព្រួតគ្នាវាយសម្លាប់អ្នកកាសែតមាគ៌ាកម្ពុជានេះ គឺអាចផ្ដើមចេញពីរឿងវិជ្ជាជីវៈសារព័ត៌មានច្រើនជាងគំនុំផ្ទាល់ខ្លួន ពីព្រោះកន្លងមកលោក សួន ចាន់ ធ្លាប់ចុះផ្សាយទាក់ទងនឹងបទល្មើសនេសាទជាច្រើនករណីនៅស្រុកកំពង់លែង និងស្រុកជលគីរី៖ «វាជាករណីមួយដែលធ្ងន់ធ្ងរ ហើយមកដល់ពេលនេះ យើងឃើញថា តុលាការដូចមិនទាន់បានចាប់ជនសង្ស័យមកផ្ដន្ទាទោសនៅឡើយទេ»។
លោក សួន ចាន់ អាយុ ៤៤ឆ្នាំ ជាអ្នកយកព័ត៌មានឲ្យកាសែត "មាគ៌ាកម្ពុជា" ត្រូវបានមនុស្សមួយក្រុមមានគ្នាប្រហែល ១០នាក់ ព្រួតវាយសម្លាប់នៅក្បែរផ្ទះ ស្ថិតនៅភូមិក្បាលកន្លង់ ឃុំពាមឆ្កោក កាលពីយប់ថ្ងៃទី៣១ មករា ឆ្នាំ១០១៤។ នៅក្នុងហេតុការណ៍នោះ មានមនុស្សចំនួនពីរនាក់ផ្សេងទៀត ដែលជាសាច់ញាតិបានរងរបួសធ្ងន់ និងស្រាល ខណៈដែលចូលទៅជួយលោក សួន ចាន់ គឺមានទី១ ឈ្មោះ សួន ឌីម និងទី២ ឈ្មោះ គូ អ៊ិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។