អង្គការទស្សនៈពិភពលោក (World Vision) និងមន្ត្រីនៃមន្ទីរពាក់ព័ន្ធនានាក្នុងខេត្តបាត់ដំបង នៅព្រឹកថ្ងៃទី១៣ សីហា រៀបចំវេទិកាប្រឆាំងការប្រើប្រាស់កម្លាំងពលកម្មលើកុមារ ដែលរៀបចំឡើងនៅសាលប្រជុំសាកលវិទ្យាល័យបាត់ដំបង និងមានកុមារមកពីតាមបណ្ដាស្រុកមួយចំនួនក្នុងខេត្តចូលរួមប្រមាណជិត ៤០០នាក់។
កុមារទាំងពីរភេទដែលចូលរួមក្នុងវេទិកានេះ មានឱកាសលើកជាសំណួរពាក់ព័ន្ធនឹងការជួញដូរ និងការរំលោភសិទ្ធិកុមារ ដាក់ឲ្យវាគ្មិនបកស្រាយភ្លាមៗ។ អ្នកចូលរួមភាគច្រើន ចាប់អារម្មណ៍ខ្លាំងទៅលើការប្រើប្រាស់កម្លាំងពលកម្មរបស់កុមារនេះ និងសំណូមពរឲ្យសមត្ថកិច្ចពាក់ព័ន្ធ រិះរកគន្លឹះបញ្ចៀសការប្រើប្រាស់កុមារដោយខុសច្បាប់បន្តទៀត។
កុមារមួយចំនួនដែលចូលរួមក្នុងកម្មវិធីនោះ មានឯកសណ្ឋានអាវពណ៌ទឹកក្រូច ដែលមាននិមិត្តសញ្ញាពីខាងក្រោយ បញ្ឈប់ពលកម្មកុមារ។ កុមារគ្រប់រូបមានទឹកមុខញញឹមញញែម ហាក់មានការសប្បាយរីករាយ និងលើកឡើងជាសំណួរស្រដៀងគ្នាថា តើមូលហេតុអ្វីបានជាចាំបាច់ត្រូវប្រើប្រាស់កម្លាំងពលកម្មកុមារ និងមានវិធីទប់ស្កាត់ការធ្វើចំណាកស្រុករបស់កុមារដោយរបៀបណា ជាដើម?៖ «តើមន្ត្រីអប់រំមានវិធីសាស្ត្រយ៉ាងណា ដើម្បីជួយដល់កុមារពិការបានចូលរៀនដូចកុមារដទៃទៀត? តើលោកអ៊ំមានគោលការណ៍ជួយទប់ស្កាត់ការធ្វើចំណាកស្រុករបស់ប្រជាពលរដ្ឋនៅខេត្តបាត់ដំបង ដោយរបៀបណា?»។
មន្ត្រីនៃមន្ទីរពាក់ព័ន្ធដែលបានចូលរួមក្នុងកម្មវិធី ឡើងបកស្រាយពន្យល់ដល់កុមារតាមមុខនាទីរៀងៗខ្លួន និងអង្គភាពខ្លះបានពន្យល់ពីគ្រោះថ្នាក់ដល់អាយុជីវិត នៃការធ្វើចំណាកស្រុកដោយខុសច្បាប់ ជាដើម។
ប្រធាននាយកដ្ឋានការងារកុមារ នៃក្រសួងការងារ និងបណ្ដុះបណ្ដាលវិជ្ជាជីវៈ លោក វែង ហៀង មានប្រសាសន៍ថា ទីកន្លែងដែលនិយមប្រើប្រាស់កម្លាំងពលកម្មកុមារ ភាគច្រើនជាកន្លែងប្រកបអាជីវកម្ម និងសិប្បកម្មខ្នាតតូចដែលគ្មានច្បាប់អនុញ្ញាតត្រឹមត្រូវ។ លោកបញ្ជាក់ថា កន្លងទៅខាងក្រសួងការងារ បានសហការជាមួយអង្គការសង្គមស៊ីវិលក្នុងស្រុក និងក្រៅស្រុកមួយចំនួន អប់រំដល់កុមារដែលងាយរងគ្រោះ ដើម្បីលុបបំបាត់ការប្រើប្រាស់កម្លាំងពលកម្មកុមារដោយខុសច្បាប់នេះ៖ «អ៊ីចឹងនៅក្នុងករណីកុមារអាយុក្រោម ៩ឆ្នាំ នឹងទទួលបានអាហារូបករណ៍ ការបញ្ជូនចូលរៀននៅក្នុងប្រព័ន្ធ ដើម្បីទប់ស្កាត់កុមារទន្ទឹមនឹងឪពុកម្ដាយដែលកុមារអាយុចាប់ពី ៩ឆ្នាំទៅ យើងធ្វើការបណ្ដុះបណ្ដាលជំនាញប្រកបមុខរបរ ដើម្បីបញ្ឈប់ការប្រើប្រាស់កុមារ»។
ទាក់ទងនឹងបញ្ហានេះដែរ នាយកគម្រោងការកេងប្រវ័ញ្ចពលកម្មកុមារ នៃអង្គការទស្សនៈពិភពលោក អ្នកស្រី អ៊ីម៉ែលដា អូចាវីឡូ (Imelda Ochavilla) មានប្រសាសន៍តាមរយៈអ្នកបកប្រែថា គោលបំណងនៃការរៀបចំវេទិកានេះ ដើម្បីផ្ដល់ឱកាសដល់កុមារដែលងាយរងគ្រោះពីការប្រើប្រាស់កម្លាំងពលកម្ម បានលើកបញ្ហារបស់ខ្លួនដាក់ឲ្យទៅមន្ត្រីនៃក្រសួង និងមន្ទីរនានារបស់រដ្ឋបានជ្រាប ដើម្បីងាយស្រួលដល់ការដោះស្រាយ។ ម្យ៉ាងទៀត ជាការអប់រំដល់កុមារឲ្យបានយល់ដឹងអំពីការប្រើប្រាស់កម្លាំងពលកម្មលើកុមារ ជាអំពើខុសច្បាប់ផង និងជាការលើកទឹកចិត្តឲ្យកុមារមានឱកាសបញ្ចេញទេពកោសល្យរបស់ខ្លួនផង៖ «នៅក្នុងការជ្រើសរើសកុមារ យើងមានលក្ខណៈវិនិច្ឆ័យផ្នែកធំៗ២ កុមារដែលធ្វើការនៅកន្លែងប្រឈមមុខនឹងគ្រោះថ្នាក់ធ្ងន់ធ្ងរ និងកុមារដែលងាយរងគ្រោះបញ្ជូនទៅធ្វើពលកម្ម»។
មន្ត្រីអង្គការទស្សនៈពិភពលោក ឲ្យដឹងទៀតថា កុមារដែលងាយរងគ្រោះពីការប្រើប្រាស់កម្លាំងពលកម្ម ដែលទទួលបានអាហារូបករណ៍ការសិក្សារៀនសូត្រ និងបណ្ដុះបណ្ដាលចំណេះដឹង ព្រមទាំងការផ្គត់ផ្គង់ជីវភាពក្រុមគ្រួសាររបស់ពួកគេ ប្រមាណជាង ២ម៉ឺននាក់នៅទូទាំងប្រទេស ក្នុងនោះនៅខេត្តបាត់ដំបង ប្រមាណ ៦ពាន់នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។