អាជ្ញាធរមូលដ្ឋានខេត្តតាកែវ បានចុះទៅបិទពិធីសិទ្ធិមនុស្ស ១០ ធ្នូ ដែលប្រារព្ធធ្វើឡើងដោយប្រជាសហគមន៍ខ្មែរកម្ពុជាក្រោម នៅភូមិសង្គមមានជ័យ ឃុំកំពង់ត្របែក ស្រុកបូរីជលសារ។
តំណាងប្រជាសមាគមខ្មែរកម្ពុជាក្រោម ភូមិសង្គមមានជ័យ លោក វី ចាន់ ដែលជាអ្នកផ្ដួចផ្ដើមពិធីនេះ ឲ្យដឹងនៅថ្ងៃទី១០ ធ្នូ ថា លោកបានសុំច្បាប់អាជ្ញាធរមូលដ្ឋានតាំងពីពីរបីថ្ងៃមុន ក៏ប៉ុន្តែលោកថា មិនដឹងយ៉ាងម៉េចនៅពេលប្រជាពលរដ្ឋប្រហែល ១០០នាក់ ចាប់ផ្ដើមប្រារព្ធពិធីនេះ ស្រាប់តែមានអាជ្ញាធរឃុំ និងស្រុកបានចុះទៅបិទពិធីនោះតែម្ដង៖ «ខ្ញុំធ្វើដើម្បីផ្សព្វផ្សាយឲ្យសហគមន៍ដឹងអំពីសិទ្ធិសេរីរបស់គាត់ មានសិទ្ធដើរហើរត្រឹមណា ដល់ត្រឹមណា ដល់ហើយកម្លាំងគេមកហាមឃាត់មិនឲ្យធ្វើ។ ពីមុនគេថាឲ្យ ...ខំទៅជួលតុជួលតាំង ទិញនំទិញអីគេមកហើយ ដល់ហើយកម្លាំងមកពីខាងឃុំគេបញ្ជាមក គេថា ឲ្យខ្ញុំរំសាយ ខ្ញុំក៏រំសាយទៅ»។
វិទ្យុអាស៊ីសេរី មិនអាចទាក់ទងអាជ្ញាធរមូលដ្ឋាន និងអភិបាលខេត្តតាកែវ បានទេនៅថ្ងៃទី១០ ធ្នូ ដើម្បីសុំការបញ្ជាក់ព័ត៌មានបន្ថែម។
ដោយឡែកនៅឯខេត្តកំពត ឯណោះវិញ អង្គការសិទ្ធិមនុស្សលីកាដូ (Licadho) បានប្រារព្ធទិវាសិទ្ធិមនុស្ស១០ ធ្នូ នេះដែរ។ មន្ត្រីសិទ្ធិមនុស្សលីកាដូ លោក យន់ ផល្លី ឲ្យដឹងថា មន្ត្រីលីកាដូ បានចុះទៅពន្ធនាគារនៅព្រឹកថ្ងៃទី១០ ធ្នូ ដើម្បីចែកគ្រឿងឧបភោគបរិភោគជូនអ្នកទោស ជាការរំលឹកទិវាគោរពសិទ្ធិមនុស្សអន្តរជាតិ ១០ ធ្នូ នេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។