មន្ត្រីអង្គការអាដហុក (ADHOC) និងមន្ត្រីអង្គការដទៃទៀត ថាសាលាដំបូងរាជធានីភ្នំពេញមិនអនុញ្ញាតឲ្យពួកគេចូលសួរសុខទុក្ខមន្ត្រីការពារសិទ្ធិមនុស្សអាដហុក ៤រូប និងមន្ត្រី គ.ជ.ប លោក នី ចរិយា នៅមុនពិធីបុណ្យចូលឆ្នាំថ្មីនោះទេ។
មន្ត្រីអង្គការអាដហុក និងមន្ត្រីអង្គការសង្គមស៊ីវិលដទៃទៀតអះអាងថា ពួកគាត់បានដាក់ពាក្យស្នើសុំជាច្រើនលើកច្រើនសា ដើម្បីចូលសួរសុខទុក្ខ និងលើកទឹកចិត្តដល់មន្ត្រីអាដហុក ៤នាក់ និងមន្ត្រី គ.ជ.ប ១រូបក្នុងពន្ធនាគារ ប៉ុន្តែត្រូវបានសាលាដំបូងរាជធានីភ្នំពេញបដិសេធរហូត។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា មានប្រសាសន៍ថា សាលាដំបូងរាជធានីភ្នំពេញ លើកហេតុផលថា មន្ត្រីរបស់ពួកគេជាប់រវល់ បើទោះបីជាពួកគាត់បានដាក់ពាក្យស្នើសុំតាំងពីដើមខែមេសា ក្តី។ លោក សំ ច័ន្ទគា យល់ថា អ្វីដែលតុលាការធ្វើនេះ គឺមិនសមហេតុផល និងមានចេតនាធ្វើទុក្ខបុកម្នេញដល់មន្ត្រីសិទ្ធិមនុស្ស៖ « អ្វីដែលគេធ្វើនេះ គឺជាចេតនាធ្វើទុក្ខបុកម្នេញទៅលើសកម្មជនសិទ្ធិមនុស្ស ដើម្បីបំបាក់ស្មារតីតែប៉ុណ្ណឹង។ បើរឿងហេតុផលផ្សេងពីនោះ គឺយើងដូចមិនមានឃើញទេ ហេតុផលដែលគេនិយាយថា មន្ត្រីរបស់គេជាប់រវល់ជាប់អី។ ខ្ញុំគិតថា វាមិនស័ក្តិសមក្នុងការឆ្លើយដោះសាបែបនេះ ព្រោះអ្នកដែលរវល់ គឺមន្ត្រីប៉ូលិស។ នេះគឺតុលាការដែលជាអ្នកមិនអនុញ្ញាត ហើយតុលាការមានទៅការពារអ្នកជាប់ឃុំឯណា។ អ្វីដែលគាត់ធ្វើនេះ វាអាចជាបញ្ហារបស់គេ និងចេតនាធ្វើទុក្ខបុកម្នេញដល់សកម្មជនសិទ្ធិមនុស្ស » ។
កាលពីថ្ងៃទី២៤ ខែមីនា ចៅក្រមស៊ើបសួរនៃសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ បានចេញលិខិតមួយច្បាប់ ផ្ញើទៅប្រធានមណ្ឌលអប់រំកែប្រែនៃក្រសួងមហាផ្ទៃ និងប្រធានពន្ធនាគាររាជធានីភ្នំពេញនៃក្រសួងមហាផ្ទៃ ដោយស្នើឲ្យផ្អាកការអនុញ្ញាតឲ្យចូលជួបសួរសុខទុក្ខមន្ត្រីអាដហុក និងមន្ត្រី គ.ជ.ប។ លិខិតដដែលបន្តថា ចៅក្រមស៊ើបសួរអនុញ្ញាតឲ្យតែគ្រួសារ និងមេធាវីការពារក្តីជនត្រូវចោទប៉ុណ្ណោះ អាចចូលសួរសុខទុក្ខបាន ហើយក្រៅតែពីមេធាវី គប្បីមានមន្ត្រីអនុរក្សពន្ធនាគារយ៉ាងតិចម្នាក់នៅអមជាមួយជានិច្ច។ លិខិតដដែលមិនបញ្ជាក់ហេតុផលអ្វីឡើយ។
លោក ហួន ជុនឌី មេធាវីមួយរូបក្នុងចំណោមមេធាវី ៥រូបដែលការពារក្ដីឲ្យមន្ត្រីអាដហុក មានប្រសាសន៍ថា ជាគោលការណ៍ គឺចៅក្រមស៊ើបសួរ ឬព្រះរាជអាជ្ញាមានសិទ្ធិសម្រេចឲ្យនរណាម្នាក់ចូលសួរសុខទុក្ខអ្នកដែលត្រូវចោទក្នុងពន្ធនាគារ។ ទោះយ៉ាងណាក្តី លោកសង្កេតឃើញថា ករណីមន្ត្រីអាដហុកនេះ ដូចជាមិនមានភាពចាំបាច់ណាមួយដែលត្រូវរារាំងមិនឲ្យមន្ត្រីសង្គមស៊ីវិលចូលសួរសុខទុក្ខគ្នាឡើយ៖ « សាកសួរកន្លងមកដូចជាចប់សព្វគ្រប់អស់ហើយរយៈពេល ១ខែ ២ខែនេះ មិនមានឃើញហៅសាក្សី ឬបុគ្គលណាមួយទៅឆ្លើយបំភ្លឺនៅតុលាការទេ ដែលបង្ហាញថា នីតិវិធីនេះចប់សព្វគ្រប់ ដែលមិនមានគួរឲ្យព្រួយបារម្ភដែលនាំឲ្យពួកគាត់សម្រេចចិត្តថា មិនឲ្យមន្ត្រីសិទ្ធិមនុស្សទាំងអស់នោះចូលជួបទេ »។
មន្ត្រីអាដហុកទាំង ៤រូបរួមមាន លោក នី សុខា លោក ណៃ វ៉ង់ដា លោក យី សុខសាន្ត និងអ្នកស្រី លឹម មុន្នី ព្រមទាំងលោក នី ចរិយា មន្ត្រី គ.ជ.ប ត្រូវបានសាលាដំបូងរាជធានីភ្នំពេញ ឃុំខ្លួនបណ្ដោះអាសន្នរយៈពេលជិត ១ឆ្នាំហើយ ក្រោមបទចោទ «សូកប៉ាន់សាក្សី» និង «សមគំនិតក្នុងអំពើសូកប៉ាន់សាក្សី»។
រីឯអ្នកនាំពាក្យនាយកដ្ឋានពន្ធនាគារ លោក សន កែវ មានប្រសាសន៍ថា លោកមិនទាន់បានដឹងករណីនេះច្បាស់នៅឡើយ។ ទោះយ៉ាងណា លោកបញ្ជាក់ថា ជាគោលការណ៍ ខាងពន្ធនាគារ គឺអនុវត្តទៅតាមសេចក្តីសម្រេចរបស់តុលាការ៖ « ជាគោលការណ៍ រាល់ពិរុទ្ធជនដែលជាប់នីតិវិធីតុលាការ យើងត្រូវស្នើសុំការអនុញ្ញាតជាមុនពីតុលាការសិន។ ចឹងរឿងនេះ ប្រហែលតុលាការឆ្លើយតបថា រឿងនេះឋិតក្នុងនីតិវិធីរបស់គាត់ គាត់ក៏មិនអនុញ្ញាតឲ្យជួបចឹងទេ ប្រហែលជាពន្ធនាគារអនុវត្តតាមសេចក្តីសម្រេចរបស់តុលាការហើយ »។
អ្នកនាំពាក្យសមាគមការពារសិទ្ធិមនុស្សអាដហុក អះអាងថា កន្លងមក មន្ត្រីអាដហុក និងមន្ត្រីអង្គការមួយចំនួន ធ្លាប់ត្រូវបានអនុញ្ញាតឲ្យចូលសួរសុខទុក្ខធម្មតា ប៉ុន្តែក៏មានការរើសអើង ឬជម្រុះមន្ត្រីសិទ្ធិមនុស្សរូបណាដែលលេចធ្លោ និងពូកែរិះគន់រដ្ឋាភិបាល ដោយមិនអនុញ្ញាតឲ្យចូលសួរសុខទុក្ខឡើយ។
មន្ត្រីសមាគមអាដហុក និងមន្ត្រីអង្គការដទៃទៀត នៅតែទទូចឲ្យតុលាការ និងក្រសួងមហាផ្ទៃ អនុញ្ញាតឲ្យពួកគាត់បានចូលសួរសុខទុក្ខ និងលើកទឹកចិត្តដល់មន្ត្រីអាដហុកទាំង ៤រូប និងមន្ត្រី គ.ជ.ប ១រូបដែលជាមិត្តភ័ក្ដិធ្លាប់ធ្វើការជាមួយគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។