ប្រជាពលរដ្ឋរស់នៅភូមិបរកែវចាស់ ឃុំឡាមិញ ស្រុកបរកែវ ចំនួន ៧នាក់ បានផ្ដិតមេដៃលើពាក្យប្ដឹងសុំមកមន្ត្រីការពារសិទ្ធិមនុស្សអាដហុក (ADHOC) ខេត្តរតនគិរី សុំជួយអន្តរាគមន៍ទៅអាជ្ញាធរពាក់ព័ន្ធចាត់វិធានការឲ្យមន្ត្រីភូមិប្រគល់អត្តសញ្ញាណប័ណ្ណពលរដ្ឋមកអ្នកភូមិដើម្បីប្រើប្រាស់ ជាពិសេសសម្រាប់សំគាល់សិទ្ធិចូលរួមបោះឆ្នោតជ្រើសរើសតំណាងរាស្ត្រនៅពេលខាងមុខនេះ។
ប្រជាពលរដ្ឋអ្នកប្ដឹងម្នាក់ គឺអ្នកស្រី ឯក អេង មានប្រសាសន៍បញ្ជាក់ថា ប្រជាពលរដ្ឋក្នុងភូមិជាង ២០០នាក់ គឺមានតែជាង ១០នាក់ប៉ុណ្ណោះ បានទទួលអត្តសញ្ញាណប័ណ្ណពលរដ្ឋពីអនុប្រធានភូមិឈ្មោះ សុខ ហួច បន្ទាប់ពីបានចុះបញ្ជីធ្វើអត្តសញ្ញាណប័ណ្ណតាំងពីខែកក្កដា ឆ្នាំ២០១២។
អ្នកស្រីបន្តថា អ្នកភូមិបានឃើញអត្តសញ្ញាណប័ណ្ណមានរូបថតពួកគាត់ច្រើនទៀតនៅដៃមន្ត្រីភូមិនេះ ប៉ុន្តែតាំងពីខែមេសា រហូតមកមន្ត្រីភូមិមិនចែកជូនប្រជាពលរដ្ឋទេ៖ «សួរពីរនាក់ថា ខូចអស់ហើយអត្តសញ្ញាណប័ណ្ណ បរកែវចាស់ និយាយអ៊ីចឹង។ ប្រជាជនឃើញទាំងអស់ អត្តសញ្ញាណប័ណ្ណ រួចប្រធានភូមិអត់ឲ្យមិនដឹងធ្វើម៉េច បីអាណត្តិពីរអាណត្តិហើយអត់បានទៅបោះនឹងគេ»។
ដូចគ្នានេះដែរ ប្រជាពលរដ្ឋឈ្មោះ គង់ គា មានប្រសាសន៍បញ្ជាក់ដែរថា អនុប្រធានភូមិមានចេតនាបង្កកអត្តសញ្ញាណប័ណ្ណពលរដ្ឋ ដើម្បីរារាំងមិនឲ្យប្រជាពលរដ្ឋមានប័ណ្ណសំគាល់សិទ្ធិបោះឆ្នោត។
លោកអំពាវនាវឲ្យអាជ្ញាធរពាក់ព័ន្ធស៊ើបអង្កេតករណីនេះ៖ «អត្តសញ្ញាណប័ណ្ណគេយកមកឲ្យហើយ ថាអត់ឃើញប្រជាជនគេយកទៅវិញអស់ គេមិនឲ្យតែម្ដង។ បានតែ ១០នាក់ទេ ជិត ២០០នាក់ អត់បានទេ បើមិនជឿសួរចេះតែនិយាយមិនមែនទេ»។
យោងពាក្យប្ដឹងរបស់អ្នកភូមិដែលវិទ្យុអាស៊ីសេរី ទទួលបានពីមន្ត្រីសមាគមអាដហុក ខេត្តរតនគិរី កាលពីចុងខែមេសា កន្លងទៅ អនុប្រធានភូមិបរកែវចាស់ លោក សុខ ហួច បានចុះចែកអត្តសញ្ញាណប័ណ្ណពលរដ្ឋជូនអ្នកភូមិបាន ១០នាក់ ហើយប្រាប់អ្នកភូមិថា ឲ្យយកសៀវភៅគ្រួសារទៅបោះឆ្នោត ប៉ុន្តែអ្នកភូមិបញ្ជាក់ថា អ្នកភូមិនៅតំបន់នោះភាគច្រើនមិនមានសៀវភៅគ្រួសារទេ ពីព្រោះពួកគាត់ភាគច្រើនជាអ្នកក្រ មិនមានប្រាក់ចំណាយសម្រាប់ធ្វើសៀវភៅគ្រួសារឡើយ។
វិទ្យុអាស៊ីសេរី នៅថ្ងៃច័ន្ទ ទី១៧ ខែមិថុនា មិនអាចទាក់ទងលោក សុខ ហួច សុំបញ្ជាក់ពីករណីនេះបានទេ។
យ៉ាងនេះក្តី អធិការប៉ូលិសស្រុកបរកែវ លោក ម៉ៅ សាន់ មានប្រសាសន៍ថា ការអះអាងរបស់ប្រជាពលរដ្ឋគឺជាការមិនពិត។ លោកបញ្ជាក់ថា បានទទួលអត្តសញ្ញាណប័ណ្ណ ២០០ប័ណ្ណសម្រាប់ចែកជូនពលរដ្ឋនៅឃុំឡាមិញ ហើយមន្ត្រីមូលដ្ឋានបានចែកជូនប្រជាពលរដ្ឋអស់ហើយ នៅសល់តែជាង ១០ប័ណ្ណរកម្ចាស់មិនឃើញ៖ «អត្តសញ្ញាណប័ណ្ណគេចែកអស់ហើយតើ! ជាង ២០០ គេផ្ដល់ឲ្យជិតបីខែមកហើយ។ អ្នកប្ដឹងចេះតែប្ដឹងទៅ ហើយអ្នកដើរចែករកមនុស្សមិនឃើញ។ ខ្ញុំរាប់ព្រឹកមិញនៅសល់តែ ១២សន្លឹក»។
មន្ត្រីឃ្លាំមើលសិទ្ធិមនុស្សសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា លោកបានចុះអង្កេតករណីនេះកាលពីថ្ងៃសុក្រ ទី១៤ និងបានទទួលពាក្យបណ្តឹង និងព័ត៌មានពីពលរដ្ឋស្ដីពីករណីនេះ។
លោកបន្តថា ប្រសិនរកឃើញថា មន្ត្រីភូមិពិតជាមានចេតនាបង្កកអត្តសញ្ញាណប័ណ្ណពលរដ្ឋមែននោះ គឺជាកំហុសរបស់មន្ត្រីមូលដ្ឋាន៖ «ប្រជាពលរដ្ឋបានអះអាងថា បានឃើញអត្តសញ្ញាណប័ណ្ណត្រូវបានមេភូមិកាន់ធ្វើរួចហើយមិនព្រមប្រគល់ឲ្យពួកគាត់។ រឿងនេះយើងនឹងចាត់អន្តរាគមន៍ទៅស្នងការខេត្តឲ្យមេភូមិធ្វើយ៉ាងណាប្រគល់អត្តសញ្ញាណប័ណ្ណឲ្យពលរដ្ឋ ងាយស្រួលក្នុងការបោះឆ្នោតខាងមុខ»។
ប្រធានគណៈកម្មាធិការអព្យាក្រឹត ដើម្បីការបោះឆ្នោតត្រឹមត្រូវ និងយុត្តិធម៌នៅកម្ពុជា ហៅកាត់ថា អង្គការនិចហ្វិក បណ្ឌិត ហង្ស ពុទ្ធា កត់សំគាល់ថា បញ្ហាអត្តសញ្ញាណប័ណ្ណពលរដ្ឋ គឺជាការទទួលខុសត្រូវរបស់ក្រសួងមហាផ្ទៃ ដើម្បីសម្រួលឲ្យប្រជាពលរដ្ឋមានឯកសារសំគាល់សិទ្ធិបោះឆ្នោត។លោកបន្តថា ករណីនេះត្រូវស៊ើបអង្កេតឲ្យបានជាក់លាក់ ប៉ុន្តែប្រសិនរកឃើញថា មេភូមិពិតជាធ្វើឲ្យមានបញ្ហាជាមួយអត្តសញ្ញាណប័ណ្ណពលរដ្ឋនោះ មេភូមិត្រូវទទួលខុសត្រូវចំពោះមុខច្បាប់ និងទទួលខុសត្រូវចំពោះសិទ្ធិបោះឆ្នោតរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។