អង្គការជាតិ និងអន្តរជាតិមួយចំនួនដែលធ្វើការងារពាក់ព័ន្ធនឹងការឃ្លាំមើលសិទ្ធិពលករចំណាកស្រុកទៅក្រៅប្រទេស បានជួបពិភាក្សាគ្នាកាលពីថ្ងៃទី២៣ ខែកក្កដា ដើម្បីសិក្សារកលទ្ធភាពស្នើឲ្យដាក់បញ្ចូលបញ្ហានេះចូលក្នុងផែនការអភិវឌ្ឍន៍របស់អង្គការសហប្រជាជាតិ (អ.ស.ប) សម្រាប់ឆ្នាំសហស្សវត្សថ្មីខាងមុខនេះ។
គោលដៅសម្រាប់សហស្សវត្សថ្មី បានកំណត់យកការអភិវឌ្ឍប្រកបដោយចិរភាព។ ក្នុងគោលដៅចម្បងនេះ ប្រទេសពាក់ព័ន្ធមួយចំនួននៅលើពិភពលោក រួមទាំងកម្ពុជា ផង ចង់ឲ្យបញ្ចូលនូវបញ្ហាទេសន្តរប្រវេសក៍ ជារបៀបវារៈសំខាន់មួយក្នុងគោលដៅនោះផង។
មន្ត្រីអង្គការអន្តរជាតិវេទិកាទេសន្តរប្រវេសក៍អាស៊ី (Migrant Forum in Asia) អ្នកស្រី អាកណេស មាទីនហ្សូ (Agnes Matienzo) បានធ្វើបទបង្ហាញនៅក្នុងសន្និសីទពិគ្រោះយោបល់ថ្នាក់ជាតិថា គោលដៅសម្រាប់សហស្សវត្សថ្មី មិនត្រូវទុកចោលនូវបញ្ហាទេសន្តរប្រវេសក៍ ឬបញ្ហាចំណាកស្រុកចោលនោះទេ។ ជាងនេះទៅទៀត បញ្ហានេះគួរតែចាត់ជាគោលដៅអាទិភាពមួយក្នុងចំណោមគោលដៅដទៃទៀត។
អ្នកស្រី អាកណេស មាទីនហ្សូ បានឲ្យដឹងទៀតថា ការយកចិត្តទុកដាក់លើបញ្ហានេះ គឺដើម្បីធានាដល់ការកាត់បន្ថយភាពក្រីក្រ និងការអភិវឌ្ឍមួយប្រកបដោយនិរន្តរភាព។
ទាក់ទងបញ្ហានេះដែរ រដ្ឋលេខាធិការទទួលបន្ទុកផ្នែកអត្រានុកូលដ្ឋាន គោលនយោបាយប្រឆាំងអំពើជួញដូរមនុស្ស ការងារយេនឌ័រ និងកុមារនៃក្រសួងមហាផ្ទៃ អ្នកស្រី ជូ ប៊ុនអេង បានចូលរួមក្នុងសន្និសីទពិគ្រោះយោបល់ថ្នាក់ជាតិនោះដែរ។ អ្នកស្រីបានគាំទ្រចំពោះការស្នើសុំនេះ ហើយថា បើប្រទេសនីមួយៗចង់ឲ្យមានការអភិវឌ្ឍប្រកបដោយនិរន្តរភាពនោះ គឺត្រូវគ្រប់គ្រងការងារទេសន្តរប្រវេសក៍នេះអោយបានល្អ៖ «ពាក់ព័ន្ធនឹងទេសន្តរប្រវេសក៍គឺទាក់ទងនឹងមនុស្ស ឬការចល័តរបស់មនុស្សពីប្រទេសមួយទៅប្រទេសមួយ ដែលបញ្ហានេះជះឥទ្ធិពលសំខាន់ទៅដល់ផ្នែកសេដ្ឋកិច្ច ការគ្រប់គ្រងសង្គម និងនយោបាយ»។
ចំណែកប្រធានអង្គការជំនួយផ្នែកច្បាប់ដល់កុមារ និងស្ត្រី លោក មុំ សុខចារ ដែលជាអ្នកសម្របសម្រួលកិច្ចពិគ្រោះយោបល់នេះ បានឲ្យដឹងថា សង្គមស៊ីវិលជាច្រើនចង់ឲ្យរដ្ឋាភិបាល និងប្រទេសដែលពាក់ព័ន្ធ ឬបណ្ដាប្រទេសជាសមាជិកនៃអង្គការសហប្រជាជាតិយកចិត្តទុកដាក់អំពីបញ្ហាចំណាកស្រុក ដោយសារបញ្ហាចំណាកស្រុកបានផ្ដល់ផលប្រយោជន៍សំខាន់ក្នុងការចូលរួមការអភិវឌ្ឍប្រទេស៖ «ពេលអង្គការសហប្រជាជាតិដាក់បញ្ចូលបញ្ហានេះ រដ្ឋជាសមាជិកក៏ដាក់ចូលក្នុងផែនការអភិវឌ្ឍរបស់ខ្លួនដែរ ពេលនោះនឹងមានការយកចិត្តទុកដាក់កាន់តែខ្លាំងលើកិច្ចការចំណាកស្រុកនេះ»។
កិច្ចពិគ្រោះយោបល់នេះធ្វើឡើងស្របពេលដែលសហស្សវត្សចាស់នឹងផុតអាណត្តិនៅខែកញ្ញា ខាងមុខនេះ និងចំពេលដែលពលករចំណាកស្រុកកម្ពុជា កំពុងជួបបញ្ហាប្រឈមយ៉ាងច្រើន ដូចជាការរំលោភសិទ្ធិការងារ ការបោកបញ្ឆោត និងការជួញដូរផ្លូវភេទតាមរូបភាពចំណាកស្រុករកការងារធ្វើនៅក្រៅប្រទេស។
លោក មុំ សុខចារ ឲ្យដឹងថា លទ្ធផលសរុបនៃកិច្ចពិគ្រោះយោបល់នេះ នឹងបញ្ជូនទៅរដ្ឋាភិបាល និងចងក្រងជាឯកសារគោលមួយសម្រាប់អ្នកទាំងអស់គ្នាសិក្សាបន្ត និងជាមូលដ្ឋានមួយដើម្បីយកទៅចែករំលែកក្នុងកិច្ចពិភាក្សាជុំវិញបញ្ហាដដែលនេះនៅកិច្ចពិគ្រោះយោបល់ថ្នាក់តំបន់ ដែលនឹងប្រព្រឹត្តទៅនៅខែក្រោយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។