អាជ្ញាធរខេត្តរតនគិរី បានសម្របសម្រួលដោះស្រាយពាក្យប្ដឹងរបស់សហគមន៍ព្នង ចំនួន ៧ភូមិក្នុងខេត្តមណ្ឌលគិរី ដែលទាមទារឲ្យផ្លាស់ប្ដូរតួនាទីប្រធានមន្ទីរអភិវឌ្ឍន៍ជនបទ ក៏ប៉ុន្តែភាគីសហគមន៍មិនព្រមទទួលយកការសម្របសម្រួលបញ្ចប់វិវាទដោយសន្តិវិធីនោះទេ។
តំណាងជនជាតិដើមភាគតិចព្នង ខេត្តមណ្ឌលគិរី អះអាងថា នឹងដាក់ពាក្យប្ដឹងថ្មីទៀតទៅរដ្ឋមន្ត្រីក្រសួងអភិវឌ្ឍន៍ជនបទ ដើម្បីស៊ើបអង្កេតទៅលើពាក្យប្ដឹងរបស់សហគមន៍ដែលចោទថា ប្រធានមន្ទីរអភិវឌ្ឍន៍ជនបទខេត្ត រំលោភសិទ្ធិជនជាតិដើមភាគតិច និងរំខានការប្រារព្ធខួបជនជាតិដើមភាគតិចពិភពលោកកាលពីខែសីហា កន្លងទៅ។
កាលពីថ្ងៃទី១ ខែធ្នូ តំណាងសហគមន៍ ៨នាក់មកពីស្រុកកោះញែក ស្រុកអូររាំង ស្រុកពេជ្រដា និងក្រុងសែនមនោរម្យ បានមកកាន់សាលាខេត្តមណ្ឌលគិរី តាមការអញ្ជើញរបស់អាជ្ញាធររដ្ឋបាលខេត្ត ឲ្យតំណាងពួកគេជួបប្រជុំស្វែងរកដំណោះស្រាយពាក់ព័ន្ធពាក្យប្ដឹងរបស់សហគមន៍។ ដោយឡែកសមាជិកសហគមន៍ជាង ៣០នាក់ផ្សេងទៀត ក៏បាននាំគ្នាមកប្រមូលផ្តុំនៅមុខសាលាខេត្ត គាំទ្រតំណាងពួកគេដែលចូលរួមប្រជុំស្វែងរកដំណោះស្រាយនេះ។
តំណាងសហគមន៍ លោក ក្រើង តុលា បញ្ជាក់នៅថ្ងៃទី២ ខែធ្នូ ថា អាជ្ញាធរខេត្តមិនបានដោះស្រាយបញ្ហាដោយតម្លាភាពនោះទេ ក្រៅពីសម្របសម្រួលឲ្យភាគីសហគមន៍បញ្ឈប់ការប្ដឹង ក្រោមហេតុផលថា អ្វីដែលសហគមន៍ចោទប្រកាន់ គឺជាការយល់ច្រឡំ។ លោកថា សហគមន៍ទាំងអស់ទាមទារឲ្យអាជ្ញាធរខេត្ត ស៊ើបអង្កេតរកការពិតផ្តល់យុត្តិធម៌ដល់ពលរដ្ឋជនជាតិដើមភាគតិច៖ « យើងគ្រោង ផ្ដិត មេដៃ បន្ថែមទៀត ចំនួន ៧០០ ពីមុន យើង បានតែ មេដៃ ៤០០ ទេ បើសិនអាជ្ញាធរខេត្ត មិនដោះស្រាយ យើង នឹងដាក់ ទៅក្រសួងផ្ទាល់ តែម្តង ។ ម្សិលមិញយើងអត់បានឯកភាពទេ »។
ជនជាតិដើមភាគតិចព្នង នៅភូមិចំនួនបី ឋិតក្នុងស្រុកពេជ្រាដា ស្រុកកោះញែក និងស្រុកកែវសីមា កាលពីខែវិច្ឆិកា អះអាងថា អាជ្ញាធរឃុំបានរំខានអ្នកភូមិដែលជួបជុំគ្នាសែនព្រេនបែបប្រពៃណី កាលពីថ្ងៃទី៩ សីហា ដើម្បីអបអរខួបទិវាជនជាតិដើមភាគតិចពិភពលោក។ ចំណែកនៅឃុំដាក់ដាំ សហគមន៍មិនបានប្រារព្ធទិវានេះទេ ដោយសារតែមន្ត្រីមន្ទីរអភិវឌ្ឍន៍ជនបទ លើកពេលទៅធ្វើនៅថ្ងៃទី១៩ ខែសីហា វិញ ផ្ទុយទៅនឹងគម្រោងដែលបានឯកភាពគ្នា។ តំណាងជនជាតិដើមភាគតិចទាំងនោះ ចាត់ទុកថា នេះជាការរើសអើង និងរំលោភសិទ្ធិជនជាតិដើមភាគតិច។
ទាក់ទិនបញ្ហានេះ អភិបាលរងខេត្តមណ្ឌលគិរី លោក ចឹង សុចន្ថា ដែលដឹកនាំការប្រជុំដោះស្រាយបញ្ហាជាមួយសហគមន៍ថ្លែងថា សហគមន៍យល់ច្រឡំចំពោះនីតិវិធីខ្លះរបស់អាជ្ញាធរមូលដ្ឋាន និងមន្ត្រីជំនាញទាក់ទិនសំណើ និងកិច្ចសហការរៀបចំខួបជនជាតិដើមភាគតិច ដែលធ្វើឡើងជាលក្ខណៈប្រពៃណី និងការកំណត់ពេលវេលាធ្វើមេទីញរបស់សហគមន៍។ លោកថា អាជ្ញាធរគោរព និងទទួលស្គាល់សិទ្ធិជនជាតិដើមភាគតិច ជាពិសេសសិទ្ធិប្រារព្ធទិវាជនជាតិដើមដែលច្បាប់ជាតិ និងអន្តរជាតិទទួលស្គាល់ ក៏ប៉ុន្តែការផ្លាស់ប្ដូរកាលបរិច្ឆេទធ្វើមេទីញ គឺជាចំណាត់ការរបស់អាជ្ញាធរខេត្ត ដែលតម្រូវទៅតាមពេលវេលាជាក់ស្តែង។ លោកសំណូមពរឲ្យសហគមន៍យោគយល់ពីគោលបំណងរបស់អាជ្ញាធរ ហើយសហការល្អសម្រាប់ការរៀបចំខួបសហគមន៍នៅឆ្នាំក្រោយៗទៀត៖ « ឲ្យតែមាន ទឡ្ហីករណ៍ច្បាស់លាស់ថា លោក សារោម បន្ទច់បង្អាក់មិនឲ្យ បងប្អូន ប្រារព្ធ ទិវាហ្នឹង រដ្ឋបាលខេត្តនឹងមានវិធានការជាក់ស្តែង ។ ការសម្របសម្រួល របស់ខ្ញុំ ម្សិលមិញ សុំឲ្យ បងប្អូន យល់គ្នា សុំ ឲ្យបងប្អូន យល់ថា រដ្ឋាភិបាលជាអ្នកជួយ បងប្អូន មិនមែនជា អ្នកប្រឆាំង ធ្វើឲ្យបាត់បង់ អត្តសញ្ញាណបងប្អូន ទេ »។
អាជ្ញាធរខេត្តមណ្ឌលគិរី បង្ហាញការសោកស្ដាយគ្រាដែលអាជ្ញាធររៀបចំវេទិកាជួបជុំសហគមន៍ និងមានជ្រូកមាន់ ស្រាពាងសម្រាប់សែនព្រេនក្នុងទិវាជនជាតិដើមភាគតិចពិភពលោក កាលពីថ្ងៃទី១៩ ខែសីហា នៅឃុំដាក់ដាំ ស្រុកអូររាំង ក៏ប៉ុន្តែមិនមានសមាជិកសហគមន៍ណាម្នាក់ចូលរួមពិធីនោះទេ។
ប្រធានមន្ទីរអភិវឌ្ឍន៍ជនបទខេត្តមណ្ឌលគិរី លោក យន់ សារោម បញ្ជាក់ថា សហគមន៍មានសិទ្ធិនឹងប្ដឹងចោទប្រកាន់រូបលោក ក៏ប៉ុន្តែលោកបដិសេធថា អ្វីដែលស្ថាប័នលោកបានធ្វើ គឺអនុលោមទៅតាមគោលការណ៍ណែនាំរបស់ក្រសួង និងអាជ្ញាធរខេត្ត។ លោកថា សមាជិកសហគមន៍ខ្លះមិនយល់ ហើយជឿតាមការញុះញង់គ្មានការពិតជាលក្ខណៈបុគ្គល ដែលរៀបចំពាក្យប្ដឹងនេះឡើង។ លោកព្រមានថា នឹងអនុវត្តវិធានការច្បាប់តបតបណ្ដឹងនេះវិញ ប្រសិនសមាជិកសហគមន៍ណាចោទប្រកាន់រូបលោកគ្មានហេតុផលត្រឹមត្រូវ៖ « តាមសិទ្ធិ របស់ខ្ញុំ អ្នកឯង ត្រូវ ទទួលខុសត្រូវ ចំពោះមុខ ច្បាប់។ យើងធ្វើតាមច្បាប់ទាំងអស់។ យើងអត់មានរំលោភអ្វីទាំងអស់ គ្រាន់តែ យើងយឺតយ៉ាវ តាមបណ្ដា ខេត្តគេរៀបចំថ្ងៃណា ក៏បាន ដែរ ធ្វើអ្វីឲ្យ តាមផ្លូវ ច្បាប់ យើង សហការគ្នា »។
មន្ត្រីរដ្ឋបាលខេត្តមណ្ឌលគិរី មិនអនុញ្ញាតឲ្យមន្ត្រីការពារសិទ្ធិមនុស្សចូលរួមសង្កេតការណ៍ក្នុងកិច្ចប្រជុំសម្របសម្រួលនោះទេ កាលពីថ្ងៃទី១ ខែធ្នូ។
មន្ត្រីសម្របសម្រួលសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា សម្ដែងការសោកស្ដាយ ដោយសារជំនួបដោះស្រាយបញ្ហារវាងសហគមន៍ និងអាជ្ញាធរខេត្ត មិនបានលទ្ធផលវិជ្ជមាន។ លោកថា ការប្រកាន់ឥរិយាបថទន់ភ្លន់ និងយន្តការដោះស្រាយបញ្ហាដោយតម្លាភាព គឺជាបញ្ហាគន្លឹះរបស់ភាគីពាក់ព័ន្ធ ដើម្បីបន្តស្វែងរកដំណោះស្រាយមានប្រសិទ្ធភាពបន្តទៀត៖ « គួរតែមាន វិធានការដោះស្រាយ ណាមួយ ឲ្យជាក់លាក់ច្បាស់លាស់ដល់សហគមន៍ ដល់ បងប្អូន ប្រជាពលរដ្ឋ។ រាល់ ការដោះស្រាយ ត្រូវ ផ្អែកលើ គោលការណ៍ច្បាប់ និងបង្ហាញជាសាធារណៈ ដើម្បីឲ្យប្រជាពលរដ្ឋបានដឹង »។
សហគមន៍ព្នង ឃុំប៊ូស្រា បានដាក់ពាក្យប្ដឹងអតីតអភិបាលខេត្តមណ្ឌលគិរី លោក អេង ប៊ុនហ៊ាង ពីបទរំលោភសិទ្ធិក្រោយពេលអាជ្ញាធរខេត្ត ដាក់កងកម្លាំងរារាំងការប្រារព្ធខួបជនជាតិដើមពិភពលោកថ្ងៃទី៩ ខែសីហា ឆ្នាំ២០១៥ ក្រោមហេតុផលមិនសុំច្បាប់ពីអាជ្ញាធរខេត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។