ដើម្បីចូលរួមអបអរសាទរទិវាសន្តិភាពអន្តរជាតិ នៅថ្ងៃទី២១ ខែកញ្ញា ក្រុមការងារដើម្បីសន្តិភាពនៅក្នុងប្រទេសកម្ពុជា ប្រមូលផ្តុំគ្នាជាក្រុមៗដើរទៅតាមផ្សារមួយចំនួននៅក្នុងទីក្រុងភ្នំពេញ ដើម្បីផ្សព្វផ្សាយអំពីទិវានេះ ជាពិសេសអំពីអត្ថន័យពិតប្រាកដរបស់សន្តិភាព។
ក្រៅពីទីផ្សារ ក្រុមអ្នកផ្សព្វផ្សាយបានទៅប្រមូលផ្តុំគ្នានៅមុខព្រះបរមរាជវាំង នៅរសៀលថ្ងៃដដែល ដើម្បីបន្តការផ្សព្វផ្សាយរបស់ពួកគេមុននឹងរំសាយ។
ក្នុងការផ្សព្វផ្សាយអំពីសន្តិភាពនៅក្នុងទិវាសន្តិភាពអន្តរជាតិនេះ ក្រុមការងារដើម្បីសន្តិភាព បានបែងចែកគ្នាជា ១៥ក្រុម ដែលមួយក្រុមៗមានគ្នាប្រមាណពី ១០ ទៅ ១៥នាក់ ហើយចែកផ្លូវគ្នាធ្វើដំណើរផ្សព្វផ្សាយនៅតាមផ្សារចំនួន១៥ នៅក្នុងរាជធានីភ្នំពេញ។ ផ្សារទាំងនោះមានដូចជា ផ្សារថ្មី ផ្សារអូឡាំពិក ផ្សារអូរឫស្សី ផ្សារដើមគ ផ្សារទួលទំពូង ផ្សារទួលគោក និងផ្សារសុរិយា ជាដើម។
បន្ទាប់ពីទៅតាមផ្សារ ក្រុមអ្នកផ្សព្វផ្សាយបានទៅប្រមូលផ្តុំគ្នានៅមុខព្រះបរមរាជវាំង នៅម៉ោងប្រមាណ ៤រសៀល។ នៅទីនោះ ពួកគេចែកចាយរូប និមិត្តសញ្ញា ស្ទីកឃ័រ និងអាវយឺតរបស់ពួកគេបន្តទៀត។
ថ្លែងនៅមុខព្រះបរមរាជវាំងនាពេលជួបជុំនោះ សមាជិកនៃក្រុមការងារដើម្បីសន្តិភាព និងជាអ្នកសម្របសម្រួលក្នុងយុទ្ធនាការផ្សព្វផ្សាយនេះ លោក ឈាង ឫទ្ធី ឲ្យដឹងថា ក្នុងយុទ្ធនាការនោះ ក្រុមការងាររបស់លោកដែលមើលទៅឃើញមានពាក់អាវយឺតពណ៌ផ្ទៃមេឃ សរសេរថា យើងរួមគ្នាដើម្បីសន្តិភាព ហើយដែលអ្នកខ្លះថែមទាំងបានបិទស្ទីកឃ័រសន្តិភាពនៅលើថ្ពាល់ទៀតនោះ នាំគ្នាចែកស្ទីកឃ័រ និងអាវយឺតទៅឲ្យពលរដ្ឋដែលនៅលើស្ទីកឃ័រនោះ ឃើញមានរូបសត្វព្រាបពណ៌ស ដែលជានិមិត្តរូបនៃសន្តិភាព និងមានសរសេរអក្សរថា ទិវាសន្តិភាពអន្តរជាតិ និងយើងទាំងអស់គ្នាមានសិទ្ធិទទួលបានសន្តិភាព ជាដើម។
លោក ឈាង ឫទ្ធី ឲ្យដឹងបន្តថា មូលហេតុដែលក្រុមការងាររបស់លោកជ្រើសរើសយកទីផ្សារ ជាកន្លែងផ្សព្វផ្សាយសន្តិភាព ដោយសារផ្សារជាទីប្រមូលផ្តុំរបស់ពលរដ្ឋ និងមានមនុស្សម្នាច្រើន។ ទាក់ទងការផ្សព្វផ្សាយនេះ លោក ឈាង ឫទ្ធី កត់សម្គាល់ថា វាពិតជាមានសារសំខាន់ដែលពលរដ្ឋត្រូវតែយល់ដឹងអំពីអត្ថន័យពិតប្រាកដរបស់សន្តិភាព។
លោក ឈាង ឫទ្ធី៖ «អ្វីដែលយើងចង់ឲ្យគាត់យល់ដឹងថា ថ្ងៃហ្នឹងជាទិវាសន្តិភាពអន្តរជាតិ គឺចង់ឲ្យគាត់យល់ថា តើសន្តិភាពអន្តរជាតិហ្នឹងជាស្អី ហេតុអីបានយើងត្រូវចាំបាច់ចង់បានសន្តិភាពហ្នឹង ហើយអ៊ីចឹងយើងបានពន្យល់ណែនាំខ្លះៗ ហើយគិតថាគាត់នឹងចាប់ផ្ដើមដឹងអំពីអីទៅសន្តិភាព គាត់នឹងចាប់ផ្តើមស្វែងយល់វា គិតថាគាត់មិនទាន់យល់ច្បាស់ ប៉ុន្តែគាត់នឹងព្យាយាម ស្អីទៅសន្តិភាព គាត់ចាប់ផ្ដើមមានចម្ងល់ ហើយយើងបានពន្យល់ខ្លះៗថា សន្តិភាពវាម៉េច ស្ថានភាពបច្ចុប្បន្នយើងមានសន្តិភាពហើយនៅ?»។
បើតាម លោក ឈាង ឫទ្ធី លោកថា ពលរដ្ឋភាគច្រើនគិតថា ឲ្យតែប្រទេសគ្មានជម្លោះ គ្មានសង្គ្រាម នោះមានន័យថា ប្រទេសមានសន្តិភាពពិតប្រាកដហើយ ប៉ុន្តែលោកថា ដើម្បីឲ្យមានសន្តិភាពពិតប្រាកដ លុះណាតែពលរដ្ឋមានសន្តិភាពទាំងខាងផ្លូវកាយ និងផ្លូវចិត្ត។ សម្រាប់ប្រទេសកម្ពុជា វិញ លោក ឈាង ឫទ្ធី យល់ថា ប្រទេសក្រីក្រមួយនេះមិនទាន់មានសន្តិភាពពិតប្រាកដនៅឡើយ ដោយសារតែកម្ពុជា នៅមានបញ្ហាសង្គមជាច្រើន។
លោក ឈាង ឫទ្ធី៖ «យើងមើលពីស្ថានភាពទូទៅរបស់ប្រជាពលរដ្ឋគាត់រស់នៅ នៅមានបញ្ហាច្រើនទាក់ទងជីវភាពរស់នៅរបស់គាត់ អត់មានលក្ខណៈគ្រប់គ្រាន់នៅឡើយទេ ហើយគាត់រស់នៅដោយមានអំពើអយុត្តិធម៌ អំពើពុករលួយ ហើយសិទ្ធិសេរីភាពមួយចំនួនត្រូវបានរឹតត្បិត អត់មានលក្ខណៈពេញលេញ អ៊ីចឹងសន្តិភាពនេះក៏អត់ទាន់មានដែរ គឺសន្តិភាពវានៅមានលក្ខណៈអវិជ្ជមាននៅឡើយទេ ហើយសន្តិភាពវិជ្ជមាន លុះត្រាតែមើលពីជីវភាពរស់នៅរបស់ប្រជាពលរដ្ឋហ្នឹង គាត់មានលក្ខណៈសមរម្យហើយនៅ នៅខ្វះខាតអីទៀត បើគាត់នៅតែស្រេកឃ្លាន ខ្វះខាត ហើយរស់នៅក្នុងភាពភ័យខ្លាច ក៏អត់ទាន់មានសន្តិភាពដែរ»។
លោក ឈាង ឫទ្ធី ឲ្យដឹងដែរថា ក្រៅតែពីមានបំណងផ្សព្វផ្សាយឲ្យពលរដ្ឋបានដឹងអំពីទិវាសន្តិភាពអន្តរជាតិ និងអត្ថន័យពិតប្រាកដរបស់សន្តិភាព និងឲ្យពលរដ្ឋចូលរួមពង្រឹងសន្តិភាពនោះ ក្រុមការងារដើម្បីសន្តិភាព ក៏មានបំណងផ្ញើសារទៅកាន់រដ្ឋាភិបាល និងអ្នកនយោបាយគ្រប់គណបក្សទាំងអស់ ឲ្យពួកគេដឹងអំពីសារសំខាន់របស់សន្តិភាព និងឲ្យពួកគេចូលរួមផ្តល់សិទ្ធិសេរីភាព និងឱកាសឲ្យពលរដ្ឋ ធ្វើយ៉ាងណាដើម្បីឲ្យពលរដ្ឋទទួលបានសន្តិភាពពិតប្រាកដ ទាំងផ្លូវកាយ និងផ្លូវចិត្ត។
លោក ឈាង ឫទ្ធី ថាដើម្បីឲ្យពលរដ្ឋកម្ពុជា ទទួលសន្តិភាពទាំងខាងផ្លូវកាយ និងផ្លូវចិត្តនោះ អ្វីដែលរដ្ឋាភិបាលកម្ពុជា គួរធ្វើនៅពេលនេះ គឺយកចិត្តទុកដាក់ទៅលើកត្តាជីវភាពរបស់ពលរដ្ឋ លុបបំបាត់អំពើពុករលួយ អំពើយុត្តិធម៌នានានៅក្នុងសង្គម និងត្រូវផ្តល់សិទ្ធិសេរីភាពឲ្យប្រជាពលរដ្ឋឲ្យបានពេញលេញ ជាពិសេសសិទ្ធិសេរីភាពក្នុងការបញ្ចេញមតិរបស់ពួកគាត់។
យុទ្ធនាការផ្សព្វផ្សាយអំពីសន្តិភាពនេះ ត្រូវបានក្រុមការងារដើម្បីសន្តិភាព រៀបចំធ្វើឡើងជាប់ៗគ្នាតាំងពីឆ្នាំ២០០៩ មក។ បើតាម លោក ឈាង ឫទ្ធី កាលពីឆ្នាំមុនៗ យុទ្ធនាការរបស់ពួកគេក៏បានធ្វើឡើងនៅតាមបណ្ដាខេត្តមួយចំនួនដែរ។ ដោយឡែកសម្រាប់ឆ្នាំនេះ គឺធ្វើឡើងតែក្នុងរាជធានីភ្នំពេញមួយប៉ុណ្ណោះ ដោយសារតែក្រុមការងារដើម្បីសន្តិភាព យល់ឃើញថា មួយរយៈកន្លងមកនេះ អំពើហិង្សាបានកើតមានឡើងច្រើននៅក្នុងទីក្រុងភ្នំពេញ។
ទិវាសន្តិភាពនេះ ត្រូវបានប្រារព្ធធ្វើឡើងនៅជុំវិញពិភពលោក ដើម្បីរំឭកដល់សេចក្តីប្រកាសមហាសន្និបាតអង្គការសហប្រជាជាតិ ស្ដីពីសិទ្ធិរបស់ពលរដ្ឋក្នុងការទទួលបានសន្តិភាព ហើយដែលប្រធានបទនៅឆ្នាំនេះ គឺផ្ដោតលើសិទ្ធិទទួលបានសន្តិភាពរបស់ពលរដ្ឋតែម្តង។
សេចក្តីប្រកាសស្ដីពីសិទ្ធិរបស់ពលរដ្ឋក្នុងការទទួលបានសន្តិភាពចែងថា ពលរដ្ឋគ្រប់រូបមានសិទ្ធិទទួលបានសន្តិភាព ហើយគ្រប់ប្រទេសទាំងអស់ មានកាតព្វកិច្ចក្នុងការរក្សា និងលើកកម្ពស់សន្តិភាពសម្រាប់ពលរដ្ឋរបស់ខ្លួន។
នៅក្នុងទិវាសន្តិភាពអន្តរជាតិនេះដែរ អគ្គលេខាធិការអង្គការសហប្រជាជាតិ លោក បាន គីមូន (Ban Ki Moon) ថ្លែងឲ្យប្រទេសទាំងអស់ថែរក្សាសន្តិភាពសម្រាប់ពលរដ្ឋ និងអំពាវនាវឲ្យប្រជាជនទាំងអស់នៅលើពិភពលោក ចូលរួមស្មឹងស្មាធិ៍មួយនាទីនាពេលថ្ងៃត្រង់ នៅក្នុងទិវានេះទៀតផង។
អង្គការសហប្រជាជាតិ បានអនុម័តបង្កើតទិវាសន្តិភាពអន្តរជាតិនេះនៅឆ្នាំ១៩៨១ ហើយការប្រារព្ធទិវានេះបានចាប់ផ្តើមពីឆ្នាំ១៩៨២ មក ដោយយកថ្ងៃអង្គារ ក្នុងសប្ដាហ៍ទី៣ ខែកញ្ញា ជារៀងរាល់ឆ្នាំ ប៉ុន្តែមកដល់ឆ្នាំ២០០២ ទើបមានការអនុម័តជាផ្លូវការយកថ្ងៃទី២១ ខែកញ្ញា ជាទិវាសន្តិភាពអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។