ដំណឹងពីខេត្តកំពត ឯណោះវិញ ក្រុមអង្គការសិទ្ធិមនុស្សចំនួន៤ រួមមានអង្គការផ្នែកច្បាប់ផង គ្រោងចុះទៅស៊ើបអង្កេតករណីធ្វើទារុណកម្ម និងរំលោភយកដីប្រជាពលរដ្ឋនៅស្រុកឈូក ពីសំណាក់ឈ្មួញមានអំណាច។ ការចុះស៊ើបអង្កេតនេះ ធ្វើឡើងតាមពាក្យបណ្ដឹងរបស់ពលរដ្ឋដែលបានចោទថា ឈ្មួញពីរនាក់ប្តីប្រពន្ធគំរាមពលរដ្ឋចំនួន ១០០គ្រួសារលក់ដីឲ្យថោកៗ និងវាយធ្វើបាបពលរដ្ឋណាដែលហ៊ានប្រឆាំង។
មន្ត្រីសិទ្ធិមនុស្សអាដហុក (Adhoc) លោក ប៉ែន ប៊ុណ្ណារ៍ ឲ្យដឹងនៅថ្ងៃទី៧ មេសា ថា អង្គការចំនួន ៤ គឺអង្គការអាដហុក គណៈកម្មការប្រព្រឹត្តកម្ម ហៅកាត់ថា ច្រាក (CHRAC) សមាគមខ្មែរកម្ពុជាក្រោម និងការិយាល័យក្រុមអ្នកច្បាប់ការពារសិទ្ធិកម្ពុជា ឬអង្គការ ស៊ីឌីភី (CDP) នឹងធ្វើដំណើរទៅតំបន់អភិវឌ្ឍន៍នៅឃុំត្រពាំងភ្លាំង ស្រុកឈូក ខេត្តកំពត នៅសប្ដាហ៍នេះ ដើម្បីស៊ើបអង្កេតផ្ទាល់ជាមួយជនរងគ្រោះចំពោះការចោទប្រកាន់ករណីទាំងពីរនេះ៖ «យើងទៅមើលទីតាំងដីជាក់ស្ដែង ហើយយើងនឹងសាកសួរប្រជាពលរដ្ឋបន្ថែមទៀត អ្នកដែលចាកចេញហើយជាង ៧០គ្រួសារ ហើយអ្នកនៅ ២០គ្រួសារដែលគាត់ទ្រាំរស់នៅក្នុងដីហ្នឹងដែលទៅអនាគត តាមដែលយើងដឹងថា គាត់នឹងត្រូវបណ្ដេញចេញដែរ ត្រូវទទួលរងការរំលោភយកដីដែរ អ៊ីចឹងយើងទៅជួបពួកគាត់ផ្ទាល់ទាំងអស់ ជាពិសេសយើងទៅពិនិត្យទីតាំង ដែលមានការចោទប្រកាន់ថា មានកាប់រានដីព្រៃប្រហែលជាង ១ពាន់ហិកតារ»។
ការចុះទៅស៊ើបអង្កេតនេះ ធ្វើឡើងតាមពាក្យបណ្ដឹងរបស់ប្រជាពលរដ្ឋដែលបានចោទប្រកាន់ថា មានឈ្មួញមានខ្នងបង្អែកអ្នកធំ នៅពីក្រោយខ្នងពីរនាក់ប្តីប្រពន្ធ ឈ្មោះ អាំ ផល្លីន ជាប្ដី និងប្រពន្ធឈ្មោះអ្នកស្រី ហ៊ាង គន្ធី បានគំរាមប្រជាពលរដ្ឋចំនួន ១០០គ្រួសារឲ្យលក់ដីឲ្យថោកៗ និងបានវាយធ្វើបាបប្រជាពលរដ្ឋណាដែលហ៊ានក្រោកឈរប្រឆាំង។ ប្រជាពលរដ្ឋអះអាងថា ឈ្មួញពីរនាក់ប្ដីប្រពន្ធ បានទៅគំរាមធ្វើបាបពួកគាត់អស់ជាច្រើនឆ្នាំមកហើយ តែមិនមានអាជ្ញាធរណាហ៊ានចេញមុខដោះស្រាយ។
ក្រៅពីនេះ ប្រជាពលរដ្ឋមួយចំនួនបានប្ដឹងចោទប្រកាន់លោក អាំ ផល្លីន និងអ្នកស្រី ហ៊ាង គន្ធី ដែលពួកគាត់អះអាងថា ជាប្រឹក្សាប្រធានរដ្ឋសភា និងប្រធានព្រឹទ្ធសភានោះ ថាបានរំលោភយកដីរដ្ឋនៅតំបន់នោះជាង ១ពាន់ហិកតារថែមទៀតផង។
លោក ហេង សឿន ប្រជាពលរដ្ឋម្នាក់ដែលដាក់ពាក្យបណ្ដឹងទៅតុលាការខេត្តកំពត ប្ដឹងឈ្មួញពីរនាក់ប្ដីប្រពន្ធថា អ្នកមានអំណាចបានធ្វើទារុណកម្មលើខ្លួនគាត់ ព្រោះគាត់មិនព្រមលក់ដីឲ្យនោះ បានសម្ដែងការភ័យខ្លាច មិនហ៊ានត្រឡប់ទៅផ្ទះវិញទេ ព្រោះខ្លាចគេវាយធ្វើបាបទៀត៖ «អត់ទាន់បានទេ លុះត្រាធ្វើការចេញចាប់ពួកវាបានទើបខ្ញុំហ៊ានចូលទៅនៅបាន។ ឥឡូវពួកវានៅកំពុងស៊ីផឹកនៅកន្លែងដីសម្បទានសង្គមកិច្ចនៅពេញហ្នឹងទាំងអស់គ្នាបួនដប់នាក់ហ្នឹងណា។ បាទ! ហើយការឈូសឆាយដីហ្នឹងវាផ្អាកហើយ ផ្អាកសកម្មភាពហើយ អ៊ីចឹងវាបង្កើនការស៊ីផឹកវិញ»។
វិទ្យុអាស៊ីសេរីមិនអាចទាក់ទងលោក អាំ ផល្លីន និងអ្នកស្រី ហ៊ាង គន្ធី បាននៅថ្ងៃទី៧ មេសា ដើម្បីផ្ដល់ឱកាសឆ្លើយតបទៅនឹងការចោទប្រកាន់នេះ។
ចំណែកមេឃុំត្រពាំងភ្លាំង លោក ហ៊ឹម យូខើន បានផ្ដាច់ទូរស័ព្ទនៅពេលវិទ្យុអាស៊ីសេរី សាកសួរព័ត៌មានអំពីករណីរំលោភបំពានទាំងនេះ។ រីឯអធិការប៉ូលិសស្រុកឈូក លោក សំរិទ្ធ សីលាវិបុល ឆ្លើយថា លោកមិនបានដឹងរឿងនោះទេ ព្រោះលោកបានសុំច្បាប់សម្រាកព្យាបាលជំងឺយូរហើយ។
បើតាមប្រភពពីប្រជាពលរដ្ឋនៅឃុំត្រពាំងភ្លាំង ក្រុមមន្ត្រីអង្គការសិទ្ធិមនុស្សដែលចុះទៅស៊ើបអង្កេតផ្ទាល់លើកនេះ បានប្រាប់ឲ្យដឹងជាមុនថា ពួកគេនឹងអាចប្រឈមគ្រោះថ្នាក់ដោយសារមានការរារាំងពីក្រុមមនុស្សរបស់ឈ្មួញទិញដីដែលកន្លងមកធ្លាប់បាញ់ចម្ពាមកៅស៊ូ ឬប្រើវិធីផ្សេងៗ ដើម្បីរារាំងស្ទាក់ផ្លូវមន្ត្រីមួយចំនួនដែលព្យាយាមចូលទៅទីតាំងទំនាស់ដីនៅតំបន់ព្រៃដាច់ស្រយាលនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។