មន្ត្រីសម្របសម្រួលសមាគមអាដហុក ប្រចាំខេត្តកំពង់ឆ្នាំង បញ្ជាក់ជំហរនៅថ្ងៃទី១៩ ខែសីហា ថា ខ្លួននឹងចូលទៅបំភ្លឺតាមលិខិតរបស់តុលាការ។
មន្ត្រីសម្របសម្រួលសមាគមអាហុក (Adhoc) ប្រចាំខេត្តកំពង់ឆ្នាំង លោក សំ ច័ន្ទគា ត្រូវបានតំណាងអយ្យការនៃសាលាដំបូងខេត្តកំពង់ឆ្នាំង អញ្ជើញឲ្យចូលខ្លួនទៅបំភ្លឺ បន្ទាប់ពីធ្វើសន្និសីទកាសែតមួយទាក់ទងនឹងចំណាត់ការរបស់តុលាការក្នុងរឿងក្ដីបៀតបៀនកេរ្តិ៍ភេទ និងរំលោភសេពសន្ថវៈកាលពីពេលកន្លងទៅ។
លោក សំ ច័ន្ទគា មានប្រសាសន៍ថា លោកនឹងចូលទៅបំភ្លឺតាមដីកា ពីព្រោះលោកយល់ថា ការធ្វើសន្និសីទកាសែតកន្លងទៅវាមិនមែនជាកំហុស ឬមានភាពភ័យខ្លាចដែលត្រូវគេចវេះមិនឆ្លើយបំភ្លឺនោះទេ៖ «ខ្ញុំអត់ដែលមានការភ័យខ្លាចទេ ពីព្រោះរឿងដីកាកោះនេះមិនមែនជាលើកទី១ ដែលយើងធ្លាប់តុលាការកោះហៅហ្នឹងច្រើនលើកមកហើយ យើងមិនដឹងថា តើព្រះរាជអាជ្ញាគាត់កោះហៅហ្នឹងយើងមានកំហុសអ្វីនោះទេ ការធ្វើសន្និសីទកាសែត គឺជាសិទ្ធិសេរីភាពដែលមាននៅក្នុងរដ្ឋធម្មនុញ្ញហើយ អ៊ីចឹងបែរជាគាត់កោះហៅឲ្យឆ្លើយបំភ្លឺរឿងហ្នឹងវិញ ហើយយើងមានការងឿងឆ្ងល់ដែរ»។
ព្រះរាជអាជ្ញាអមសាលាដំបូងខេត្តកំពង់ឆ្នាំង លោក ពេញ វិបុល បានពន្យល់អំពីការកោះអញ្ជើញមន្ត្រីសមាគម និងអ្នកសារព័ត៌មានជាតិឲ្យចូលទៅសាលាដំបូងនៅព្រឹកថ្ងៃទី២២ សីហា ថា គ្រាន់តែចង់ឲ្យមន្ត្រី និងអ្នកសារព័ត៌មានទាំងអស់សិក្សាដំណើររឿងឲ្យបានច្បាស់លាស់មុននឹងធ្វើសន្និសីទកាសែត និងចុះផ្សាយព័ត៌មាន៖ «គ្រាន់តែហៅមកដើម្បីបញ្ជាក់ឲ្យអង្គការអាដហុក ទាំងលីកាដូ ទាំងអង្គការខ្មែរកម្ពុជាក្រោម និងអ្នកសារព័ត៌មានទាំងអស់មុននឹងធ្វើសន្និសីទសារព័ត៌មាន ឬក៏ចុះផ្សព្វផ្សាយព័ត៌មានសូមឲ្យសាកសួរអ្នកដែលគេកាន់រឿងនេះឲ្យបានជាមុនសិនមុននឹងលោកយកទៅផ្សាយព័ត៌មាន ព្រោះថាធ្វើកាលណាលោកអត់សួរគេនិយាយទៅវាប៉ះពាល់ដល់កិត្តិយសរបស់គេ»។
លោកបញ្ជាក់ថា លោកបានអញ្ជើញមន្ដ្រីសមាគម និងអ្នកសារព័ត៌មានជាតិជិត ២០នាក់ ក្នុងនោះមាន លោក សំ ច័ន្ទគា មន្ត្រីសមាគមអាហុក (Adhoc) លោក គង់ ចាន់មុនី មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) លោក ទត គឹមស្រូយ ប្រធានសមាគមខ្មែរកម្ពុជាក្រោម និងប្រធានមន្ទីរព័ត៌មានខេត្តកំពង់ឆ្នាំង ព្រមទាំងអ្នកសារព័ត៌មានជាតិជាច្រើននាក់ទៀត។
ទាក់ទងនឹងបញ្ហានេះ ប្រធានសមាគមអាហុក លោក នី ចរិយា មានប្រសាសន៍ថា ករណីនេះ គឺជារឿងថ្មី ហើយចម្លែកសម្រាប់លោក ព្រោះថា ប្រសិនបើមន្ត្រីសមាគមអាដហុក ធ្វើសន្និសីទកាសែតមិនពិត តំណាងអយ្យការអាចធ្វើការប្ដឹងផ្ដល់បាន ក៏ប៉ុន្តែគ្រប់ករណី ដែលសមាគមធ្វើសន្និសីទកាសែតសុទ្ធតែបានប្រមូលព័ត៌មានច្បាស់លាស់៖ «ព្រះរាជអាជ្ញាពិនិត្យទៅលើកំហុសឆ្គងរបស់ខ្លួនដែលកន្លងមកបានអនុវត្តខុស ខ្ញុំចង់ជម្រាបដែរថា នៅក្នុងតុលាការកំពង់ឆ្នាំងនេះ មិនត្រឹមតែមានកំហុសឆ្គងតិចតួចប៉ុណ្ណឹងទេ គឺមានរហូតទៅដល់ធ្វើឲ្យបាត់សំណុំរឿងព្រហ្មទណ្ឌដែលសមាគមអាដហុក យើងបានដាក់ប្ដឹងការពារក្ដីឲ្យជនរងគ្រោះទៀត ហើយមកដល់ពេលនេះតុលាការមិនទាន់បានរកឃើញសំណុំរឿងហ្នឹងមកវិញទេ»។
លោក នី ចរិយា បញ្ជាក់ថា ការធ្វើសន្និសីទការនេះ គឺគ្រាន់តែបង្ហាញអំពីការអាក់ខាន ឬការខ្វះខាតរបស់តុលាការខេត្តកំពង់ឆ្នាំង ដែលពុំបានចាត់វិធានការឲ្យបានត្រឹមត្រូវ ទៅលើករណីព្រហ្មទណ្ឌមួយចំនួន ហើយការធ្វើសន្និសីទសារព័ត៌មាននោះមានភាពមិនច្បាស់លាស់យ៉ាងណា តំណាងអយ្យការគួរធ្វើការពន្យល់បកស្រាយជុំវិញករណីទាំងនោះ ជាជាងហៅមន្ត្រីសមាគមទៅបកស្រាយខ្លឹមសារនៃសន្និសីទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។