ប្រធានអង្គការសិទ្ធិមនុស្សលីកាដូ បានលុបចោលគម្រោងចែកអំណោយឲ្យស្ត្រីរស់នៅក្នុងពន្ធនាគារចំនួន ៣ ភ្លាមៗ នៅថ្ងៃទិវានារីអន្តរជាតិ ៨ មីនា បន្ទាប់ពីក្រសួងមហាផ្ទៃ បានកម្រិតចំនួនមនុស្សមិនឲ្យលើសពី ៥នាក់ចូលទៅចែកអំណោយ។
លោកស្រី ពុង ឈីវកេក ប្រធានអង្គការលីកាដូ ប្រាប់ថា លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ បានផ្ញើលិខិតមួយមកលោកស្រីកាលពីថ្ងៃទី៥ មីនា ដោយអនុញ្ញាតឲ្យចូលទៅចែកអំណោយដល់ស្ត្រីក្នុងពន្ធនាគារជាង ៤០០នាក់ ក្នុងពន្ធនាគារ ម.២។ប៉ុន្តែឲ្យចូលមិនលើសពី ៥នាក់ ដោយមិនបានបញ្ជាក់ពីមូលហេតុច្បាស់លាស់។
លោកស្រីបន្តថា ក្រុមការងារនិងម្ចាស់ជំនួយបានសម្រេចលុបចោលគម្រោងចែកអំណោយឲ្យស្ត្រីក្នុងពន្ធនាគារ ម.២ ពន្ធនាគាររាជធានីភ្នំពេញ ប៉េហ្ស៊ី (PJ) និងពន្ធនាគារនៅតាខ្មៅ បន្ទាប់ពីម្ចាស់ជំនួយខកចិត្តដែលពួកគេមិនអាចទៅចូលទៅចែកអំណោយបាន។
លោកស្រី ពុង ឈីវកេក ប្រាប់ថា រយៈពេលជាង ២០ឆ្នាំហើយ ដែលអង្គការមួយនេះតែងត្រូវក្រសួងមហាផ្ទៃ អនុញ្ញាតឲ្យក្រុមការងារជាង ២០នាក់ ចូលក្នុងពន្ធនាគារដើម្បីចែកអំណោយខ្លះៗ ដល់ស្រ្តីនិងកុមារក្នុងថ្ងៃទិវានារីអន្តរជាតិ ដែលកំពុងរស់នៅក្នុងពន្ធនាគារ។ ប៉ុន្តែនៅឆ្នាំនេះ ខាងពន្ធនាគារហាក់មានការរឹតត្បិតមនុស្សចូលទៅទីនោះប្លែកជាងរាល់ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។