ប្រជាពលរដ្ឋមួយគ្រួសារនៅឃុំចុងជាច ស្រុកតំបែរ ខេត្តត្បូងឃ្មុំ ឲ្យដឹងថា សមាជិកគ្រួសាររបស់ពួកគេម្នាក់កំពុងជាប់ពន្ធនាគារនៅប្រទេសថៃ។ ពួកគេបាននាំគ្នាសុំកិច្ចអន្តរាគមន៍នៅសមាគមអាដហុក (ADHOC) និងស្នើទៅអាជ្ញាធរពាក់ព័ន្ធ ជួយអន្តរាគមន៍ករណីនេះដើម្បីបានបងប្រុសត្រឡប់មកស្រុកកំណើតវិញ។ មន្ត្រីសមាគមអាដហុក បញ្ជាក់ថា ពួកគាត់នឹងប្រមូលព័ត៌មានឲ្យបានគ្រប់គ្រាន់ ដើម្បីងាយស្រួលចាត់វិធានការលើករណីនេះ។
សាច់ញាតិពលរដ្ឋម្នាក់ដែលជាប់ពន្ធនាគារនៅប្រទេសថៃ ស្នើឲ្យអង្គការសង្គមស៊ីវិល និងអាជ្ញាធរជួយអន្តរាគមន៍ដើម្បីបានសាច់ញាតិរបស់ពួកគាត់ត្រឡប់មកស្រុកកំណើតវិញ។ ការស្នើសុំនេះ ក្រោយពេលពួកគេដឹងថា លោក ហោ ហេន អាយុ ៥៨ឆ្នាំ កំពុងជាប់ពន្ធនាគារនៅខេត្តរ៉ាក់យ៉ង់ ប្រទេសថៃ ក្រោយពីបាត់ដំណឹងជាច្រើនឆ្នាំ។
ពលរដ្ឋនៅឃុំចុងជាច លោក ហោ ជ្រឿន ឲ្យដឹងថា បងប្រុសរបស់លោកឈ្មោះ ហោ ហេន អាយុ ៥៨ឆ្នាំ បានចេញទៅធ្វើការងារនៅប្រទេសថៃ តាំងពីឆ្នាំ១៩៩៦។ លោកបន្តថា តាំងពីចេញទៅធ្វើការងារមួយរយៈពេលក្រោយមក ក៏បាត់ដំណឹងសូន្យឈឹង ប៉ុន្តែថ្មីៗនេះមានអ្នកភូមិក្បែរខាងប្រាប់ថា គេបានឃើញលោក ហោ ហេន ជាប់ពន្ធនាគារនៅប្រទេសថៃ គ្រាន់តែពួកគេមិនបានដឹងថា ជាប់គុកដោយសាររឿងអ្វី ហើយជាប់ប៉ុន្មានឆ្នាំនោះទេ។ ប្រភពដដែលបន្ថែមទៀតថា ក្រោយពីដឹងបែបនេះភ្លាម ក្រុមគ្រួសារក៏បាននាំគ្នាសុំកិច្ចអន្តរាគមន៍នៅសមាគមអាដហុក ហើយគ្រោងនឹងប្ដឹងទៅអាជ្ញាធរពាក់ព័ន្ធថែមទៀតផង៖ « ខ្ញុំសុំឲ្យមន្ត្រីសមត្ថកិច្ចហ្នឹងជួយរកបងខ្ញុំ ឲ្យបានឃើញអ៊ីចឹងបងណា៎ ! ព្រោះខ្ញុំម៉េចម៉ាឲ្យដឹងដំណឹង ឲ្យគេជួយដោះស្រាយឲ្យអ៊ីចឹងបង »។
កាលពីខែកញ្ញា ឆ្នាំ២០១៦ មានពលរដ្ឋជិត ១០គ្រួសារនៅស្រុកតំបែរ ដែលបានចាញ់បោកមេខ្យល់ទៅធ្វើការងារនៅប្រទេសម៉ាឡេស៊ី ហើយក៏បាននាំគ្នាមកសុំកិច្ចអន្តរាគមន៍នៅសមាគមអាដហុកដែរ។ ក្នុងចំណោមពលការិនីជិត ១០នាក់ដែលចាញ់បោកមេខ្យល់ទៅធ្វើការនៅប្រទេសម៉ាឡេស៊ី ទាំងនោះ គឺមានម្នាក់ជាប់ពន្ធនាគារនៅប្រទេសថៃ ប៉ុន្តែក្រោយពេលមានកិច្ចអន្តរាគមន៍ពីមន្ត្រីសមាគមអាដហុក ទៅមេខ្យល់ ព្រមទាំងស្ថាប័នពាក់ព័ន្ធ គឺពលការិនីម្នាក់ដែលជាប់ពន្ធនាគារនៅប្រទេសថៃ និងពលការិនីពីរនាក់ផ្សេងទៀត បានវិលត្រឡប់មកប្រទេសកម្ពុជា វិញកាលពីពេលថ្មីៗនេះ។
ទាក់ទងបញ្ហានេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មានប្រសាសន៍ថា ខាងលោកនឹងប្រមូលព័ត៌មានឲ្យបានគ្រប់គ្រាន់ ហើយនឹងទាក់ទងទៅស្ថានទូត ឬស្ថានកុងស៊ុលកម្ពុជា នៅប្រទេសថៃ ធ្វើយ៉ាងណាឲ្យក្រុមគ្រួសារបានជួបអ្នកជាប់ឃុំនៅក្នុងខេត្តរ៉ាក់យ៉ង់ ដើម្បីប្រាកដថាអ្នកជាប់ឃុំ គឺបណ្ដាលមកពីមូលហេតុអ្វី និងត្រូវចាត់វិធានការដោយវិធីណា៖ « ប្រមូលព័ត៌មានទាក់ទងគាត់ជាប់គុកហ្នឹងឲ្យបានសិន ដើម្បីបានយើងអន្តរាគមន៍។ បើសិនគាត់ជាប់ទោសដូចរឿងមុនៗ គ្រាន់តែធ្វើដំណើរឆ្លងកាត់ គ្រាន់តែប៉ាសស្ព័រលើស ឬគ្រាន់តែប៉ាសស្ព័រមិនមែនជាប៉ាសស្ព័រការងារ ជាប៉ាសស្ព័រទេសចរណ៍បែរជាទៅធ្វើការងារ អាហ្នឹងអត់អីទេ រឿងអ៊ីចឹងៗលឿនទេ »។
របាយការណ៍សង្ខេបរបស់សមាគមអាដហុក ស្ដីពីពលរដ្ឋនៅខេត្តត្បូងឃ្មុំ ចំណាកស្រុកដោយខុសច្បាប់ គិតពីខែមករា ឆ្នាំ២០១៦ ដល់ថ្ងៃទី៩ ខែតុលា គឺមានចំនួន ២៣នាក់ ក្នុងនោះស្រី ៩នាក់។ ពួកគេចំណាកស្រុកទៅប្រទេសម៉ាឡេស៊ី ច្រើនជាងគេ បន្ទាប់មកប្រទេសចិន និងចុងក្រោយប្រទេសថៃ។ ក្នុងចំណោមពលករចំនួន ២៣នាក់ គឺបានវិលត្រឡប់មកស្រុកកំណើតចំនួន ៨នាក់ ហើយស្រីមានចំនួន ៣នាក់។ ចំណែកអ្នកជាប់ពន្ធនាគារវិញមានចំនួន ១០នាក់ ហើយដោះលែងមកវិញបានម្នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។