គ្រួសារពលករចំណាកស្រុកទៅប្រទេសថៃ កំពុងតែរកកិច្ចអន្តរាគមន៍ដើម្បីនាំយកប្រពន្ធ និងកូននៅប្រទេសថៃនោះ ឲ្យត្រឡប់មកប្រទេសកម្ពុជាវិញ។ ទន្ទឹមនេះ ក្រុមគ្រួសារដដែលនេះបានចោទ ក្រុមហ៊ុននាំពលករទៅប្រទេសថៃ មួយឈ្មោះ មជ្ឈមណ្ឌល អឹម.ស៊ី (MC) ពីបទឆបោកពួកគាត់។
ចំណែកឯមន្ត្រីជាន់នៃមន្ទីរការងារ និងបណ្ដុះបណ្ដាលវិជ្ជាជីវៈ ខេត្តព្រៃវែង ឲ្យដឹងថា គ្រួសារជនរងគ្រោះគួរតែទៅដាក់ពាក្យបណ្ដឹងទៅមន្ទីរដើម្បីឲ្យមន្ត្រីជំនាញចាត់ការតាមនីតិវិធីចំពោះក្រុមហ៊ុន ប្រសិនបើប្រព្រឹត្តល្មើសដូចការចោទប្រកាន់នោះ។
គ្រួសារពលករចំណាកស្រុកទៅធ្វើការនៅប្រទេសថៃ បានឲ្យដឹងថា ក្រុមហ៊ុនដែលនាំពលករទៅធ្វើការនៅប្រទេសថៃ មួយឈ្មោះមជ្ឈមណ្ឌល អឹម.ស៊ី បានបោកប្រាស់យកប្រាក់របស់ពួកគាត់អស់ជិត ២ពាន់ (១.៩០០) ដុល្លារអាមេរិក ជាថ្នូរនឹងការនាំសមាជិកគ្រួសាររបស់គាត់ ៤នាក់ ទៅធ្វើការនៅប្រទេសថៃ។
លោក ជា ឆុន រស់នៅភូមិពន្លៃ ឃុំបាបោង ស្រុកពាមរក៍ ខេត្តព្រៃវែង អះអាងថា ជាអ្នកចាញ់បោកក្រុមហ៊ុននោះ បានថ្លែងថា ភរិយានិងកូនប្រុសម្នាក់បានទៅដល់ប្រទេសថៃ ប៉ុន្តែមិនមានការងារពិតប្រាកដធ្វើដូចការអះអាងរបស់ក្រុមហ៊ុនដែលមកបញ្ចុះបញ្ចូលនោះទេ៖ «គ្រួសារខ្ញុំទៅថៃ ពីដំបូងក្រុមហ៊ុនអះអាងថា បានមួយថ្ងៃ ៣០០បាតប្រាក់ថៃ ហើយថែមម៉ោង ១ម៉ោង ៥៥បាត។ ខ្ញុំប្រុងទៅ ៤នាក់ ទាំងកូនប្រពន្ធ និងខ្ញុំ សរុបទៅអស់ ១.៩០០ដុល្លារ តែទើបតែទៅបានប្រពន្ធ និងកូន។ តែលិខិតឆ្លងដែនរបស់ប្រពន្ធ និងកូនខ្ញុំ គឺជាទិដ្ឋាការឆ្លងដែនបែបទេសចរណ៍ មិនអាចរកការងារបានទេ ហើយកំណត់បាន ២សប្ដាហ៍មិនអាចរកការងារបានធ្វើទៀត»។
លោកបន្ថែមទៀតថា ភរិយានិងកូនប្រុសរបស់គាត់ ព្រមទាំងពលករជនជាតិខ្មែរ ៨នាក់ផ្សេងទៀតត្រូវគេបញ្ជូនទៅក្បែរព្រំដែនប្រទេសមីយ៉ាន់ម៉ា ឬ ភូមា ប៉ុន្តែបច្ចុប្បន្ននេះកំពុងរត់គេចខ្លួនពីការតាមចាប់របស់សមត្ថកិច្ចថៃ ដើម្បីមកកាន់ប្រទេសកម្ពុជាវិញ។
វិទ្យុអាស៊ីសេរី មិនទាន់អាចទាក់ទងប្រធានផ្នែកផ្នែកផ្សព្វផ្សាយ ជ្រើសរើសពលកររបស់មជ្ឈមណ្ឌល អឹម.ស៊ី នេះបាននៅឡើយទេ ដោយលេខទូរស័ព្ទទាំង ៣ខ្សែរបស់ប្រធានផ្នែកនេះនៅក្រៅតំបន់សេវាទាំងអស់។
ទោះយ៉ាងណាប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តព្រៃវែង លោក ហែម ហឿន មានប្រសាសន៍ថា សុំឲ្យគ្រួសាររងគ្រោះដាក់ពាក្យប្ដឹងមកមន្ទីរការងារ ដើម្បីឲ្យមន្ត្រីជំនាញចាត់វិធានការចំពោះក្រុមហ៊ុនដែលនាំពលករនោះទៅតាមច្បាប់ ដោយមិនទុកយូរឡើយ៖ «ដាក់បណ្ដឹងមកខាងមន្ទីរមក នោះមន្ទីរនឹងចុះទៅស្រាវជ្រាវ ហើយមើលថា ក្រុមហ៊ុននោះស្របច្បាប់ ឬមិនស្របច្បាប់។ បើគាត់មិនស្របច្បាប់នោះសមត្ថកិច្ចប៉ូលិសនឹងធ្វើការ ដោយដាក់ពាក្យបណ្ដឹងទៅខាងប៉ូលិសវិញ ព្រោះខេត្តព្រៃវែង មានគណៈកម្មការប្រយុទ្ធប្រឆាំងការជួញដូរមនុស្សនោះយើងអន្តរាគមន៍ទៅខាងជំនាញគេវិញ។ តែបើក្រុមហ៊ុនស្របច្បាប់នោះ មន្ទីរនឹងហៅក្រុមហ៊ុននោះ មកឆ្លើយបំភ្លឺលើករណីហ្នឹង»។
លោកបានបញ្ជាក់ទៀតថា កាលពីឆ្នាំ២០១៣ មន្ទីរការងារខេត្តព្រៃវែង បានដោះស្រាយបញ្ហាពលករចំណាកស្រុកបានប្រហែល ១០០នាក់ ហើយឆ្នាំ២០១៤ ដោះស្រាយបានជិត ៣០០នាក់។ ការកើនឡើងនេះគឺដោយសារតែប្រជាពលរដ្ឋបានយល់ដឹងពីច្បាប់ និងសុវត្ថិភាពចំពោះការធ្វើចំណាកស្រុក។
អ្នកសម្របសម្រួលអង្គការអាដហុក (Adhoc) ប្រចាំខេត្តព្រៃវែង គឺអ្នកស្រី អ៊ាង គឹមលី ថ្លែងថា ពលរដ្ឋនៅក្នុងខេត្តព្រៃវែង ហាក់ងាយរងគ្រោះមេខ្យល់ ឬក្រុមហ៊ុនដែលអូសទាញថា នៅប្រទេសថ មានការងារសម្បូរ ឬប្រាក់ខែច្រើនជាដើម ហើយក្រុមហ៊ុនខ្លះទៀតដែលទំនងស្របច្បាប់នោះគឺបន្លំធ្វើទិដ្ឋាការឆ្លងដែនរបៀបទេសចរណ៍ឲ្យពួកគាត់ទៅវិញ៖ «នៅពេលដែលពួកគាត់ទៅមិនអាចរកការងារធ្វើផង ដោយមានគេចាប់បញ្ជូនមកវិញ។ ករណីនេះខ្ញុំគិតថា អាជ្ញាធរគួរតែពិនិត្យមើលក្រុមហ៊ុនដែលផ្សព្វផ្សាយ ជ្រើសរើសឬនាំពលករទៅប្រទេសថៃ នោះ ដើម្បីជាសវាងកំឲ្យពលករខ្មែរត្រូវបានក្រុមហ៊ុនបោកប្រាស់ ដោយធ្វើឲ្យពួកគាត់មានស្ថានភាពកាន់តែធ្ងន់ធ្ងរទៅ ព្រោះនៅពេលដែលពួកគាត់ចេញទៅរកការងារ គឺត្រូវខ្ចីលុយ ចងការប្រាក់គេ តែដល់ជួបស្ថានភាពជាក់ស្ដែងមិនដូចការរំពឹងរបស់គាត់ទេ»។
ប្រជាពលរដ្ឋខេត្តព្រៃវែង ប្រហែល ៤ម៉ឺននាក់បានចេញធ្វើចំណាកស្រុកទៅរកការងារទៅក្រៅប្រទេស ហើយជាង ១៨ម៉ឺននាក់បានចេញរកការងារធ្វើនៅក្នុងស្រុក ក្នុងចំណោមពលរដ្ឋទូទាំងខេត្តនេះសរុបប្រមាណជាង ១លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។