សង្គមស៊ីវិលដែលធ្វើការឃ្លាំមើលការគោរពសិទ្ធិមនុស្ស រកឃើញអំពើនិទ្ទណ្ឌភាពនៅកម្ពុជា នៅតែមានចំនួនកើនឡើងគួរឲ្យព្រួយបារម្ភ។
ទាក់ទងបញ្ហានេះ មជ្ឈមណ្ឌលសិទ្ធិមនុស្សកម្ពុជា (CCHR) បាននាំញត្តិ និងសាររូបភាពរបស់ប្រជាពលរដ្ឋជិត ៣០០សន្លឹក ទៅប្រគល់ជូនរដ្ឋមន្ត្រីក្រសួងយុត្តិធម៌ ដើម្បីឲ្យជួយដោះស្រាយ។ ញត្តិ និងសាររូបភាពទាំងនោះ អំពាវនាវឲ្យបញ្ចប់និទ្ទណ្ឌភាព ឬភាពគ្មានទោសពៃរ៍នៅកម្ពុជា។
មន្ត្រីជាន់ខ្ពស់ក្រសួងយុត្តិធម៌ តំណាងឲ្យលោករដ្ឋមន្ត្រី អង្គវង្ស វឌ្ឍនា បានស្វាគមន៍ទទួលយកញត្តិពីមន្ត្រីមជ្ឈមណ្ឌលសិទ្ធិមនុស្សកម្ពុជា ដោយរីករាយ ព្រមទាំងបង្ហាញឆន្ទៈក្នុងការចូលរួមលុបបំបាត់អំពើនិទ្ទណ្ឌភាពនេះ។ ការថ្លែងបែបនេះ នៅក្នុងជំនួបទទួលញត្តិពីមន្ត្រីសិទ្ធិមនុស្សកាលពីថ្ងៃច័ន្ទ ទី២ ធ្នូ។
នាយិកានៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បង្ហាញថា ក្នុងកញ្ចប់ញត្តិនោះរួមមានសេចក្តីសង្ខេបវិភាគនូវបញ្ហាដែលនាំឲ្យកើតឡើងនូវនិទ្ទណ្ឌភាព និងមានភ្ជាប់នូវករណីជាក់ស្តែងមួយចំនួន ដូចជាករណីអតីតអភិបាលក្រុងបាវិត លោក ឈូក បណ្ឌិត ដែលបានបាញ់កម្មការិនី ៣នាក់ឱ្យរបួស ប៉ុន្តែតុលាការនៅមិនទាន់នាំខ្លួនជនដៃដល់មកផ្ដន្ទាទោសតាមច្បាប់នៅឡើយ និងលោក ជា វិជ្ជា លោក ឈុត វុទ្ធី ជាពិសេសការបង្ក្រាបបាតុកម្មដោយហិង្សានៅផ្លូវវ៉េងស្រេង កាលពីដើមខែមករា ឆ្នាំ២០១៤ រហូតមកដល់ពេលនេះ មានតែភាគីសហជីព និងកម្មករទេដែលត្រូវបានតុលាការកោះហៅសាកសួរលើបទចោទប្រកាន់ និងចាប់ឃុំខ្លួនក្នុងពន្ធនាគារ ចំណែកភាគីកងកម្លាំងប្រដាប់អាវុធដែលជាអ្នកបង្ក្រាប និងអ្នកពាក់ព័ន្ធផ្សេងទៀត មិនត្រូវបានគេស៊ើបអង្កេតឡើយ។
ករណីទាំងនេះ មជ្ឈមណ្ឌលសិទ្ធិមនុស្សកម្ពុជា ស្នើឲ្យមានការស៊ើបអង្កេតទៅលើភាគីពាក់ព័ន្ធទាំងអស់ដោយស្មើភាពគ្នា៖ «មជ្ឈមណ្ឌលសិទ្ធិមនុស្សកម្ពុជា ចង់អំពាវនាវឲ្យលុបបំបាត់វប្បធម៌និទ្ទណ្ឌភាពក្នុងប្រព័ន្ធយុត្តិធម៌ ហើយស្នើឲ្យមានការស៊ើបអង្កេតករណីដែលកើតឡើង»។
ញត្តិរបស់ពលរដ្ឋជាច្រើន បានទាមទារឲ្យក្រសួងយុត្តិធម៌ និងស្ថាប័នពាក់ព័ន្ធរបស់រដ្ឋាភិបាល ចាត់វិធានការឲ្យមានប្រសិទ្ធភាពក្នុងការបញ្ចប់អំពើនិទ្ទណ្ឌភាពក្នុងសង្គម។
មជ្ឈមណ្ឌលសិទ្ធិមនុស្សកម្ពុជា ក៏ពិនិត្យឃើញថា រហូតមកដល់ពេលនេះ បញ្ហានិទ្ទណ្ឌភាពមិនត្រូវបានថយចុះទេ ហើយនៅបរិបទចុងក្រោយនេះ បញ្ហាដដែលរឹតតែធ្វើឲ្យមានក្តីព្រួយបារម្ភទ្វេឡើងថែមទៀត៖ «យើងសង្ឃឹមថានឹងមានការស៊ើបអង្កេតមួយពិតប្រាកដ ដើម្បីធានាថា ជនល្មើសនឹងត្រូវបាននាំមកផ្ដន្ទាទោស បើសិនជានៅបន្តវប្បធម៌និទ្ទណ្ឌភាពនេះ នឹងបង្កការភ័យខ្លាចដល់ពលរដ្ឋ»។
ការដាក់ញត្តិ និងសាររូបភាពរបស់ប្រជាពលរដ្ឋទៅក្រសួងយុត្តិធម៌ ពេលនេះ ធ្វើឡើងបន្ទាប់ពីមជ្ឈមណ្ឌលសិទ្ធិមនុស្សកម្ពុជា ធ្វើយុទ្ធនាការប្រឆាំងនិទ្ទណ្ឌភាពនៅកម្ពុជា ដោយទទួលសារពីពលរដ្ឋគ្រប់មជ្ឈដ្ឋាន។ ចាប់តាំងពីដើមខែវិច្ឆិកា រហូតមកដល់ដើមខែធ្នូ នេះ មានមនុស្សចំនួន ២៦៣នាក់ បានថតរូបរបស់ខ្លួនដោយមានកាន់ភ្ជាប់នូវសារ «សូមបញ្ចប់និទ្ទណ្ឌភាពនៅកម្ពុជា» ផ្ញើមកកាន់អង្គការឃ្លាំមើលសិទ្ធិមនុស្សមួយនេះ។
ទាក់ទងបញ្ហានេះដែរ មន្ត្រីជាន់ខ្ពស់នៃអង្គការអាដហុក (adhoc) លោក នី ចរិយា មានប្រសាសន៍ថា អំពើនិទ្ទណ្ឌភាពក្នុងឆ្នាំ២០១៤ នេះ អង្គការលោករកឃើញថាមានចំនួនកើនឡើងប្រមាណ ៥០% លើសពីឆ្នាំ២០១៣ កន្លងទៅ៖ «បញ្ហានេះកើតឡើងមានច្រើនរូបភាពណាស់ មានទាំងអំពើពុករលួយ មន្ត្រីនគរបាលយុត្តិធម៌មិនមានលទ្ធភាព ឬសមត្ថភាពក្នុងការស៊ើបអង្កេត ហើយអំពើនិទ្ទណ្ឌភាពដែលកើតច្រើនជាងគេ គឺពាក់ព័ន្ធឥទ្ធិពលនយោបាយនៃអ្នកដែលមានឥទ្ធិពលអំណាចខ្ពស់»។
លោកបន្តថា បញ្ហានិទ្ទណ្ឌភាពនេះកើតមានឡើងតាំងពីដំណាក់កាលដំបូងនៅថ្នាក់នគរបាលយុត្តិធម៌ក្នុងមូលដ្ឋាន រហូតដល់ស្ថាប័នអយ្យការ តុលាការ ចៅក្រម ជាដើម។
អ្នកស្រី ចក់ សុភាព ថ្លែងថា និទ្ទណ្ឌភាព ឬភាពគ្មានទោសពៃរ៍នៅតែជាវប្បធម៌ដ៏អាក្រក់សម្រាប់សង្គមកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។