មន្ត្រីប៉ូលិសនៃស្នងការដ្ឋានប៉ូលិសខេត្តមណ្ឌលគិរី បើកការស៊ើបអង្កេតលើកដំបូងនៅថ្ងៃច័ន្ទ ទី១៣ ខែមករា ទាក់ទិនបណ្ដឹងចោទប្រកាន់ទៅលើករណីគំរាមបើករថយន្តបុកសម្លាប់សកម្មជនការពារសិទ្ធិមនុស្សសមាគមអាដហុក (Adhoc) ខេត្តមណ្ឌលគិរី។
ស្នងការប៉ូលិសខេត្តមណ្ឌលគិរី លោក ញ៉ែម វ៉ាន់នី មានប្រសាសន៍បញ្ជាក់ថា សកម្មជនទាំងបីនាក់បានចូលមកបំភ្លឺនៅការិយាល័យនគរបាលព្រហ្មទណ្ឌរួចហើយ។ លោកបន្តថា មន្ត្រីជំនាញនឹងសាកសួរដើមចោទជុំវិញរឿងចោទប្រកាន់។ បន្ទាប់មកសមត្ថកិច្ចនឹងកោះអញ្ជើញភាគីចុងចោទមកឆ្លើយបំភ្លឺ ព្រមទាំងធ្វើការសម្របសម្រួលភាគីទាំងពីរបើអាចធ្វើទៅបាន។
លោក ញ៉ែម វ៉ាន់នី៖ «បានទទួលពាក្យបណ្ដឹង អ៊ីចឹងយើងសួរឲ្យអស់លម្អិតសិនពីរឿងហេតុហើយនិងគោលបំណងយើងចង់ធ្វើម៉េចអ្នកដើមបណ្ដឹងហ្នឹង បន្ទាប់មកបានយើងហៅខាងណោះមកធ្វើការ។ ប្រសិនរឿងហ្នឹងយើងអាចផ្សះផ្សាបានទេ យើងបញ្ចប់ត្រឹមហ្នឹងទៅ»។
សកម្មជនអង្គការអាដហុក ៣រូប រួមមាន៖ មន្ត្រីសម្របសម្រួលខេត្ត លោក សុក រដ្ឋា សហការីជំនួយការលោក ប៊ុន ចន្ថា និងសហការីឈ្មោះ ឡេ កៅ។ កាលពីថ្ងៃទី៨ ខែមករា ឆ្នាំ២០១៤ អ្នកទាំងបីបានប្ដឹងមេការទទួលខុសត្រូវក្រុមហ៊ុន វីឡា ស៊ូភើមែន (Village Supper Man) ឈ្មោះ ខុម និងបក្សពួកថាបានបើករថយន្តពីរគ្រឿងគំរាមបុកសម្លាប់សកម្មជនទាំងបី រួមជាមួយប្រជាពលរដ្ឋសហគមន៍ ៩នាក់ រស់នៅភូមិឡៅការ ឃុំសុខដុម ក្រុងសែនមនោរម្យ។ ទាំងអស់គ្នាបានធ្វើដំណើរទៅកាន់តំបន់ព្រៃសហគមន៍ដើម្បីស៊ើបអង្កេតពីបទល្មើសព្រៃឈើដែលសហគមន៍ចោទប្រកាន់ម្ចាស់ក្រុមហ៊ុនចម្ការកៅស៊ូ គឺអភិបាលរងខេត្តមណ្ឌលគិរី លោក យឹម លុច ថារំលោភបំពានឈូសឆាយយកដី និងកាប់យកដើមឈើផលិតជ័រទឹកក្នុងព្រៃសហគមន៍អស់រាប់រយដើម។ ចំណែកអ្នកជំនួញឈើ ឧកញ៉ា លឹម ប៊ុនណា គឺជាអ្នកប្រមូលទិញឈើនោះនាំចេញទៅទីផ្សារ។
មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា មានសាក្សីច្រើននាក់ដែលបានឃើញហេតុការណ៍គំរាមសម្លាប់នេះ។ លោកអះអាងថា នឹងស្វែងរកដំណោះស្រាយតាមផ្លូវច្បាប់លុះត្រាទទួលបានយុត្តិធម៌ក្នុងរឿងក្តីនេះ៖ «គោលជំហរខ្ញុំនៅតែអត្តនោម័តថា គាត់ពិតជាប៉ុនប៉ងធ្វើមនុស្សឃាតលើយើង ហើយបង្កើតឲ្យមានរូបភាពគំរាមកំហែងបំបាក់ស្មារតីមកលើសកម្មជនសិទ្ធិមនុស្ស»។
វិទ្យុអាស៊ីសេរីមិនអាចទាក់ទងមេការក្រុមហ៊ុនឈ្មោះ ខុម និងអភិបាលរងខេត្ត លោក យឹម លុច សុំបំភ្លឺករណីនេះបានទេ នៅថ្ងៃទី១៣ ខែមករា។ ប៉ុន្តែកាសែតក្នុងស្រុកមួយ កាលពីថ្ងៃពុធ កន្លងទៅ បានស្រង់សម្ដីមេការក្រុមហ៊ុនឈ្មោះ ខុម ក្នុងការផ្សាយរបស់ខ្លួនថា ក្រុមមន្ដ្រីអង្គការអាដហុក និងប្រជាពលរដ្ឋនៅក្នុងសហគមន៍បាននាំគ្នាចូលទៅក្នុងចម្ការកៅស៊ូឯកជន នៅគ្រាដែលកូនកៅស៊ូនៅតូច ដូច្នេះម្ចាស់ចម្ការភ័យខ្លាចកូនកៅស៊ូរបស់ខ្លួនបាក់ ពេលពួកគេគ្នាច្រើនជិះម៉ូតូមិនស្គាល់ផ្លូវ ដោយមិនសុំច្បាប់ម្ចាស់ចម្ការកៅស៊ូជាមុន។ នៅពេលដែលសន្តិសុខព្យាយាមស្រែកហៅឱ្យពួកគេត្រឡប់មកវិញ និងស៊ីផ្លេរថយន្តឱ្យពួកគេឈប់ ដើម្បីសន្តិសុខជូនដំណើរទៅនោះ ក្រុមមន្ដ្រីអង្គការ អាដហុក អះអាងថា គំរាមកំហែងទៅវិញ។
ផ្ទុយពីការលើកឡើងនេះ សមាជិកសហគមន៍ដែលឋិតក្នុងហេតុការណ៍ អ្នកស្រី ខ្វើន តុម អះអាងថា ការបកស្រាយនេះគឺជាការបំផ្លើស។ អ្នកស្រីបន្តថា នឹងចូលខ្លួនជាសាក្សីបំភ្លឺក្នុងរឿងក្តីនេះ៖ «ប្រជាពលរដ្ឋធ្លាប់ចេញចូលតាំងពីដូនតារហូតដល់ឥឡូវហ្នឹង គេធ្វើផ្លូវ គេធ្វើស្រែខាងមុខ គេទៅដងជ័រតាមហ្នឹងរហូតហ្នឹង។ ប៉ះពាល់ដើមកៅស៊ូគាត់ឯណាគាត់រកដេញបុកពួកខ្ញុំ ដេញបំបុកអង្គការអាដហុក»។
សមាគមការពារសិទ្ធិមនុស្សអាដហុក កាលពីថ្ងៃទី៩ ខែមករា បានចេញសេចក្ដីថ្លែងការណ៍ថ្កោលទោសចំពោះសកម្មភាពប៉ុនប៉ងធ្វើឃាតនេះ និងអំពាវនាវសុំឲ្យសមត្ថកិច្ចពាក់ព័ន្ធចាត់វិធានការផ្លូវច្បាប់ និងផ្ដន្ទាទោសជនដៃដល់ក្នុងករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។