ជនជាតិដើមភាគតិចប្រមាណ១ពាន់នាក់គ្រោងហែក្បួននៅមណ្ឌលគិរី
2014.08.07
សហគមន៍ជនជាតិដើមភាគតិចប្រមាណ ១ពាន់នាក់មកពីស្រុកក្រុងចំនួន៥ ក្នុងខេត្តមណ្ឌលគិរី គ្រោងហែក្បួនអបអរសាទរទិវាអន្តរជាតិនៃជនជាតិដើមពិភពលោកដែលនឹងប្រព្រឹត្តទៅនៅថ្ងៃទី៩ ខែសីហា ខាងមុខនេះ បើទោះបីអាជ្ញាធរខេត្តមិនអនុញ្ញាតឲ្យហែក្បូនយ៉ាងណាក្តី។
តំណាងសហគមន៍លោក ផ្លឹក ម៉ាល់ បញ្ជាក់ថា តំណាងសហគមន៍ ១១នាក់ បានប្រជុំឯកភាពគ្នានៅថ្ងៃទី៧ ខែសីហា ថា នឹងរៀបចំហែក្បួនដូចកម្មវិធីដែលបានដាក់ពាក្យស្នើសុំទៅលោកអភិបាលខេត្ត។ លោកថា អាជ្ញាធរខេត្តមិនយល់ព្រមឲ្យហែក្បួន ប៉ុន្តែមិនបានបញ្ជាក់ពីមូលហេតុនៃបម្រាមនេះ។ ប្រការនេះ អ្នកភូមិយល់ថា នេះជាការបំបិទសេរីភាព និងសិទ្ធិបញ្ចេញមតិរបស់ជនជាតិដើមភាគតិច។
លោក ផ្លឹក ម៉ាល់៖ «សុំហើយតើ! គេមិនឲ្យក៏យើងនៅតែហែ ព្រោះស្អីសិទ្ធិរបស់ប្រជាពលរដ្ឋជនជាតិដើមភាគតិចដូចជាគ្មានសិទ្ធិសោះ។ អ៊ីចឹងដូចជាបំពានលើប្រជាពលរដ្ឋទាំងស្រុង អត់មានដោះស្រាយឲ្យប្រជាពលរដ្ឋ។ បើគេបង្ក្រាប បង្ក្រាបទៅ យើងមិនខ្លាចទេៗ យើងធ្វើស្អីខុសដល់គេ យើងគ្រាន់តែថា ដើម្បីឲ្យគេឃើញថា ប្រជាពលរដ្ឋចេះសាមគ្គីគ្នា»។
អភិបាលខេត្តមណ្ឌលគិរី លោក អេង ប៊ុនហ៊ាង បានចុះហត្ថលេខាឯកភាពលើលិខិតស្នើសុំរបស់សហគមន៍ជនជាតិដើមខេត្តមណ្ឌលគិរី កាលពីថ្ងៃទី២២ ខែកក្កដា ស្ដីពីប្រារព្ធទិវាអន្តរជាតិនៃជនជាតិដើមពិភពលោក ប៉ុន្តែហាមមិនឲ្យហែក្បួន។
វិទ្យុអាស៊ីសេរីមិនអាចទាក់ទងសុំការបញ្ជាក់ពីអភិបាលខេត្តមណ្ឌលគិរី ជុំវិញការសម្រេចចិត្តប្រឆាំងបម្រាមហែក្បួននេះបានទេ នៅថ្ងៃទី៧ ខែសីហា។
តាមការគ្រោងទុក ពិធីហែក្បួនចេញដំណើរពីតំបន់ភ្នំដោះក្រមុំក្នុងសង្កាត់សុខដុម ក្រុងសែនមនោរម្យ កាត់តាមរង្វង់មូលក្ដាន់ពីរ ឆ្ពោះទៅខណ្ឌរដ្ឋបាលព្រៃឈើ សាលាខេត្ត និងស្ថាប័នតុលាការខេត្ត ដើម្បីសំដែងឆន្ទៈ និងគោលបំណងជូនមន្ត្រីស្ថាប័នទាំងនោះឲ្យយកចិត្តទុកដាក់ការពារសិទ្ធិដីធ្លី ធនធានធម្មជាតិ ប្រពៃណីវប្បធម៌ជនជាតិដើមភាគតិចដែលកំពុងរងការរំលោភបំពាន៕