មន្ត្រីនគរបាលខេត្តមណ្ឌលគិរី នៅថ្ងៃពុធ ទី៨ ខែឧសភា ឆ្នាំ២០១៣ អះអាងថា នឹងសម្រេចបញ្ជូនខ្លួនបុរសវ័យ ៤៧ឆ្នាំ ទៅស្ថាប័នអយ្យកាដើម្បីចាត់វិធានការតាមផ្លូវតុលាការក្នុងបទលួងលោមរំលោភសេពសន្ថវៈលើក្មេងស្រីអាយុ ១៥ឆ្នាំ ជាអនីតិជនមិនទាន់គ្រប់វ័យរៀបការតាមផ្លូវច្បាប់។
បុរសនោះមានឈ្មោះ សំ កុសល ជាអនុប្រធានការិយាល័យអប់រំស្រុកមួយនៃខេត្តមណ្ឌលគិរី។ ជនសង្ស័យត្រូវប៉ូលិសឃាត់ខ្លួនកាលពីថ្ងៃអាទិត្យ ទី៥ ខែឧសភា នៅប៉ុស្តិ៍នគរបាលរដ្ឋបាលឃុំ បន្ទាប់ពីក្រុមគ្រួសារក្មេងស្រីបានប្ដឹងមកសមត្ថកិច្ច ឲ្យជួយឃាត់ខ្លួនមន្ត្រីរូបនេះ ដោយសារតែក្មេងស្រីនោះមានផ្ទៃពោះ។
អធិការប៉ូលិសស្រុកនោះមានប្រសាសន៍បញ្ជាក់ថា ក្មេងស្រីនេះត្រូវបានបុរសជាមន្ត្រីផ្នែកអប់រំ លួងលោមរំលោភសេពសន្ថវៈតាំងពីឆ្នាំ២០១២ រហូតមក។ ប៉ុន្តែ ក្រុមគ្រួសារនាងមិនបានដឹងពីករណីនេះឡើយ។ លោកបន្តថា នៅពេលក្មេងស្រីមានផ្ទៃពោះ ទើបរឿងនេះដឹងដល់ក្រុមគ្រួសារ ហើយបានប្ដឹងមកសមត្ថកិច្ចសុំឃាត់ខ្លួនបុរសជាប់ចោទរូបនេះ៖ «គាត់ទទួលស្គាល់គ្រាន់តែហៅចូលទៅ គាត់សារភាពអ៊ីចឹងតែម្តង។ គាត់បានប្រព្រឹត្តអ៊ីចឹងមែន គ្រាន់តែការប្រព្រឹត្តហ្នឹងវាយូរខែហើយ»។
ឪពុកក្មេងស្រីសុំមិនបញ្ចេញឈ្មោះ មានប្រសាសន៍បញ្ជាក់ថា នេះគឺជាការធ្វើឲ្យប៉ះពាល់ធ្ងន់ធ្ងរដល់វិស័យអប់រំ និងសីលធម៌សង្គម ពីព្រោះជនជាប់ចោទជាមន្ត្រីអប់រំ ចំណែកកូនស្រីគាត់ជាសិស្សកំពុងរៀននៅថ្នាក់ទី៥។ លោកទាមទារឲ្យផ្ដន្ទាទោសមន្ត្រីរូបនេះតាមផ្លូវច្បាប់ ដើម្បីជាគំរូសម្រាប់ការអប់រំ៖ «ការប៉ះពាល់វាខ្លាំងណាស់ វាខូចក្នុងសង្គមទៀត។ អ្នកដែលប្រព្រឹត្តល្មើស គឺជាថ្នាលបណ្ដុះពូជ ហើយមកធ្វើបែបហ្នឹង អ៊ីចឹងដូចជាអាក្រក់មើល»។
មន្ត្រីសម្របសម្រួល សមាគមអាដហុក (Adhoc) ការពារសិទ្ធិមនុស្ស ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា ជនជាប់សង្ស័យត្រូវបានប៉ូលិសស្រុកកសាងសំណុំរឿងបញ្ជូនមកស្នងការដ្ឋានប៉ូលិសខេត្ត កាលពីថ្ងៃច័ន្ទ ទី៦ ខែឧសភា ហើយប៉ូលិសខេត្តកំពុងរៀបចំសំណុំរឿងបញ្ជូនជនសង្ស័យទៅស្ថាប័នអយ្យកា។ លោកកត់សម្គាល់ថា នេះគឺជាអំពើរំលោភសេពសន្ថវៈលើកទី៥ ក្នុងខេត្ត រយៈពេល ៥ខែដើមឆ្នាំ២០១៣៖ «ត្រូវតែផ្ដន្ទាទោសជនប្រព្រឹត្តហ្នឹងឲ្យទៅតាមនីតិវិធីច្បាប់ មិនអាចមានការលើកលែងបានទេ»។
ស្នងការប៉ូលិសខេត្តមណ្ឌលគិរី លោក ញ៉ែម វ៉ាន្នី មានប្រសាសន៍បញ្ជាក់ថា ប៉ូលិសនឹងបញ្ជូនជនសង្ស័យទៅស្ថាប័នអយ្យកា ក៏ប៉ុន្តែមន្ត្រីអយ្យកាសម្រេចយ៉ាងណាមិនទាន់ដឹងនៅឡើយ៖ «យើងអត់ដឹងផង ព្រោះនៅខ្ញុំនៅឡើយ។ យើងនឹងបញ្ជូនចេញម៉ោងប្រហែលប្រាំ រំលោភលួងលោមក្មេងអាយុ ១៥ឆ្នាំណា!»។
របាយការណ៍អង្កេតរបស់មន្ត្រីសមាគមអាដហុក ខេត្តមណ្ឌលគិរី ចាប់ពីដើមឆ្នាំ២០១៣ រហូតបច្ចុប្បន្ន មានករណីរំលោភសេពសន្ថវៈចំនួន ៥ករណី ក្នុងនោះ ៣ករណីប៉ូលិសចាប់បញ្ជូនជនសង្ស័យទៅតុលាការ និង ២ករណី ដោះស្រាយសំណងតាមប្រពៃណីជនជាតិដើមភាគតិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។