អនុប្រធានទីមួយនៃគណៈកម្មការជំនាញរដ្ឋសភា មកពីគណបក្សសង្គ្រោះជាតិ គ្រោងនឹងពិភាក្សាសេចក្ដីព្រាងច្បាប់ថវិកាជាតិឆ្នាំ២០១៥ នៅថ្ងៃ ទី ១០ វិច្ឆិកា នៅវិមានរដ្ឋសភា ដើម្បីត្រួតពិនិត្យ រាល់កំហុសឆ្គង និងភាពខ្វះចន្លោះមួយចំនួន។
ប៉ុន្តែសមាជិកសភាមកពីគណបក្សប្រឆាំង បានអះអាងថា ច្បាប់ថវិកាជាតិ ដែលគ្រោងនឹងអនុម័តនាពេលដ៏ខ្លីខាងមុខនេះ គឺមានភាពមិនប្រក្រតីជាច្រើនចំណុចនៅឡើយ។
បន្ទាប់ពីមានភាពចម្រូងចំរាស់រវាងសមាជិកនៅក្នុងគណៈកម្មការជំនាញទីពីរនៃរដ្ឋសភាមកពី គណបក្សសង្គ្រោះជាតិ និងគណបក្សប្រជាជនកម្ពុជា នៅលើការរៀបចំច្បាប់ថវិកាជាតិ សម្រាប់ចំណាយនៅឆ្នាំ២០១៥កន្លងមក ក្រុមសមាជិកគណៈកម្មការជំនាញនេះ បានប្រកាសថា នឹងរៀបចំកិច្ចប្រជុំជាលើកដំបូងរបស់ខ្លួននៅថ្ងៃ ទី ១០ វិច្ឆិកា ដើម្បីពិភាក្សារកចំណុចខ្វះខាត និងស្វែងរកវិធី ធ្វើឲ្យច្បាប់ថវិកាជាតិនោះ អនុវត្តន៍ប្រកបដោយប្រសិទ្ធភាពនិងមានប្រសិទ្ធភាពបំផុត។
អនុប្រធានទីមួយនៃគណៈកម្មការទីពីរនៃរដ្ឋសភា លោក សុន ឆ័យ មានប្រសាសន៍ថា នេះជាការជួបពិភាក្សាជាលើកដំបូងរវាងគណៈកម្មការជំនាញ មុននឹងបើកឲ្យរដ្ឋាភិបាលចោទជាសំណួរ។ បើគ្មានអ្វីត្រូវកែប្រែនោះទេ លោកចង់ឲ្យមានការចោទសួរពីអង្គការសង្គមស៊ីវិលមួយទៀត មុននឹងដាក់ឲ្យសភាអនុម័តនៅចុងខែវិច្ឆិកាឆ្នាំ២០១៤នេះ។ ប៉ុន្តែអ្វីដែលចម្លែកនោះគឺបន្ទាប់ពីក្រុមសមាជិកនៃគណៈកម្មការជំនាញមកពីគណបក្សប្រឆាំង បានព្យាយាមសុំឯកសារលម្អិតនានាស្ដីពីរបាយការណ៍ចំណូលចំណាយ នៅស្ថាប័នថ្នាក់ជាតិនិងថ្នាក់ក្រោមជាតិ ពីក្រសួងសេដ្ឋកិច្ចនិងហិរញ្ញវត្ថុ ដែលមានចុះហត្ថលេខាដោយរូបលោកផ្ទាល់ជាអនុប្រធានទីមួយនៃគណៈកម្មការជំនាញនេះ ត្រូវបានបដិសេធ។
បញ្ហានេះលោក សុន ឆ័យ បានអះអាងថា ស្ថាប័នក្រសួងជំនាញ និងសមាជិកសភាដែលមានដំណែងនៅក្នុងគណៈកម្មការទីពីនៅរដ្ឋសភាមកពីគណបក្សប្រជាជនកម្ពុជា ហាក់មានមានឆន្ទៈតិចតួច ក្នុងរៀបចំនិងតាក់តែច្បាប់ថវិកាជាតិប្រចាំឆ្នាំ២០១៥ ប្រកបដោយតម្លាភាព៖ «ដោយសារខ្ញុំដាក់តួនាទី ជាអនុប្រធាននៃគណៈកម្មការទីពីរ ដូច្នេះត្រូវមានការអនុញ្ញាតពីឯកឧត្ដមជាម យៀប ។ ហើយខ្ញុំយល់ថា ជារឿងចម្លែកណាស់ ព្រោះគ្រាន់តែសុំឯកសារ ត្រូវតែអនុញ្ញាតពីប្រធានគណៈកម្មការបែបនេះ ដូចជាមិនត្រឹមត្រូវទេ ។ តែខ្ញុំមិនចង់ឈ្លោះជាមួយគេទេ ហើយខ្ញុំក៏បានរៀបចំលិខិតមួយផ្សេងទៀត ដោយមិនដាក់តួនាទីខ្ញុំទេ គឺគ្រាន់តែដាក់ជាតំណាងរាស្ត្រ ហើយខ្ញុំនឹងផ្ញើទៅថ្ងៃស្អែកនេះ ដើម្បីធ្វើម៉េចឲ្យឯកសារលំអិត ពាក់ព័ន្ធនឹងថវិកាហ្នឹង ផ្ញើឲ្យទាន់មុននឹងសភាអនុម័តច្បាប់នេះ»។
វិទ្យុអាស៊ីសេរី មិនអាចសុំការឆ្លើយតបពីប្រធានគណៈកម្មការទីពីរនៃរដ្ឋសភា លោក ជាម យៀប និង មន្ត្រីក្រសួងសេដ្ឋកិច្ចហិរញ្ញវត្ថុបានទេនៅថ្ងៃអាទិត្យទី៩វិច្ឆិកា។ ប៉ុន្តែអង្គការសង្គមស៊ីវិល យល់ឃើញថាច្បាប់ថវិកាជាតិ ត្រូវតែបង្ហាញឲ្យប្រជាពលរដ្ឋកម្ពុជា គ្រប់រូបបានដឹងគ្រប់គ្នា អំពីចំណូលចំណាយរបស់ថវិកាជាតិទាំងអស់។
សេចក្ដីព្រាងច្បាប់ថវិកាជាតិ ឆ្នាំ២០១៥ មាន៦ជំពូក ដែលបានកំណត់ការចំណាយថវិកាជាតិសរុប ស្មើនឹង២០%នៃទំហំសេដ្ឋកិច្ចជាតិ ឬសមាមាត្រនឹងប្រមាណ៤ពាន់លានដុល្លារសហរដ្ឋអាមេរិក។ ច្បាប់ថវិកាជាតិនេះ នឹងមានកំណើនលើសឆ្នាំមុន ប្រមាណ ១០ភាគរយ នៃច្បាប់ស្ដីពីហិរញ្ញវត្ថុសម្រាប់ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។