សន្និសីទនេះ ធ្វើឡើងបន្ទាប់ពីបានទទួលអនុសាសន៍របស់អង្គការសហប្រជាជាតិ នៅក្នុងការប្រជុំមួយនៅក្រុងហ្សឺណែវ កាលពីខែតុលា កន្លងទៅ បានរកឃើញថា កម្ពុជា នៅមានចំណុចខ្វះចន្លោះច្រើនក្នុងការលើកស្ទួយសិទ្ធិស្ត្រី។
តំណាងអង្គការមិនមែនរដ្ឋាភិបាលជាតិ អន្តរជាតិ អ្នកសហគមន៍មានជម្លោះដីធ្លី ក្រុមកម្មករ និងនិស្សិតសរុបប្រមាណ ១៣០នាក់ បានចូលរួមពិភាក្សាផ្លាស់ប្ដូរយោបល់ក្នុងសន្និសីទ ស្ដីពីការស្វែងរកយុត្តិធម៌សម្រាប់ស្ត្រីនៅក្នុងប្រទេសកម្ពុជា ដោយផ្ដោតលើការអនុវត្តន៍អនុសញ្ញា ស្ដីពីការលុបបំបាត់រាល់ទម្រង់នៃការរើសអើងលើនារីភេទ។
ពួកគេជំរុញអោយរដ្ឋាភិបាល យកចិត្តទុកដាក់អនុវត្តអនុសាសន៍របស់អង្គការសហប្រជាជាតិ អោយបានច្រើនបំផុត ទើបអាចធានាបានថា ស្ត្រីខ្មែរបានចូលរួម និងទទួលបានអត្ថប្រយោជន៍ពេញលេញពីការអភិវឌ្ឍន៍។
ប្រធានគណៈកម្មាធិការនៃអង្គការមិនមែនរដ្ឋាភិបាលកម្ពុជា ហៅកាត់ថា ស៊ីដ (NGO-CEDAW) និងជាប្រធានអង្គការលីកាដូ (Licadho) អ្នកស្រី ពុង ឈីវកេក មានប្រសាសន៍ថា គណៈកម្មាធិការអង្គការសហប្រជាជាតិ បានលើកឡើងនូវអនុសាសន៍ចំនួន ៥២ចំណុច ទៅអោយរដ្ឋាភិបាលដែលជាគំរូសកម្មភាពលើកស្ទួយសិទ្ធិស្ត្រីដ៏ពិតប្រាកដ។ អ្នកស្រីយល់ថា សកម្មភាពបន្ទាន់ដែលរដ្ឋាភិបាលគួរអនុវត្ត គឺការផ្សព្វផ្សាយអោយមន្ត្រីរដ្ឋាភិបាល និងមន្ត្រីពាក់ព័ន្ធក្នុងប្រព័ន្ធយុត្តិធម៌ តុលាការ បានដឹងពីអត្ថន័យ និងការអនុវត្តន៍អនុសញ្ញាស្ដីពីការលុបបំបាត់រាល់ទម្រង់នៃការរើសអើងលើនារីភេទ។
«សំឡេង»
កាលពីខែតុលា កន្លងទៅ រដ្ឋមន្ត្រីក្រសួងកិច្ចការនារី និងតំណាងអង្គការមិនមែនរដ្ឋាភិបាល បានជួបប្រជុំជាមួយមន្ត្រីជំនាញនៃគណៈកម្មាធិការអង្គការសហប្រជាជាតិ ពិភាក្សាពីលទ្ធផលនៃការងារលើកស្ទួយសមភាពយេនឌ័រនៅកម្ពុជា។ ក្នុងពេលនោះ អង្គការសហប្រជាជាតិ បានរកឃើញចំណុចខ្វះខាត និងលម្អិតពីគ្រប់ផ្នែកដែលចាំបាច់ត្រូវមានការផ្លាស់ប្ដូរ ដោយគិតចាប់តាំងពីស្ថាប័នរដ្ឋសភា រហូតដល់ពលរដ្ឋក្នុងសង្គម។ ជាពិសេស បានបារម្ភពីអំពើពុករលួយក្នុងប្រព័ន្ធយុត្តិធម៌ ដែលបន្តរារាំងដល់ការដាក់ទោសករណីអំពើហិង្សាលើស្ត្រី កង្វះសេវាថែទាំសុខភាពសម្រាប់ស្ត្រីក្រីក្រ ពិការ ចាស់ជរា ស្ត្រីបន្តរងគ្រោះដោយការបណ្ដេញ និងការរំលោភសិទ្ធិការងារ។
វិទ្យុអាស៊ីសេរី នៅពុំទាន់អាចសុំការអធិប្បាយពីមន្ត្រីក្រសួងកិច្ចការនារី បាននៅឡើយទេ នៅរសៀលថ្ងៃទី២៩ ខែវិច្ឆិកា។
យ៉ាងណា កម្ពុជា ដែលជាប្រទេសហត្ថលេខីនៃអនុសញ្ញាស្ដីពីការលុបបំបាត់រាល់ទម្រង់នៃការរើសអើងលើនារីភេទ ត្រូវដាក់របាយការណ៍របស់ខ្លួនទៅអង្គការសហប្រជាជាតិ នៅរៀងរាល់ ៤ឆ្នាំម្ដង។
តំណាងអង្គការសហប្រជាជាតិស្ត្រី (UNWOMAN) លោក វន វិត មានប្រសាសន៍ថា ដើម្បីសម្រេចបានតាមគោលដៅនៃអនុសញ្ញាអង្គការសហប្រជាជាតិ ចាំបាច់ណាស់ដែលត្រូវគ្រប់ភាគីពាក់ព័ន្ធ ត្រូវធ្វើការងាររួមគ្នា។
«សំឡេង»
គណៈកម្មាធិការអង្គការសហប្រជាជាតិ ធ្លាប់បានផ្ដល់អនុសាសន៍ម្ដងដល់កម្ពុជា កាលពីឆ្នាំ២០០៦ ហើយរហូតមកដល់ពេលនេះ សកម្មភាពដែលសម្រេចបាន គឺមានតិចតួចនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។