អង្គការក្រៅរដ្ឋាភិបាលផ្នែកសិទ្ធិមនុស្សចំនួន ៤ បានចេញសេចក្ដីថ្លែងការណ៍រួមគ្នាមួយ កាលពីថ្ងៃទី៣ កក្កដា ថ្កោលទោសចំពោះការប្រើប្រាស់អំពើហិង្សាជាបន្តបន្ទាប់ដោយកម្លាំងនគរបាល និងកងកម្លាំងសន្តិសុខដទៃទៀត ប្រឆាំងនឹងក្រុមអ្នកតវ៉ាដីធ្លីមកពីសហគមន៍បឹងកក់។ សេចក្ដីថ្លែងការណ៍បានអំពាវនាវឲ្យរដ្ឋាភិបាលបញ្ចប់ទំនាស់ដីធ្លីទាំងនោះ។
សេចក្ដីថ្លែងការណ៍ដែលធ្វើឡើងជាភាសាខ្មែរនិងអង់គ្លេស អង្គការសិទ្ធិមនុស្សទាំង ៤ នោះ រួមមានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក= Adhoc) មជ្ឈមណ្ឌលសិទ្ធិមនុស្សកម្ពុជា អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ=Licadho) និងសហព័ន្ធអន្តរជាតិដើម្បីសិទ្ធិមនុស្ស។
ប្រជាជនបាត់បង់ដីធ្លីមកពីសហគមន៍បឹងកក់ បានធ្វើការតវ៉ារយៈពេលពីរថ្ងៃជាប់គ្នានៅមុខសាលារាជធានីភ្នំពេញ នៅដើមសប្ដាហ៍នេះ ដើម្បីទាមទារឲ្យលោកអភិបាលក្រុងថ្មី ប៉ា សុជាតិវង្ស ដែលធ្លាប់បានសន្យាថា នឹងដោះស្រាយបញ្ហាដីធ្លីជូនប្រជាសហគមន៍បឹងកក់ កាលពីពេលលោកទើបបានឡើងកាន់តំណែងថ្មីៗ។ តែការតវ៉ានេះ ជាញឹកញយត្រូវបានបំបែកដោយកម្លាំងនគរបាល និងកងកម្លាំងសន្តិសុខផ្សេងទៀត។
សេចក្ដីថ្លែងការណ៍បានបរិយាយថា ការតវ៉ារបស់ប្រជាពលរដ្ឋសហគមន៍បឹងកក់នេះ គឺជាការទាមទារនូវដំណោះស្រាយចំពោះជម្លោះដីធ្លីដ៏រ៉ាំរ៉ៃ ដែលប៉ះពាល់ដល់សហគមន៍របស់ពួកគាត់ឲ្យបានមុនការបោះឆ្នោតជ្រើសរើសតំណាងរាស្ត្រនៅថ្ងៃទី២៨ កក្កដា ខាងមុខនេះ។
សេចក្ដីថ្លែងការណ៍បន្តថា ការប្រើកម្លាំងប្រឆាំងនឹងអ្នកតវ៉ាទាំងនោះ គឺពុំមានលក្ខណៈត្រឹមត្រូវឡើយ ហើយការប្រើកម្លាំងប្រឆាំងនឹងក្រុមអ្នកតវ៉ាអហិង្សា គឺជាការខុសច្បាប់។
ឆ្លើយតបចំពោះការទាមទារឲ្យមានដំណោះស្រាយដីធ្លី អ្នកនាំពាក្យសាលារាជធានីភ្នំពេញ លោក ឡុង ឌីម៉ង បានមានប្រសាសន៍នៅថ្ងៃនេះថា សាលារាជធានីភ្នំពេញ កំពុងតែចាត់វិធានការដោះស្រាយបញ្ហានេះទៅតាមនីតិវិធី ហើយបានបង្កើតក្រុមការងារពិសេសដើម្បីចុះស្រង់ស្ថិតិនិងព័ត៌មាន ដើម្បីធ្វើសលាកបត្រជូនប្រជាពលរដ្ឋតវ៉ា ហើយការងារនេះក៏មានការចូលរួមផ្ទៀងផ្ទាត់ទាំងអស់គ្នាដោយអង្គការសង្គមស៊ីវិល។
លោកមានប្រសាសន៍បន្តថា អភិបាលរាជធានីភ្នំពេញ លោក ប៉ា សុជាតិវង្ស បានយកបញ្ហាដីធ្លីធ្វើជាអាទិភាពរបស់លោកដូចដែលលោកបានសន្យា តែលោក ឡុង ឌីម៉ង់ បាននិយាយថា សាលារាជធានីក៏មិនអាចធ្វើឲ្យបានលឿនដូចដែលក្រុមអ្នកតវ៉ាចង់បាននោះទេ ព្រោះវាត្រូវធ្វើតាមនីតិវិធីឲ្យបានត្រឹមត្រូវ៖ «ក្រុមការងារយើងកំពុងតែធ្វើការដែរ ក៏ប៉ុន្តែសួរថា តើដែលគាត់ចង់ឲ្យមានពេលវេលាឆាប់ហ្នឹង គឺវាមិនអាចទៅតាមដែលអ្វីគាត់ចង់បានទេ»។
ទាក់ទងនឹងការលើកឡើងរបស់លោក ឡុង ឌីម៉ុង ខាងលើ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានមានប្រសាសន៍នៅថ្ងៃនេះថា លោកទទួលស្គាល់ថា សាលារាជធានីភ្នំពេញ កំពុងចាត់វិធានការដោះស្រាយបញ្ហាដីធ្លីនេះ តែលោកមានប្រសាសន៍ថា ដើម្បីជៀសវាងកុំឲ្យមានការតវ៉ានៅពេលខាងមុខ និងដើម្បីបញ្ចៀសកុំឲ្យមានអំពើហិង្សាដែលកើតឡើងដោយសារការតវ៉ានេះ សាលារាជធានី គួរតែពន្លឿនសកម្មភាពរបស់ខ្លួនឲ្យបានលឿនជាងនេះទៀត ដើម្បីបង្កើនទំនុកចិត្តរបស់ក្រុមអ្នកតវ៉ា។
លោកថា ការកសាងទំនុកចិត្តរវាងសាលារាជធានី និងពលរដ្ឋតវ៉ា គឺជារឿងសំខាន់បំផុត៖ «ជាពិសេស គឺប្រជាពលរដ្ឋគាត់ធ្លាប់មានបញ្ហាជាមួយនឹងអភិបាលក្រុងចាស់យូរអង្វែង ជាករណីយូរអង្វែង ដោយសារអ៊ីចេះទេ ដោយសារគាត់ពុំសូវមានជំនឿហ្នឹងជាកន្លែងមួយដែលខ្ញុំអំពាវនាវសុំឲ្យសាលាក្រុងឈានមួយជំហានធំដើម្បីធ្វើម៉េចបង្កឲ្យមានការទុកចិត្តរបស់ប្រជាពលរដ្ឋផងដែរ»។
បន្ថែមពីលើនេះ សេចក្ដីថ្លែងការណ៍ក៏បានកត់សម្គាល់ដែរពីការបែកបាក់គ្នារវាងអ្នកសហគមន៍បឹងកក់ ហើយបានលើកឡើងថា សន្និសីទសារព័ត៌មានដែលបានចាក់ផ្សាយនៅតាមស្ថានីយវិទ្យុ និងទូរទស្សន៍ជាច្រើន កាលពីថ្ងៃទី២ កក្កដា កន្លងទៅនេះ បានប៉ុនប៉ងមិនបង្ហាញឲ្យឃើញនូវអ្នកតវ៉ាប្រឆាំងទៅនឹងភាគីម្ខាងទៀតនោះទេ ហើយបែរជាបញ្ចាំងពីការប្រឆាំងទៅលើអង្គការមិនមែនរដ្ឋាភិបាលក្នុងស្រុក ដែលធ្វើការដើម្បីការពារសិទ្ធិដីធ្លី និងសិទ្ធិលំនៅឋាននោះទៅវិញ។
សេចក្ដីថ្លែងការណ៍បានចោទប្រកាន់ថា ការចាក់ផ្សាយសន្និសីទនេះ គឺមានគោលបំណងធ្វើឲ្យប្រាសចាកបញ្ហាពិតនៅពីក្រោយការតវ៉ា ដូចជាការរំលោភយកដីធ្លី និងការបណ្ដេញចេញទាំងបង្ខំជាដើម ហើយថា សន្និសីទនេះធ្វើឡើងគឺមានគោលបំណងបង្វែងការកត់សម្គាល់របស់មហាជនទូទៅពីកង្វះសមត្ថភាពក្នុងការរកដំណោះស្រាយជាក់លាក់ពីសំណាក់អាជ្ញាធរ។
នៅទីបញ្ចប់ អង្គការសិទ្ធិមនុស្សទាំង ៤ បានអំពាវនាវឲ្យអាជ្ញាធរបង្កើតឲ្យមានការស៊ើបអង្កេតឲ្យបានហ្មត់ចត់ ចំពោះការបន្តប្រើកម្លាំងពុំសមាមាត្រ ហើយរកអ្នកដែលទទួលខុសត្រូវឲ្យចេញមុខទទួលខុសត្រូវលើករណីនេះ។ អង្គការទាំងនេះ ក៏អំពាវនាវដល់អាជ្ញាធរ សូមធ្វើតាមពាក្យសន្យារបស់ខ្លួនក្នុងការដោះស្រាយនូវទំនាស់ដីធ្លីនៅក្នុងទីក្រុង ដើម្បីជាការទប់ស្កាត់នូវការប្រឆាំងតវ៉ានៅពេលអនាគត និងដើម្បីរក្សានូវសន្តិភាពនៅលើដងវិថីនៅក្នុងរាជធានីភ្នំពេញ ជាជាងការបន្តប្រើនូវអំពើហិង្សាលើក្រុមអ្នកតវ៉ាតទៅទៀត។
ទាក់ទងការអំពាវនាវឲ្យអាជ្ញាធរបង្កើតឲ្យមានការស៊ើបអង្កេតឲ្យបានហ្មត់ចត់ ហើយឲ្យរកអ្នកដែលទទួលខុសត្រូវឲ្យចេញមុខទទួលខុសត្រូវលើករណីខាងលើ។
វិទ្យុអាស៊ីសេរី បានព្យាយាមទាក់ទងអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ដើម្បីសុំការឆ្លើយតបដែរ តែលោកមិនបានលើកទូរស័ព្ទទេ។
ជាការកត់សម្គាល់ កាលពីថ្ងៃទី១៣ ខែមិនា ឆ្នាំ២០១៣ កងកម្លាំងសន្តិសុខចម្រុះមួយក្រុមបានប្រើកម្លាំងប្រឆាំងក្រុមអ្នកតវ៉ាមកពីសហគមន៍បឹងកក់ ដែលព្រឹត្តិការណ៍នោះ បានបណ្ដាលឲ្យអ្នកតវ៉ា ៦រូប បានរងរបួសធ្ងន់ ហើយខ្លះទៀតបានបាក់ដៃនិងសន្លប់។ ក្រោយមកទៀត នៅថ្ងៃទី២៩ ខែឧសភា ឆ្នាំ២០១៣ ក្រុមអ្នកតវ៉ាមកពីសហគមន៍បឹងកក់ បុរីកីឡា និងសហគមន៍ថ្មគោល ត្រូវបានបំបែកតាមរយៈការប្រើកាណុងបាញ់ទឹកដាក់លើពួកគាត់ ក្រោមការបញ្ជាផ្ទាល់ពីស្នងការរាជធានីភ្នំពេញ លោក ជួន សុវណ្ណ។ ព្រឹត្តិការណ៍បាញ់ទឹកបំបែកនោះ បានបណ្ដាលឲ្យអ្នកតវ៉ា ៣នាក់សន្លប់ ហើយអ្នកតវ៉ាប្រហែល ២០នាក់ផ្សេងទៀតរងរបួស៕