ការដើរដាក់ញត្តិនេះ គឺក្នុងបំណងអំពាវនាវឲ្យស្ថានទូតបរទេសទាំងនោះ ជួយចាត់វិធានការដើម្បីឲ្យមានការដោះលែងមន្ត្រីសង្គមស៊ីវិលនិងប្រជាពលរដ្ឋ ២៣នាក់ ដែលត្រូវរដ្ឋាភិបាលចាប់ខ្លួនកាលពីដើមខែមករា។
«សំឡេង»៖ ដូចការគ្រោងទុក មន្ត្រីអង្គការសង្គមស៊ីវិល សកម្មជនដីធ្លីមកពីសហគមន៍បឹងកក់ និងបុរីកីឡា ព្រមទាំងព្រះសង្ឃប្រមាណ ៨០អង្គនិងនាក់ បានដង្ហែក្បួនយកញត្តិទៅដាក់នៅតាមស្ថានទូតមួយចំនួន ដូចជាស្ថានទូតប្រទេសអាល្លឺម៉ង់ (Germany) ស៊ុយអែត (Sweden) កូរ៉េខាងត្បូង (South Korea) អូស្រ្តាលី (Australia) រុស៊្សី (Russia) ប្រទេសថៃ (Thailand) និងម៉ាឡេស៊ី (Malaysia)។ ស្ថានទូតទាំងអស់នេះសុទ្ធតែបានទទួលយកញត្តិពីតំណាងអង្គការសង្គមស៊ីវិលទាំងនេះ។
ប្រធានគណៈគ្រប់គ្រងនៃគណៈកម្មាធិការដើម្បីលើកស្ទួយស្ត្រីនៅក្នុងវិស័យនយោបាយ និងជានាយិកាអង្គការសីលការ អ្នកស្រី ធីដា ឃិះ បានឲ្យដឹងបន្ទាប់ពីដាក់ញត្តិថា មន្ត្រីស្ថានទូតសុទ្ធតែបានចែករំលែកការព្រួយបារម្ភចំពោះអ្វីដែលបានកើតឡើង ហើយពួកគេសន្យាថា នឹងពាំនាំយកសំណើរបស់ក្រុមការងារអង្គការសង្គមស៊ីវិលដាក់ជូនឯកអគ្គរាជទូត និងឯកអគ្គរដ្ឋទូតរបស់ពួកគេ។
អ្នកស្រី ធីដា ឃិះ មានប្រសាសន៍ថា អ្នកស្រីមានសង្ឃឹមថា នឹងមានដំណោះស្រាយ៖ «បើយើងមិនបានមកសុំគេ គេមិនដឹងថាយើងហ្នឹងមានទឹកចិត្តយ៉ាងម៉េច ប្រជាពលរដ្ឋមានទឹកចិត្តយ៉ាងម៉េចទេ ដល់ឥឡូវនេះគេឃើញ ១៨៤អង្គការ ហើយកំពុងបន្តមកទៀត កាន់តែច្រើនមកទៀត ហើយខ្ញុំមានសង្ឃឹមថា រាជរដ្ឋាភិបាលនឹងយល់នូវអ្វីដែលយើងទាំងអស់គ្នាត្រូវការ ហើយការគំរាមកំហែង ការរំលោភសិទ្ធិមនុស្ស មិនមែនជារឿងល្អសម្រាប់ប្រទេសកម្ពុជា សម្រាប់រាជរដ្ឋាភិបាលកម្ពុជាទេ ដូច្នេះមនុស្សយើងធម្មតាចង់បានល្អ ហើយខ្ញុំសង្ឃឹមថា រាជរដ្ឋាភិបាលធ្វើនូវអ្វីដែលត្រូវធ្វើ នូវអ្វីដែលល្អ»។
ក្នុងការដង្ហែក្បួនកាលពីព្រឹកថ្ងៃទី២៣ មករា ពុំឃើញមានការរារាំង ឬចាប់ខ្លួនអ្នកចូលរួមពីសំណាក់អាជ្ញាធររដ្ឋាភិបាលឡើយ។ ក្នុងការដង្ហែញត្តិបែបនេះ កាលពីថ្ងៃទី២១ មករា អាជ្ញាធរចាប់ខ្លួនមនុស្សចំនួន ១១នាក់ ក្នុងនោះក៏មានប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ផងដែរ។ ប៉ុន្តែអ្នកទាំង ១១នាក់នោះ ត្រូវបានអាជ្ញាធរដោះលែងវិញនៅល្ងាចថ្ងៃដដែល។
អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក ណៃ វ៉ង់ដា ដែលបានចូលរួមក្នុងការហែក្បួនដែរនោះ មានប្រសាសន៍ថា លោកកោតសរសើរចំពោះទង្វើល្អរបស់កងកម្លាំងអាជ្ញាធររដ្ឋាភិបាលដែលមិនបានធ្វើការរារាំង បង្ក្រាប វាយដំ ឬចាប់ខ្លួនអ្នកចូលរួមក្នុងការដង្ហែក្បួននៅលើកនេះ។
លោកថា រដ្ឋាភិបាលហាក់ភ្ញាក់រឭកឡើងវិញ ហើយលោកក៏បានស្នើរដ្ឋាភិបាលឲ្យដោះលែងប្រជាពលរដ្ឋទាំង ២៣នាក់ឲ្យមានសេរីភាពឡើងវិញ៖ «យើងឃើញថា មានការចាប់ផ្ដើមនឹងឃើញគោរពច្បាប់ គោរពរដ្ឋធម្មនុញ្ញឡើងវិញ នេះជាការមួយគួរឲ្យកោតសរសើរ ហើយសុំឲ្យបន្តសកម្មភាពគោរពច្បាប់ និងរដ្ឋធម្មនុញ្ញ គោរពសិទ្ធិរបស់ប្រជាពលរដ្ឋនេះជាបន្តទៀត ហើយលិខិតសម្រេចរបស់អាជ្ញាធររាជធានីភ្នំពេញ ដែលហាមឃាត់ការជួបជុំលើសពី ១០នាក់បំបែកនេះ សូមឲ្យលុបបំបាត់ជាបន្ទាន់ ព្រោះវាអធម្មនុញ្ញភាពហើយមិនស្របទៅនឹងច្បាប់ដែលយើងទាំងអស់គ្នា ឯកភាពរៀបចំឡើងនេះទេ»។
នៅក្នុងសេចក្ដីថ្លែងការណ៍រួមចុះថ្ងៃទី២២ ខែមករា ក្រុមការងារអង្គការសង្គមស៊ីវិលបានថ្កោលទោសយ៉ាងម៉ឺងម៉ាត់ចំពោះការប្រើប្រាស់កម្លាំងដ៏លើសលប់ និងយ៉ាងសាហាវ ការចាប់ខ្លួនដោយបំពាន ការសម្លាប់ និងការប្រព្រឹត្តយ៉ាងអមនុស្សធម៌ដោយអាជ្ញាធរកម្ពុជា។
អង្គការសង្គមស៊ីវិលទាំងអស់នេះ ក៏បានទទូចឲ្យរដ្ឋាភិបាលកម្ពុជា ដោះលែងជាបន្ទាន់នូវជនជាប់ឃុំទាំង ២៣នាក់ បង្កើតគណៈកម្មការស៊ើបអង្កេតឯករាជ្យមួយដើម្បីវែកមុខជនដែលទទួលខុសត្រូវលើអំពើហិង្សា និងធានាឲ្យបានថា ជនប្រព្រឹត្តនឹងត្រូវយកមកកាត់ទោសដោយគ្មានបង្អង់ និងផ្ដល់សំណងជូនអ្នករងរបួស និងគ្រួសារនៃអ្នកដែលត្រូវគេសម្លាប់ ព្រមទាំងកត្តាមួយចំនួនផ្សេងទៀតផង។
មកទល់ពេលនេះ ស្ថានទូតបរទេសនិងស្ថាប័នអន្តរជាតិ ដែលក្រុមការងារអង្គការសង្គមស៊ីវិលបានយកញត្តិទៅដាក់រួចហើយនោះ រួមមានស្ថានទូតអាមេរិក ចក្រភពអង់គ្លេស បារាំង អាល្លឺម៉ង់ ស៊ុយអែត កូរ៉េខាងត្បូង អូស្រ្តាលី ថៃ ម៉ាឡេស៊ី អង្គការយូនីសេហ្វ (UNICEF) និងអង្គការលើកលែងទោសអន្តរជាតិ (Amnesty International)។ បើតាមសេចក្ដីជូនដំណឹងតំណាងក្រុមការងារអង្គការសង្គមស៊ីវិលទាំងនេះ នឹងយកញត្តិទៅដាក់នៅតាមបណ្ដាស្ថានទូតបរទេសផ្សេងបន្ថែមទៀត នៅថ្ងៃទី២៤ ២៧ និង ២៨ ខែមករា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។