បណ្ដាញអង្គការការពារសិទ្ធិមនុស្សជាតិ និងអន្តរជាតិមួយចំនួនស្នើក្រុមប្រឹក្សាសិទ្ធិមនុស្សនៃអង្គការសហប្រជាជាតិ (អ.ស.ប) អោយជួយអន្តរាគមន៍ស្ដារស្ថានភាពសិទ្ធិមនុស្សនៅកម្ពុជា នៅពេលដែលក្រុមអង្គការទាំងនេះមើលឃើញថា ស្ថានភាពគោរពសិទ្ធិមនុស្សបានធ្លាក់ចុះនៅមួយរយៈពេលចុងក្រោយនេះ។ សំណើនោះធ្វើឡើងតាមរយៈលិខិតរួមមួយរបស់ក្រុមបណ្ដាញការពារសិទ្ធិមនុស្ស ដែលបានផ្ញើទៅក្រុមប្រឹក្សាសិទ្ធិមនុស្សនៃអង្គការសហប្រជាជាតិកាលពីថ្ងៃទី២០ ខែសីហា។
ទោះជាយ៉ាងណាមន្ត្រីរដ្ឋាភិបាលច្រានចោលការលើកឡើងរបស់ក្រុមអង្គការទាំងនោះ និងបញ្ជាក់ថា រដ្ឋាភិបាលតែងអនុវត្តតាមគោលការណ៍នីតិរដ្ឋ និងប្រជាធិបតេយ្យ។
លិខិតរបស់ក្រុមអង្គការមិនមែនរដ្ឋាភិបាលចំនួន ១២ លើកឡើងថា សិទ្ធិមនុស្សនៅកម្ពុជា កំពុងធ្លាក់ចុះ ដែលចាំបាច់ត្រូវក្រុមប្រឹក្សាសិទ្ធិមនុស្សអន្តរជាតិយកចិត្តទុកដាក់ និងផ្ដល់អនុសាសន៍ដើម្បីអោយរដ្ឋាភិបាលយកចិត្តទុកដាក់កែលំអស្ថានភាពនេះឡើងវិញ។
ក្រុមបណ្ដាញអង្គការទាំងនោះរួមមានមជ្ឈមណ្ឌលសិទ្ធិមនុស្សកម្ពុជា សមាគមអាដហុក (ADHOC) អង្គការលីកាដូ (LICADHO) អង្គការអន្តរជាតិប្រឆាំងទារុណកម្ម (OMCT) អង្គការឃ្លាំមើលសិទ្ធិមនុស្សអន្តរជាតិ (Human Rights Watch) និងសម្ព័ន្ធអង្គការការពារសិទ្ធិមនុស្សអន្តរជាតិហៅកាត់ថា ហ្វីដ (FIDH) ជាដើម។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា អ្វីដែលក្រុមអង្គការមិនមែនរដ្ឋាភិបាលដាក់ទៅក្រុមប្រឹក្សាសិទ្ធិមនុស្សអង្គការសហប្រជាជាតិនោះ គឺជារបាយការណ៍ពីស្ថានភាពសិទ្ធិមនុស្សនៅកម្ពុជា ក្នុងរយៈពេលថ្មីៗចុងក្រោយនេះ។
លោក សំអាត បន្តថា ការចាប់ខ្លួនសមាជិកព្រឹទ្ធសភា និងសកម្មជនបក្សប្រឆាំង និងក្រុមយុវជនដែលសកម្មការពារបរិស្ថាន និងធនធានធម្មជាតិ បង្ហាញពីការរំលោភបំពានសិទ្ធិសេរីភាពខាងនយោបាយ ការបញ្ចេញមតិ និងការជួបប្រជុំ។ លើសពីនេះការរឹតដ្បិតសេរីភាពក្រោមច្បាប់សមាគម និងអង្គការមិនមែនរដ្ឋាភិបាលកំពុងជះឥទ្ធិពលនៅតាមមូលដ្ឋាន បើទោះជាច្បាប់នេះត្រូវបានអនុម័តហើយក្ដី៖ «យើងចង់អោយក្រុមប្រឹក្សសិទ្ធិមនុស្សផ្ដល់អនុសាសន៍ដល់កម្ពុជា ដើម្បីអោយមានការកែសម្រួល កែប្រែខ្លះទៅតាមកាតព្វកិច្ចរបស់ខ្លួន ដើម្បីអោយស្ថានភាពសិទ្ធិមនុស្សនៅកម្ពុជា កាន់តែល្អប្រសើរ»។
នៅក្នុងលិខិតរបស់ក្រុមអង្គការមិនមែនរដ្ឋាភិបាលដដែលក៏បានស្នើអោយអង្គការសហប្រជាជាតិនៅក្នុងកិច្ចប្រជុំលើកទី៣០ នៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ អោយអន្តរាគមន៍អោយរដ្ឋាភិបាលកម្ពុជា បញ្ឈប់រាល់ការរំលោភសិទ្ធិមនុស្សជាហូរហែមកនេះ។ រដ្ឋាភិបាលត្រូវធានាសិទ្ធិសេរីភាពនៃការតវ៉ាដោយសន្តិវិធី ការគំរាមកំហែងអ្នកការពារសិទ្ធិមនុស្ស កែលំអប្រព័ន្ធយុត្តិធម៌ បញ្ឈប់អំពើហិង្សាទាក់ទិននឹងការទាមទារសិទ្ធិដីធ្លី បំបាត់វប្បធម៌និទ្ទណ្ឌភាព និងធានាដំណើរការលទ្ធិប្រជាធិបតេយ្យ។ ជាមួយគ្នានេះក៏បានស្នើអោយបន្តអាណត្តិរបស់អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្ស និងទាមទារអោយរដ្ឋាភិបាលកម្ពុជា ធានាសហការល្អជាមួយអ្នករាយការណ៍ពិសេស និងការិយាល័យឧត្ដមស្នងការសហប្រជាជាតិនៅកម្ពុជា។
រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ហៅលិខិតរបស់ក្រុមអង្គការមិនមែនរដ្ឋាភិបាលថា គ្រាន់ជាឆាកដែលពួកគេរៀបចំសម្រាប់មន្ត្រីអង្គការសហប្រជាជាតិប៉ុណ្ណោះ។ លោកបញ្ជាក់ថា ចំណាត់ការរបស់អាជ្ញាធរនាពេលកន្លងមកគឺជាការអនុវត្តតាមគោលការណ៍នីតិរដ្ឋ៖ «ជារូបភាពអនុវត្តទៅតាមច្បាប់នីតិរដ្ឋ មិនថាអ្នកនោះជានរណាទេ អោយតែធ្វើបំពានទៅលើច្បាប់ទៅតាមនីតិវិធីតុលាការ និងច្បាប់»។
លិខិតរបស់ក្រុមអង្គការមិនមែនរដ្ឋាភិបាលក៏បានលើកឡើងពីបំណងប្រាថ្នាចង់អោយរដ្ឋាភិបាលបង្កើតផែនការសកម្មភាពជាក់ស្ដែង ដើម្បីអនុវត្តតាមអនុសាសន៍របស់អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។