ស្ត្រីខ្មែរ ២នាក់ ត្រូវបានជនជាតិថៃ ចាប់រំលោភ និង ៤នាក់ ត្រូវបៀតបៀនផ្លូវភេទ ខណៈពួកគេទាំង ៦នាក់នោះ ឈប់សំចតក្នុងផ្ទះសំណាក់មួយនៅម្តុំផ្សារឡុងគឿ ក្នុងទឹកដីថៃ ដើម្បីរង់ចាំមេខ្យល់មកទទួលយកទៅធ្វើការបន្តនៅកន្លែងផ្សេងទៀត។
អ្នកសម្របសម្រួលសមាគមការពារសិទ្ធិមនុស្សអាដហុក (adhoc) ប្រចាំខេត្តបន្ទាយមានជ័យ ប្រាប់អ្នកយកព័ត៌មានវិទ្យុអាស៊ីសេរី នៅថ្ងៃទី២៤ កក្កដា ថា ស្ត្រីខ្មែរ ៦នាក់ដែលព្យាយាមចូលក្នុងទឹកថៃ ដើម្បីស្វែងរកការងារធ្វើ មិនទាន់បានទៅដល់គោលដៅផងនោះ ត្រូវបានបុរសជនជាតិថៃ ៣នាក់ ចាប់រំលោភ។ លោកបន្តថា បុរសជនជាតិថៃ ទាំង ៣នាក់នោះ ស្លៀកសម្លៀកបំពាក់ជាយោធា ចាប់ស្ត្រីទាំង ៦នាក់ចេញពីផ្ទះសំណាក់មួយនៅម្ដុំផ្សារឡុងគឿ ក្នុងទឹកដីខេត្តស្រះកែវ។ លោកឲ្យដឹងទៀតថា ស្ត្រីក្មេងម្នាក់ក្នុងចំណោមស្ត្រីទាំង ៦នាក់នេះ ត្រូវបានថៃ ចាប់រំលោភបានសម្រេច ខណៈស្ត្រីម្នាក់ទៀតត្រូវបំពានប៉ះពាល់កេរ្តិ៍ខ្មាស។ ចំណែកស្ត្រី ៤នាក់ផ្សេងទៀតក្នុងចំណោមនេះ ត្រូវបានជនជាតិថៃ ទម្លាក់ចោលមុននឹងបែកការ៖ «អគ្គកុងស៊ុលបានប្រាប់យើងថា គាត់កំពុងតែយកចិត្តទុកដាក់យ៉ាងខ្លាំងទៅលើស្ត្រីទាំង ៦នាក់ហ្នឹង មិនឲ្យគាត់ទៅណាក្រៅពីអគ្គកុងស៊ុលទេ។ ស្នាក់នៅហ្នឹង ហើយបាយទឹកនៅហ្នឹង ដើម្បីឲ្យគាត់ជួយមើលថែរហូតដល់នីតិវិធីនៃតុលាការ បានផ្ដន្ទាទោសដល់លើជនប្រព្រឹត្តិហ្នឹងជាក់លាក់»។
ហេតុការណ៍នោះបានកើតឡើងតាំងពីថ្ងៃទី២១ ខែកក្កដា ឆ្នាំ២០១៤។
រហូតមកដល់ពេលនេះ អ្នកប្រព្រឹត្តិបទល្មើសទាំង ៣នាក់ ត្រូវបានចាប់ខ្លួន និងកំពុងកសាងសំណុំរឿងបញ្ជូនទៅតុលាការ។ ស្ត្រីរងគ្រោះមួយរូប ត្រូវគេបញ្ជូនមកស្រុកកំណើតវិញហើយ។ ចំណែកស្ត្រី ៥នាក់ក្នុងចំណោមនោះ កំពុងបន្តឲ្យស្នាក់នៅក្នុងអគ្គកុងស៊ុលខ្មែរប្រចាំខេត្តស្រះកែវ នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។