ទោះបីជាយ៉ាងណាក៏ដោយ ក៏មានអ្នកមួយចំនួនមិនមានការភ្ញាក់ផ្អើលនឹងសេចក្ដីសម្រេចនេះដែរ ដោយលើកឡើងថា វាជាទង្វើធម្មតាទៅហើយរបស់បក្សកាន់អំណាចមុនពេលដែលមានការបោះឆ្នោតម្តងៗ។ ចំណែកអ្នកកាសែតវិញយល់ថា វិទ្យុ អេហ្វ.អឹម (FM) ក្នុងស្រុក មិនគួរពឹងផ្អែកខ្លាំងពេកលើវិទ្យុបរទេសទាំងនោះទេ ហើយគួរណាស់តែខិតខំផលិតព័ត៌មានសម្រាប់ខ្លួនឯងវិញប្រសើរជាង។
ប្រជាពលរដ្ឋរាប់ទាំងពីអ្នករត់ម៉ូតូឌុប អ្នកលក់មាស រហូតដល់មន្ត្រីជាន់ខ្ពស់រដ្ឋាភិបាល អ្នកកាសែត បានសម្ដែងការសប្បាយចិត្តបន្ទាប់ពីមានសេចក្ដីប្រកាសព័ត៌មានអនុញ្ញាតឱ្យស្ថានីយវិទ្យុ FMក្នុងស្រុកទាំងអស់ អាចផ្សាយឡើងវិញនូវកម្មវិធីវិទ្យុបរទេសផ្សាយជាភាសាខ្មែរ។
ការដកបម្រាមនេះ កើតឡើងដោយសារមានការសំណូមពរមកក្រសួងព័ត៌មាន ដែលចង់ឲ្យមានការចាក់ផ្សាយឡើងវិញនូវកម្មវិធីរបស់វិទ្យុអន្តរជាតិផ្សាយជាភាសាខ្មែរ។
ប្រិយមិត្តនិយមស្តាប់វិទ្យុអន្តរជាតិទាំងនោះ បានរៀបរាប់ថា ពួកគាត់តែងតែទន្ទឹមរង់ចាំឱ្យមានការផ្សាយនេះឡើងវិញ ព្រោះពួកគាត់អាចទទួលបានអត្ថប្រយោជន៍ជាច្រើនពីការស្តាប់វិទ្យុទាំងនេះ។
អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា ថ្លែងឱ្យដឹងថា ការបើកឱ្យផ្សាយបន្តផ្ទាល់ឡើងវិញ ឬការបិទ វាជាសមត្ថកិច្ចរបស់ក្រសួង ហើយគ្រាន់តែ គ.ជ.ប តម្រូវឱ្យប្រព័ន្ធផ្សព្វផ្សាយក្នុងស្រុកទាំងអស់ប្រកាន់ជំហរអព្យាក្រឹតព័ត៌មានអំពីការបោះឆ្នោត៖ «ហើយប្រសិនជាមានការបើកឱ្យផ្សព្វផ្សាយអ៊ីចឹង គឺជាការល្អ ហើយ គ.ជ.ប ក៏បានអំពារនាវ ការផ្សព្វផ្សាយព័ត៌មានបោះឆ្នោតក៏សូមមេត្តាយកចិត្តទុកដាក់ ធ្វើយ៉ាងណាឱ្យមានតុល្យភាពនៃព័ត៌មាន អាចឱ្យប្រជាពលរដ្ឋខ្មែរទទួលបានព័ត៌មានល្អ មានមូលដ្ឋានក្នុងការសម្រេចចិត្ត»។
យ៉ាងណាក៏ដោយ ក៏លោក ឆាយ សុផល សាស្ត្រាចារ្យផ្នែកសារព័ត៌មាន និងជាអ្នកកាសែតអាជីពមួយរូបមិនបានសម្ដែងការភ្ញាក់ផ្អើលអ្វីទេទៅនឹងសេចក្ដីសម្រេចឱ្យផ្សាយបន្តវិទ្យុអន្តរជាតិឡើងវិញនោះ។
លោកថា នេះមិនមែនជាលើកដំបូងទេដែលរដ្ឋាភិបាលបានធ្វើដូចនេះ ពោលគឺមានការធ្វើបែបនេះតាំងពីអាណត្តិមុនៗមកម្ល៉េះ៖ «សម្រាប់ខ្ញុំ សេចក្ដីប្រកាសនេះមិនភ្ញាក់ផ្អើលនោះទេ ពីព្រោះប៉ុន្មានថ្ងៃចុងក្រោយនេះខ្ញុំឃើញថា វិទ្យុបរទេសជាខេមរភាសានេះផ្ដល់ឱកាសដល់គណបក្សប្រឆាំង និងអ្នកដែលមិនមែនជាសម្ព័ន្ធមិត្តរបស់រដ្ឋាភិបាល ឬគណបក្សកាន់អំណាចវាយលុកយ៉ាងខ្លាំង។ ដូច្នេះ ខ្ញុំគិតថា ក្រសួងព័ត៌មានស្ថិតក្រោមរដ្ឋាភិបាល គឺគាត់នឹងធ្វើអ្វីមួយ (ទាក់ទង) នឹងការផ្សាយនេះ។ ការរំពឹងទុករបស់ខ្ញុំ គឺដូចខ្ញុំស្មានអ៊ីចឹង»។
នៅក្នុងសេចក្ដីជូនដំណឹងដែលចេញចុះកាលបរិច្ឆេទនៅថ្ងៃទី២៩ ខែមិថុនា ក៏បានសរសេរផងដែរថា៖ "ទន្ទឹមនេះ ក្រសួងព័ត៌មានសូមឱ្យប្រព័ន្ធផ្សព្វផ្សាយទាំងអស់យកចិត្តទុកដាក់ អនុវត្តតាមសេចក្ដីណែនាំរបស់ក្រសួងព័ត៌មាន ដែលចុះហត្ថលេខាដោយលោក ខៀវ កាញារីទ្ធ នៅថ្ងៃទី២១ ខែមិថុនា"។
សេចក្ដីប្រកាសថ្ងៃទី២១ មិថុនា នោះ តម្រូវឲ្យស្ថានីយវិទ្យុ FM ទាំងអស់បញ្ឈប់ការផ្សាយបន្តពីវិទ្យុបរទេសអំពីការស្ទង់មតិ លទ្ធផលនៃការស្ទង់មតិដែលទាក់ទងនឹងដំណើរការបោះឆ្នោតក្នុងរយៈពេល ៥ថ្ងៃមុនការបោះឆ្នោត និងថ្ងៃបោះឆ្នោត ព្រមទាំងបញ្ឈប់ការផ្សាយសកម្មភាពឃោសនាអ្វីទាំងអស់ក្នុងអំឡុងពេល ២៤ម៉ោងមុនថ្ងៃបោះឆ្នោត និងក្នុងថ្ងៃបោះឆ្នោត។
យ៉ាងណាក៏ដោយ ក៏រដ្ឋមន្ត្រីក្រសួងព័ត៌មានរូបនេះ បានបដិសេធថា លោកមិនជាប់ពាក់ព័ន្ធទៅនឹងការសម្រេចចេញសេចក្ដីប្រកាសហាមប្រាមមិនឱ្យវិទ្យុក្នុងស្រុកផ្សាយបន្តវិទ្យុអន្តរជាតិផ្សាយជាខេមរភាសានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។