ក្រុមសន្តិសុខរបស់សាលារាជធានីភ្នំពេញ ប្រើហិង្សាបណ្ដេញក្រុមពលរដ្ឋជម្លោះដីធ្លីមិនឲ្យតវ៉ានៅមុខសាលារាជធានីភ្នំពេញ និងបណ្ដេញអ្នកកាសែតចេញពីទីនោះមិនឲ្យយកព័ត៌មានដែរ។ អ្នកសារព័ត៌មានណានៅតែចចេសថតរូប ត្រូវក្រុមសន្តិសុខទាញកន្ត្រាក់យកម៉ាស៊ីនថតរូប និងទូរស័ព្ទ និងព្រមទាំងព្រមានវ៉ៃអ្នកកាសែតថែមទៀត។ ស្ថាប័នធ្វើការទាក់ទងនឹងវិស័យសារព័ត៌មាន ថ្កោលទោសសកម្មភាពទាំងនេះ ខណៈដែលសាលារាជធានីភ្នំពេញ ថានឹងកែតម្រូវ ប្រសិនសកម្មភាពរបស់ក្រុមសន្តិសុខជ្រុលជ្រួស។
ក្រោយលោកនាយករដ្ឋមន្ត្រី ហ៊ុន សែន ព្រមានចាប់អ្នកពាក់ព័ន្ធនឹងករណីអំពើហិង្សាលើក្រុមសន្តិសុខសាលារាជធានីភ្នំពេញ ក្រុមសន្តិសុខទាំងនោះហាក់សម្ដែងឫទ្ធិអំណាចរបស់ខ្លួនទ្វេដង ដែលកាលពីមុនបង្ក្រាបតែអ្នកធ្វើបាតុកម្ម ប៉ុន្តែពេលនេះសូម្បីតែអ្នកកាសែត ក៏ក្រុមនេះបង្ក្រាប និងបណ្ដេញមិនឲ្យយកព័ត៌មានដែរ។
អំពើហិង្សាមួយដែលផ្ទុះឡើងដោយកងសន្តិសុខ បណ្ដេញក្រុមស្ត្រីបឹងកក់ចេញពីមុខសាលារាជធានីភ្នំពេញ នៅថ្ងៃទី៦ ខែសីហា ធ្វើឲ្យអ្នកតវ៉ាមួយចំនួនរងរបួស។ ជាងនេះទៅទៀត ក្រុមសន្តិសុខទាញកន្ត្រាក់ម៉ាស៊ីនថតរូបពីអ្នកសារព័ត៌មានវីអូឌី (VOD) កាសែតមនោរម្យ កន្ត្រាក់យកទូរស័ព្ទពីអ្នកទាមទារ ហើយទម្រាំការប៉ះទង្គិចនេះបញ្ចប់ ទើបសន្តិសុខប្រគល់ឲ្យវិញ។
អគ្គលេខានៃក្លឹបអ្នកកាសែតកម្ពុជា លោក ពុយ គា ឲ្យវិទ្យុអាស៊ីសេរី ដឹងពីប្រទេសម៉ាឡេស៊ី ថា សកម្មភាពរបស់ក្រុមសន្តិសុខជាការបន្ទច់បង្អាក់សេរីភាពសារព័ត៌មាន ដែលមានសិទ្ធិគ្រប់គ្រាន់អាចផ្ដិតយកយកព្រឹត្តិការណ៍ដែលកើតឡើងនៅទីសាធារណៈ។ លោកបន្តថា ករណីនេះ ក្លឹបអ្នកកាសែតមិននៅស្ងៀមទេ នឹងប្រជុំជជែកគ្នាថាគួរនឹងធ្វើយ៉ាងណា ដើម្បីការពារសិទ្ធិអ្នកកាសែត៖ «រាល់ការមានការហាមអ្នកសារព័ត៌មានមិនឲ្យចូលយកព័ត៌មាននៅកន្លែងណាមួយ គឺវាមិនបានជួយលើកតម្កើងដល់សេរីភាពសារព័ត៌មានទេ»។
កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន តែងតែថ្លែងប្រាប់ឲ្យសមត្ថកិច្ច ស្វែងរកចាប់អ្នកពាក់ព័ន្ធនឹងអំពើហិង្សាកាលពីថ្ងៃទី១៥ ខែកក្កដា ឆ្នាំ២០១៤ ដែលធ្វើឲ្យសន្តិសុខសាលារាជធានីភ្នំពេញរងរបួស។ ប៉ុន្តែ លោក ហ៊ុន សែន មិនថ្លែងទាល់តែសោះឲ្យស្វែងរក ឬចាប់ខ្លួនក្រុមសន្តិសុខសាលារាជធានីភ្នំពេញ ដែលប្រើហិង្សាបង្កឲ្យពលរដ្ឋរងរបួស ឬអ្នកកាសែតរងបួស។
ពាក់ព័ន្ធករណីនេះ ប្រធានមជ្ឈមណ្ឌលដើម្បីប្រព័ន្ធផ្សព្វផ្សាយឯករាជ្យនៅកម្ពុជា (CCIM) លោក ប៉ា ងួនទៀង ហៅសកម្មភាពរបស់មន្ត្រីសាធារណៈនេះ ថាជាការខ្វះការយល់ដឹងពីសារព័ត៌មាន និងប្រព័ន្ធគ្រប់គ្រងរបស់រដ្ឋ អនុញ្ញាតឲ្យក្រុមទាំងនោះហ៊ានធ្វើសកម្មភាពរំលោភបំពានដូចនេះ៖ «នាយករដ្ឋមន្ត្រីបង្ហាញភាពកាច សន្តិសុខយល់ថា នាយករដ្ឋមន្ត្រីធ្វើសម គាត់ខំធ្វើចឹងដែរឲ្យសមដូចនាយករដ្ឋមន្ត្រី ដើម្បីបំពេញចិត្តនាយករដ្ឋមន្ត្រី»។
អនុរដ្ឋលេខាធិការនៃក្រសួងព័ត៌មាន លោក អ៊ុក គឹមសេង និយាយថា បើសិនមានការណែនាំពីសមត្ថកិច្ច អ្នកសារព័ត៌មានគួរស្តាប់តាមការណែនាំនោះ ប៉ុន្តែលោកមិនឯកភាពសកម្មភាពរបស់សន្តិសុខ ដែលទាញយកម៉ាស៊ីនថតរូបអ្នកសារព័ត៌មាននោះទេ៖ «រឿងទាញយកម៉ាស៊ីនថតរូបអ្នកសារព័ត៌មាន សន្តិសុខគួរតែយល់ដឹងសិទ្ធិសេរីភាពអ្នកសារព័ត៌មាន មិនគួរធ្វើអ៊ីចឹងទេ»។
ច្បាប់ស្ដីពីរបបសារព័ត៌មានមាត្រា៥ ចែងថា អ្នកសារព័ត៌មានមានសិទ្ធិទទួលដែលស្ថិតក្នុងការគ្រប់គ្រងរបស់រដ្ឋាភិបាល លើកលែងតែព័ត៌មានណាដែលបណ្ដាលឲ្យអន្តរាយដល់សន្តិសុខជាតិ បំពានសិទ្ធិបុគ្គលម្នាក់ ជាដើម។
នៅថ្ងៃទី៦ ខែសីហា មជ្ឈមណ្ឌលដើម្បីប្រព័ន្ធផ្សព្វផ្សាយឯករាជ្យនៅកម្ពុជា បានចេញសេចក្តីប្រកាសព័ត៌មាន ថ្កោលទោសក្រុមសន្តិសុខសាលារាជធានីភ្នំពេញ ដែលបានប្រើហិង្សាលើអ្នកថតរូបឲ្យទូរទស្សន៍អនឡាញ វីអូឌី (VOD) និងបានដកកន្ត្រាក់យកម៉ាស៊ីនថត រួចលុបរូបនោះចោល។
ឆ្លើយតបការលើកឡើងនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា សកម្មភាពដែលក្រុមសន្តិសុខធ្វើ គឺដើម្បីបំបែកអ្នកធ្វើបាតុកម្មគ្មានច្បាប់អនុញ្ញាត។ ទោះបែបនេះក្តី លោក ឡុង ឌីម៉ង់ ថា ប្រសិនបើសកម្មភាពក្រុមសន្តិសុខធ្វើក្នុងពេលនោះជ្រុលជ្រួស សាលារាជធានីភ្នំពេញនឹងកែតម្រូវ៖ «បើសិនជាមានការប៉ះពាល់បន្តិចបន្តួចការងារណាមួយនឹងអ្នកសារព័ត៌មាន យើងខ្ញុំនឹងទទួលយកនូវបញ្ហានេះ ដើម្បីកែតម្រូវនៅពេលក្រោយ»។
មិនមែនជាលើកទី១ ទេដែលក្រុមសន្តិសុខសាលារាជធានីភ្នំពេញរារាំង និងចាប់យកឧបករណ៍របស់អ្នកសារព័ត៌មានក្នុងពេលបំពេញបេសកកម្ម។ កាលពីឆ្នាំ២០១៤ អ្នកយកព័ត៌មានម្នាក់នៃវិទ្យុសំឡេងប្រជាធិបតេយ្យវីអូឌី ត្រូវក្រុមសន្តិសុខវ៉ៃរហូតសន្លប់ និងត្រូវដឹកបញ្ជូនទៅសង្គ្រោះនៅក្រៅប្រទេស។ អង្គការអ្នកកាសែតគ្មានព្រំដែន (រីផតធើ វីដដៅត៍ បរឌើ = Reporters Without Borders) ថា សេរីភាពសារព័ត៌មានក្នុងប្រទេសកម្ពុជា មានស្ថានភាពអាក្រក់ ធៀបនឹងប្រទេសមួយចំនួននៅក្នុងអាស៊ាន ដូចជាប្រទេសឥណ្ឌូនេស៊ី ប្រទេសថៃ និងប្រទេសប្រ៊ុយណេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។