អ្នកភូមិពីរនាក់ បានចូលខ្លួនទៅបំភ្លឺចំពោះករណីដែលពួកគាត់រិះគន់អាជ្ញាធរមូលដ្ឋានឃុំតាសាញ នៅល្ងាចថ្ងៃទី៩ ខែមីនា។ អ្នកភូមិទាំងពីរនាក់នោះ ម្នាក់ឈ្មោះ ហេង សុមាលី ជាសកម្មជនរបស់មជ្ឈមណ្ឌលសិទ្ធិមនុស្សកម្ពុជា និងឈ្មោះ ប៉ាក ខូយ ជាអ្នករស់នៅភូមិអូរស្ងួត ឃុំតាសាញ ស្រុកសំឡូត ខេត្តបាត់ដំបង។
ឈ្មោះ ហេង សុមាលី ថ្លែងថា នាយប៉ុស្តិ៍រដ្ឋបាលនគរបាលឃុំតាសាញ លោក ហែម សារ៉ុម បានចេញលិខិតកោះឲ្យរូបលោក និងឈ្មោះ ប៉ាក ខូយ ចូលខ្លួនបំភ្លឺពីដំណើររឿងដែលពួកគាត់រាយការណ៍ប្រាប់វិទ្យុអាស៊ីសេរី លើករណីអាជ្ញាធរមូលដ្ឋានរៃអង្គាសលុយពីអ្នកភូមិយកទៅជួយក្រុមនិស្សិតស្ម័គ្រចិត្តរបស់ លោកនាយករដ្ឋមន្ត្រី ហ៊ុន សែន។
លោក ហេង សុមាលី៖ «វាអត់មានឯកសារអី ហើយដំណើររឿងអីក៏អត់មានដែរ មានតែរឿងខ្ញុំប្រាប់អាស៊ីសេរី ថា មេភូមិយកលុយប្រជាពលរដ្ឋហ្នឹង គឺយកពិតមែន អត់មានរឿងអីផ្សេងទេ ព្រោះករណីផ្សេងអត់បានប្រព្រឹត្តខុសច្បាប់ព្រហ្មទណ្ឌអី អត់មានទេ មានតែរឿងហ្នឹង មន្ត្រីប៉ុស្តិ៍ហ្នឹងគេចង់គាបសង្កត់ពីរឿងឯកសារ មានភស្តុតាងឯណា ដែលមេភូមិអីទៅយកលុយ គេចង់សួរអ៊ីចឹង ប៉ុន្តែត្រូវមានការពិតដឹងពេញភូមិ»។
វិទ្យុអាស៊ីសេរី មិនអាចទាក់ទងលោក ហែម សារ៉ុម ជានាយប៉ុស្តិ៍នគរបាលឃុំតាសាញ ដើម្បីបញ្ជាក់ជុំវិញករណីខាងលើនេះបានទេ។
មន្ត្រីអង្គការសិទ្ធិមនុស្សលីកាដូ លោក ហេង សាយហុង ថ្លែងថា ការកោះហៅរបស់ប៉ូលិស គឺជារូបភាពគំរាមកំហែង ព្រោះការដែលអ្នកភូមិនិយាយប្រាប់ពីរឿងអាជ្ញាធររៃអង្គាសលុយពីអ្នកភូមិ យកទៅជួយក្រុមនិស្សិត ពុំមានបទល្មើសនោះទេ។
លោក ហេង សាយហុង៖ «ព្រោះលោកមេឃុំ គាត់បានបំភ្លឺរៀបរាប់អស់ហើយ បើសិនជារឿងគ្មានបទល្មើសអីចែងនៅក្នុងច្បាប់ទេ វាជាសិទ្ធិសេរីភាពនៅក្នុងការបញ្ចេញមតិយោបល់ នេះជាការគំរាមកំហែងបំភិតបំភ័យទៅលើប្រជាពលរដ្ឋ ក្នុងការបញ្ចេញមតិ។ អ្វីដែលគាត់ជួបប្រទះ អ្វីដែលគាត់ជួបការលំបាក ការកោះហៅរបស់សមត្ថកិច្ចនគរបាលនេះ ជារឿងមួយមិនធម្មតាទេ ធ្វើឲ្យប្រជាពលរដ្ឋមានការភ័យខ្លាចថ្ងៃក្រោយគាត់មិនហ៊ាននិយាយធ្វើឲ្យបាត់បង់សិទ្ធិសេរីភាព ក្នុងការបញ្ចេញមតិរបស់គាត់»។
មេឃុំតាសាញ លោក ជន ផេង បញ្ជាក់កាលពីថ្ងៃទី៧ ខែមីនា ថា ការរៃអង្គាសលុយពីអ្នកភូមិនោះ គឺធ្វើឡើងតាមគោលការណ៍របស់អាជ្ញាធរមូលដ្ឋាន ដែលចង់ឲ្យអ្នកភូមិមានភាពជិតស្និទ្ធជាមួយក្រុមនិស្សិត។ អាជ្ញាធរមូលដ្ឋានសុំប្រជាពលរដ្ឋឲ្យជួយ ទាំងថវិកា និងការធ្វើម្ហូបអាហារផ្ដល់ឲ្យនិស្សិតរួមទាំងក្រុមការងារចម្រុះដែលគ្នាជាង ៣០នាក់ ដែលកំពុងស្នាក់នៅក្នុងសាលាឃុំតាសាញ។
តែអ្នកភូមិប្រតិកម្មថា និស្សិតចុះទៅវាស់វែងដីធ្លីជូនប្រជាពលរដ្ឋនោះ គឺលោកនាយករដ្ឋមន្ត្រី ហ៊ុន សែន បានផ្គត់ផ្គង់ស្បៀងអាហារមិនឲ្យខ្វះខាត ហើយហាមមិនឲ្យទៅរៃអង្គាសលុយពីប្រជាពលរដ្ឋនោះដែរ។
មន្ត្រីអង្គការសិទ្ធិមនុស្សលីកាដូ លោក ហេង សាយហុង ចាត់ទុកថា អាជ្ញាធរមូលដ្ឋានឃុំតាសាញ អនុវត្តខុសពីគោលនយោបាយចាស់សកម្មភាពថ្មីរបស់លោកនាយករដ្ឋមន្ត្រី ហ៊ុន សែន។ ការចាប់បង្ខំឲ្យប្រជាពលរដ្ឋបង់លុយ ហើយអ្នកមិនបង់លុយ គេមិនវាស់ដីឲ្យនោះ គឺជារឿងមិនត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។