ក្រុមគ្រួសាររបស់អ្នកភូមិប្រម៉ា បានសម្ដែងការខកចិត្តលាយឡំនិងក្ដីព្រួយបារម្ភ ក្នុងគ្រាដែលគេដោះលែងលោក ម៉ម សូណង់ដូ ចេញពីពន្ធនាគារព្រៃស នៅព្រឹកថ្ងៃទី១៥ ខែមីនា ហើយស្វាមីរបស់ពួកគាត់មិនត្រូវបានដោះលែងនៅឡើយនោះ។
ស្ត្រីឈ្មោះ ស្រេង ភោ ជាភរិយារបស់បុរសឈ្មោះ កាន់ សុវណ្ណ ដែលជាប់ចោទពីបទសម្លុតគំរាម និងប្រឆាំងអ្នករាជការសាធារណៈ មានស្ថានទម្ងន់ទោស នៅភូមិប្រម៉ា បានមកដល់ពន្ធនាគារព្រៃស ថ្លែងនៅថ្ងៃទី១៥ មីនា ថា អ្នកស្រីកំពុងរង់ចាំមើលផ្លូវ ក្រែងស្វាមីរបស់គាត់បានចេញពីពន្ធនាគារនៅថ្ងៃទី១៥ មីនា ដែរ។ គាត់នៅតែមិនអស់ចិត្ត ខ្លាចមានការប្រែក្រឡាស់ចំពោះការដោះលែងនេះ។
លោកស្រី ស្រេង ភោ៖ «ថ្ងៃប្រជុំម្សិលមិញហ្នឹង ថាថ្ងៃទី១៥ ហ្នឹង ថាដោះលែងទាំងអស់គ្នា ព្រោះទោសតាខ្ញុំ ១០ខែ គាត់ ៨ខែ តាខ្ញុំជាប់មុន ២ខែ។ ឥឡូវអត់ទាន់ឃើញ ខ្ញុំមិនជាយ៉ាងម៉េចយ៉ាងម៉ាទេ នៅក្នុងចិត្តខ្ញុំអត់រំភើបទៀតទេ ដូចពិបាកក្នុងចិត្តណា ដូចមិនទុកចិត្តមិនដឹងថា ដោះឬមិនដោះបើអ៊ីចឹង។ ឮថាចេញទាំងអស់គ្នា ឥឡូវចេញតែម្នាក់ នៅបីនាក់ អ៊ីចឹងខ្ញុំខកចិត្តធំហ្មង។ ខ្ញុំឃើញថា សូណង់ដូ គាត់មានសមាជិកគាត់ច្រើនអបអរ ដូចខ្ញុំមានអីមានតែប្ដីប្រពន្ធ មកសុទ្ធតែអ្នកកំព្រីកំព្រាគ្មានលុយកាក់ទេ បានអង្គការលីកាដូ (Licadho) ទេជួយ»។
កាលពីថ្ងៃទី១៤ មីនា ចៅក្រមសាលាឧទ្ធរណ៍សម្រេចដោះលែងលោក ម៉ម សូណង់ដូ និងអ្នកភូមិប្រម៉ា ២នាក់ទៀត អោយមានសេរីភាព តាមរយៈការសម្រាលអោយអនុវត្តទោសក្នុងពន្ធនាគារពី ៨ ទៅ ១០ខែ ពោលគឺកាត់តម្រឹមអោយស្មើនឹងរយៈពេលដែលពួកគាត់ត្រូវចាប់ និងឃុំខ្លួនរួចមកហើយ។
ឆ្លើយតបបញ្ហានេះ មេធាវីនៃសមាគមអាដហុក (Adhoc) ការពារក្ដីអ្នកភូមិប្រម៉ា លោក ឡុង លន់ មានប្រសាសន៍ថា លោកបានជំរុញកិច្ចការដោះលែងអ្នកភូមិទាំងពីរនាក់ដែលជាកូនក្ដីរបស់លោកទៅសាលាឧទ្ធរណ៍ឲ្យបានទាន់កាលកំណត់ ជៀសវាងការអូសបន្លាយពេលវេលា៖ «សាលដីកាសាលាឧទ្ធរណ៍ដែលប្រកាសសាលដីកាម្សិលមិញហ្នឹង គឺគាត់ត្រូវចេញនៅថ្ងៃស្អែក ថ្ងៃ១៦ ខែ៣ ព្រោះវារយៈពេល ១០ខែ។ សាលាឧទ្ធរណ៍បានបញ្ជូនឯកសារពាក់ព័ន្ធទៅនាយកដ្ឋានពន្ធនាគារហើយ។ យើងសង្ឃឹមថា នឹងមានការដោះលែងទៅតាមការកាលកំណត់ដែលសាលាឧទ្ធរណ៍បានសម្រេច»។
អ្នកភូមិប្រម៉ា ២នាក់ មានឈ្មោះ ទូច រៀម ត្រូវបានតុលាការចោទប្រកាន់ចំនួន ៤បទចោទ គឺបទឆបោកមានស្ថានទម្ងន់ទោស បទជ្រៀតជ្រែកខុសច្បាប់ក្នុងការបំពេញមុខងារសាធារណៈ បទកាន់កាប់ និងដឹកជញ្ជូនអាវុធដោយគ្មានការអនុញ្ញាត និងបទមួយទៀត ប្រឆាំងអ្នករាជការសាធារណៈមានស្ថានទម្ងន់ទោស ចាប់ខ្លួនកាលពីថ្ងៃទី១៦ ខែឧសភា ឆ្នាំ២០១២ ត្រូវសាលាដំបូងសម្រេចដាក់ទោសចំនួន ៥ឆ្នាំ។
អ្នកភូមិម្នាក់ទៀត ឈ្មោះ កាន់ សុវណ្ណ ជាប់ចោទពីបទសម្លុតគំរាម និងបទប្រឆាំងអ្នករាជការសាធារណៈមានស្ថានទម្ងន់ទោស ចាប់ខ្លួនកាលពីថ្ងៃទី១៦ ខែឧសភា ឆ្នាំ២០១២ ត្រូវសាលាដំបូងសម្រេចដាក់ទោសចំនួន ៣ឆ្នាំ។
ប៉ុន្តែ ក៏ត្រូវសាលាឧទ្ធរណ៍បន្ធូរបន្ថយទោសអោយជាប់ពន្ធនាគារត្រឹម ១០ខែ ដោយសំអាងថា ពួកគាត់មានចំណេះដឹងតិចតួច ខ្វះការពិចារណា ងាយនឹងត្រូវគេបញ្ចុះបញ្ចូល ត្រូវទទួលបានការសម្រាលទោស។
គិតពីថ្ងៃចាប់ខ្លួនកាលពីថ្ងៃទី១៦ ខែឧសភា ឆ្នាំ២០១២ អ្នកភូមិទាំងពីរនឹងត្រូវជាប់ពន្ធនាគារគម្រប់ ១០ខែ នៅថ្ងៃទី១៦ ខែមីនា។ ដោយឡែក បុរសអ្នកភូមិប្រម៉ា ម្នាក់ទៀត ឈ្មោះ ភន ស្រឿន ដែលត្រូវចាប់ខ្លួននៅថ្ងៃជាមួយគ្នា ត្រូវសាលាដំបូងផ្ដន្ទាទោសជាប់ពន្ធនាគារចំនួន ១០ខែ ពីបទប្រឆាំងអ្នករាជការសាធារណៈមានស្ថានទម្ងន់ទោស ក៏នឹងត្រូវដោះលែងនៅថ្ងៃទី១៦ មីនា ដែរ។
ភរិយារបស់អ្នកភូមិជាប់ពន្ធនាគារ មានសង្ឃឹមថា នៅពេលស្វាមីរបស់ពួកគាត់ចេញពីពន្ធនាគារវិញ នឹងមានកម្លាំងជួយក្នុងការងារស្រែកចម្ការ ដើម្បីបានកម្រៃខ្លះសងបំណុលគេ ហើយកូនៗក៏បានចូលរៀនវិញទាំងអស់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។