ព្រះសង្ឃប្រមាណ ២០អង្គ និងប្រជាពលរដ្ឋដែលមានជម្លោះដីធ្លី និងអង្គការសង្គមស៊ីវិលប្រហែល ៣០០នាក់ បានជួបជុំគ្នាធ្វើយុទ្ធនាការនៅខាងមុខពន្ធនាគារព្រៃស កាលពីព្រឹកថ្ងៃទី២៨ ខែធ្នូ។ ការប្រមូលផ្គុំជាថ្មីទៀតនៅពេលនេះ គឺសូមឲ្យស្ត្រីបឹងកក់ ៨នាក់ ដែលកំពុងជាប់ឃុំនៅក្នុងពន្ធនាគារ ចាប់ផ្ដើមហូបអាហារឡើងវិញ បន្ទាប់ពីធ្វើកូដកម្មបង្អត់អាហារអស់ពេលជាង ១០ថ្ងៃកន្លងទៅ ដើម្បីទាមទារសិទ្ធិសេរីភាពបាននៅក្រៅឃុំ។
គ្រួសាររបស់ស្ត្រីបឹងកក់ ដែលកំពុងជាប់ឃុំ និយាយថា មូលហេតុដែលធ្វើយុទ្ធនាការនេះ គឺដើម្បីលើកទឹកចិត្តឲ្យអ្នកដែលធ្វើកូដកម្មបង្អត់អាហារនៅក្នុងពន្ធនាគារ ទាំង ៨នាក់ ពិសាអាហារឡើងវិញ ដើម្បីត្រៀមខ្លួនតតាំងនៅថ្ងៃសវនាការដែលគ្រោងនឹងជំនុំជម្រះនៅថ្ងៃទី២២ ខែមករា ឆ្នាំ២០១៤ នៅសាលាឧទ្ធរណ៍ប្រឆាំងនឹងសេចក្ដីសម្រេចនៃសាលក្រមសាលាដំបូងរាជធានីភ្នំពេញ។
ស្វាមីរបស់លោកស្រី ទេវ វន្នី គឺលោក អ៊ូ គង់ជា ឲ្យដឹងកាលពីព្រឹកថ្ងៃទី២៨ ខែធ្នូ ថា មូលហេតុដែលពួកគាត់ជួបជុំគ្នានៅខាងមុខពន្ធនាគារទៀត នៅពេលនេះ គឺដើម្បីជំរុញលើកទឹកចិត្តឲ្យស្ត្រីដែលធ្វើកូដកម្មបង្អត់អាហារ តាំងស្មារតី ហើយខិតខំហូបអាហារឡើងវិញដើម្បីមានកម្លាំងនៅថ្ងៃសវនាការខាងមុខនេះ៖ «យុទ្ធនាការថ្ងៃនេះគឺដើម្បីលើកទឹកចិត្តគាត់ ដើម្បីឲ្យគាត់ពិសាអាហារឡើងវិញ ព្រោះពួកគាត់អត់អាហារអស់រយៈពេលជាង ១០ថ្ងៃមកហើយ។ យើងបារម្ភសុខភាពពួកគាត់»។
នេះជាយុទ្ធនាការចូលដល់សប្ដាហ៍ទី៥ហើយ បន្ទាប់ពីសកម្មភាពតវ៉ាកាលពី ៤លើកកន្លងទៅដើម្បីទាមទារឲ្យដោះលែងព្រះសង្ឃ ៣អង្គ និងសកម្មជនដីធ្លី ព្រមទាំងគណបក្សនយោបាយ ១៦នាក់ ពុំមានការឆ្លើយតប។ គិតមកដល់ពេលនេះ សកម្មជនតស៊ូរឿងដីធ្លីនៅតំបន់បឹងកក់ ៨នាក់ បានធ្វើកូដកម្មបង្អត់អាហារប្រឆាំងសាលក្រមសាលាដំបូងរាជធានីអស់ពេលជាង ១០ថ្ងៃកន្លងមកហើយ។
ក្រៅពីនេះ អ្នកជាប់ឃុំដែលជាសកម្មជនដីធ្លី សកម្មជនគណបក្សនយោបាយ និងព្រះសង្ឃ ត្រូវបានពន្ធនាគាររឹតបន្តឹងការណាត់ជួប និងចូលសួរសុខទុក្ខ ចាប់តាំងពីថ្ងៃច័ន្ទ ទី២២ ធ្នូ កន្លងទៅនេះ។
លោក អ៊ូ គង់ជា និយាយថា ពួកគាត់ដែលជាសាច់ញាតិពុំសូវដែលបានទទួលព័ត៌មានគ្រប់គ្រាន់ឡើយពីអ្នកនៅក្នុងពន្ធនាគារមួយរយៈចុងក្រោយនេះ ដោយហេតុថា ខាងពន្ធនាគារអនុញ្ញាតឲ្យជួបបាន ២ដងក្នុងមួយសប្ដាហ៍ប៉ុណ្ណោះ។ លោកបន្តថា ដោយឡែកអ្នកទោសផ្សេងវិញ គេអាចជួបបានរហូតដល់ ៣ដងក្នុងមួយសប្ដាហ៍។
លោក ណៃ វ៉ង់ដា មន្ត្រីឃ្លាំមើលសិទ្ធិមនុស្សនៃសមាគមអាដហុក (Adhoc) ចាត់ទុកថា នេះគឺជាសកម្មដែលរើសអើងប្រឆាំងសកម្មជនដីធ្លី និងគណបក្សនយោបាយពីខាងពន្ធនាគារ។ លោកយល់ឃើញថា ខាងពន្ធនាគារពុំគួរប្រើប្រាស់ស្តង់ដារពីរខុសគ្នាដែលនាំឲ្យមានបញ្ហាដូច្នេះឡើយ។
ឆ្លើយតបរឿងនេះ លោក សន កែវ មន្ត្រីនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ អះអាងថា ខាងពន្ធនាគារគឺពុំមានការរឹតត្បិត ឬរើសអើងអ្នកទោសណាមួយឡើយ ជាពិសេសពន្ធនាគារ គឺមានច្បាប់ទម្លាប់ត្រឹមត្រូវ និងវិន័យក្រឹត្យក្រមក្នុងការចូលសួរសុខទុក្ខម្តងៗ៖ «ពុំមែនជាការពិតទេ ព្រោះការជួបការអីគេមាននីតិវិធីរបស់គេគ្រប់គ្រាន់ត្រឹមត្រូវ ពុំមានការរើសអើងទេ»។
ចំណែកពិធីដែលរៀបចំធ្វើកាលពីព្រឹកថ្ងៃទី២៨ ធ្នូ នៅខាងមុខមណ្ឌលអប់រំកែប្រែម២ ឯណេះវិញ គឺអ្នកចូលរួមបាននិមន្តព្រះសង្ឃប្រមាណ ២០អង្គ ដែលមានបាត្រនៅក្នុងព្រះហស្ត (ដៃ) បានធ្វើដំណើរក្នុងល្បឿនយឺតៗ ឆ្ពោះមកក្បែររបាំងពន្ធនាគារដោយនៅអមសង្ខាងផ្លូវគឺមានប្រជាពលរដ្ឋឈរជាពីរជួរ សម្រាប់រង់ចាំបាចផ្កាឈូក មុននឹងដល់របាំងរបស់សមត្ថកិច្ច។ បន្ថែមពីលើនេះ ក្រុមអ្នកតវ៉ាក៏បានស្រែកទាមទារឲ្យដោះលែងសកម្មជនដីធ្លី ព្រះសង្ឃ និងសកម្មជនគណបក្សនយោបាយដោយគ្មានលក្ខខណ្ឌផងដែរ។
លោក ណៃ វ៉ង់ដា អនុប្រធានស៊ើបអង្កេតដីធ្លីនៃសមាគមអាដហុក យល់ឃើញថា សកម្មភាពនេះគឺជាសារមួយក្នុងការជំរុញឲ្យមានកម្លាំងសាមគ្គីភាពពីសហគមន៍មួយទៅសហគមន៍មួយផ្សេងទៀត៖ «សំឡេង»។
ដោយឡែកកម្លាំងមានសមត្ថកិច្ចរបស់រដ្ឋាភិបាលវិញ មិនត្រូវបានដាក់ឲ្យឃ្លាំមើល ឬយាមការពារដូចលើកមុនៗឡើយ ក្រៅពីមានរបាំងដាក់នៅខាងមុខច្រកចូលនៃពន្ធនាគារប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។