ពលរដ្ឋខកចិត្តចំពោះប្រធានក្រុមប្រឹក្សាខេត្តក្រចេះមិនស្ដាប់សំណើនៅចុងម៉ោងវេទិកា
2014.12.23
វេទិកាសាធារណៈរបស់ក្រុមប្រឹក្សាខេត្តក្រចេះ កាលពីថ្ងៃទី២២ ខែធ្នូ ឆ្នាំ២០១៤។
នៅថ្ងៃទី២២ ធ្នូ មានការរៀបចំធ្វើវេទិកាសាធារណៈមួយនៅខេត្តក្រចេះ ដោយមានមន្ត្រីខេត្តចូលរួម។ នៅក្នុងវេទិកានោះ ប្រជាពលរដ្ឋដែលជាអាជីវករបានចោទសួរនៅក្នុងម៉ោងចុងក្រោយ ប៉ុន្តែត្រូវប្រធានក្រុមប្រឹក្សាខេត្ត លោក នូ ភឿង បដិសេធមិនស្តាប់ ដោយលោកបញ្ជាក់ថា អស់ពេល។ ចំណែកក្រុមអាជីវករទាំងនោះ បានត្រឹមសម្ដែងការសោកស្ដាយហួសចិត្ត ចំពោះចម្លើយរបស់លោកប្រធានក្រុមប្រឹក្សាខេត្ត។
ពលរដ្ឋមួយក្រុម បានឡើងសំពះអង្វរក្នុងវេទិកាសាធារណៈ ដើម្បីអន្តរាគមន៍ពីប្រធានក្រុមខេត្តក្រចេះ រឿងភាស៊ីផ្សារឡើងថ្លៃ ប៉ុន្តែមិនត្រូវអនុញ្ញាតឲ្យថ្លែងនៅពេលនោះឡើយ។ ប៉ុន្តែលោកប្រធានក្រុមប្រឹក្សាខេត្តបញ្ជាក់ថាដល់ពេលសម្រាក ហើយក្រពះលោកក៏ចាប់ផ្ដើមកូរដែរ៖ «មួយព្រឹកហើយអត់សួរ ឥឡូវរមួលពោះស្ទើរដាច់ខ្យល់ហើយបានសួរ»។
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តក្រចេះ មានអ្នកចូលរួមជាង ៣០០នាក់ ផ្តល់ឱកាសឲ្យមន្ត្រីរាជការ ពលរដ្ឋក្នុងមូលដ្ឋានលើកឡើងពីទុក្ខលំបាករបស់ខ្លួន។ កម្មវិធីនឹងត្រូវបិទនៅម៉ោង ១១កន្លះព្រឹក។ ក្រុមអាជីវករមួយក្រុមដែលប្រធានក្រុមប្រឹក្សាមិនឲ្យបង្ហាញសំណូមពរ គឺមកដល់វេទិកាក្រោយគេ ដោយពួកគេលើកបញ្ហាឡើងនៅម៉ោង ១១ជាង។
តំណាងអាជីវករម្នាក់ លោកស្រី សេង អៀម ឲ្យវិទ្យុអាស៊ីសេរី ដឹងថា លោកស្រីហួសចិត្តនឹងចម្លើយរបស់ប្រធានក្រុមប្រឹក្សាខេត្តនៅពេលនេះ។ ស្ត្រីដដែលបន្តថា មិនមែនក្រុមលោកស្រីចង់ចូលរួមយឺតពេលទេ ប៉ុន្តែមកពីទើបទទួលព័ត៌មាននៃវេទិកានេះយឺតពេល ហើយលោកស្រីមកពេលនេះចោលសាច់ជ្រូកនៅឯផ្សារ៖ «ពួកខ្ញុំស្ដាយមកហើយអត់បានជួប ចោលសាច់ជ្រូកនៅផ្សារ»។
ក្រោយការសុំអន្តរាគមន៍របស់ពលរដ្ឋបានមួយសន្ទុះធំ ប្រធានក្រុមប្រឹក្សា លោក នូ ភឿង បានអនុញ្ញាតឲ្យមន្ត្រីជំនាញឡើងបំភ្លឺជូនពលរដ្ឋ ប៉ុន្តែក្រុមអាជីវករទាមទារសុំថ្លែងដោយផ្ទាល់ទៅប្រធានក្រុមប្រឹក្សាក្នុងវេទិកា។
ពលរដ្ឋជាក្រុមអាជីវករលើកឡើងថា ភាស៊ីសត្តឃាតប្រចាំផ្សារសាមគ្គី ខេត្តក្រចេះ ឡើងថ្លៃតាមតែទំនើងចិត្ត និងតម្រូវឲ្យផ្លាស់ប្ដូរទីតាំងសត្តឃាតថ្មី ដែលនៅកន្លែងឆ្ងាយពីផ្សារ។
ស្ត្រីម្នាក់ទៀត គឺលោកស្រី សែ លាងហន បានរៀបរាប់ថា កន្លងមកមន្ត្រីបច្ចេកទេសដោះស្រាយមួយឆ្នាំហើយ ប៉ុន្តែដោះស្រាយមិនចេញ ទើបថ្ងៃនេះក្រុមអាជីវករមកសុំអន្តរាគមន៍ពីលោកប្រធានក្រុមប្រឹក្សាខេត្តនៅក្នុងវេទិកាសាធារណៈតែម្តង។ លោកស្រីគ្មានរំពឹងថា បញ្ហាពលរដ្ឋដែលកើតឡើងនេះអាចដោះស្រាយឡើយ ខណៈដែលមន្ត្រីជាន់ខ្ពស់ខេត្តមិនព្រមស្តាប់កង្វល់ពលរដ្ឋដូចនេះ៖ «ខ្ញុំមានបញ្ហាមួយឆ្នាំហើយ គាត់អត់មានដំណោះស្រាយឲ្យពួកខ្ញុំទេ»។
យ៉ាងណាក៏ដោយ ក្នុងពេលថ្លែងបិទកម្មវិធី ប្រធានក្រុមប្រឹក្សាខេត្តក្រចេះ លោក នូ ភឿង បញ្ជាក់ទៅពលរដ្ឋថា សំណួរ សំណូមពរ និងទុក្ខកង្វល់ដែលមិនបានឆ្លើយក្នុងវេទិកានេះ នឹងត្រូវយកដោះស្រាយបន្តក្នុងកិច្ចប្រជុំរបស់គណៈអភិបាលខេត្ត។ លោក នូ ភឿង ទាមទារឲ្យពលរដ្ឋរកដំណោះស្រាយតាមលំដាប់លំដោយ ដោយមានទាំងឯកសារ ទើបលោកពិនិត្យមើលរឿងនេះ៖ «ខ្ញុំគិតថា គាត់សំណូមពរបន្ថែមដល់ម៉ោង១២ ដល់ម៉ោង១ក៏មិនចប់ដែរ ចឹងហើយមានតែធ្វើសំណើទៅគណៈអភិបាលខេត្ត ឬក្រុមប្រឹក្សាខេត្ត ដើម្បីខ្ញុំពិនិត្យ»។
ក្រុមប្រឹក្សាខេត្តត្រូវបានគេចាត់ទុកជាសភាជាន់ទាប ដែលឋិតក្រោមការគ្រប់គ្រងរបស់ក្រសួងមហាផ្ទៃ។
ទាក់ទងបញ្ហានេះដែរ អ្នកនាំពាក្យក្រសួងមហាផ្ទៃ លោក ខៀវ សុភ័គ សុំមិនធ្វើអត្ថាធិប្បាយលើរឿងនេះទេ។ ចំណែកប្រធានក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្ស (CCHR) លោក អ៊ូ វីរៈ យល់ថា ក្រុមប្រឹក្សាខេត្តមុនធ្វើវេទិកាអ្វី គួរណាស់ផ្សព្វផ្សាយព័ត៌មានឲ្យបានទូលំទូលាយ ដើម្បីប្រជាពលរដ្ឋបានដឹង និងត្រូវរៀបចំឲ្យបានទៀងទាត់ ដើម្បីលើកក្រោយៗទៀត ពលរដ្ឋដែលមិនទាន់អស់ចម្ងល់ អាចចូលរួមស្តាប់ និងលើកឡើងពីកង្វល់របស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
