អាជ្ញាធរខេត្តកោះកុង រួមទាំងមន្ត្រីសិទ្ធិមនុស្ស ស៊ើបអង្កេតករណីរំលោភសេពសន្ថវៈលើក្មេងស្រីអាយុ ៣ ឆ្នាំ ម្នាក់ នៅស្រុកថ្មបាំង ។
មន្ត្រីកម្មវិធីស្ត្រីនិងកុមាររបស់សមាគមអាដហុក កញ្ញា តាន់ គឹមរ៉ានី បញ្ជាក់ថាកុមារីនោះត្រូវបានជនសង្ស័យម្នាក់ចាប់រំលោភកាលពីថ្ងៃទី ៧ ខែកក្កដា ឆ្នាំ២០១៤ នៅវេលាម៉ោង ៦ និង១៥នាទីល្ងាច។ កញ្ញាចាត់ទុកថាករណីនេះជារឿងព្រហ្មទណ្ឌ។ មន្រ្តីសិទ្ធិមនុស្សរូបនេះ អំពាវនាវដល់អាជ្ញាធរសមត្ថកិច្ចពាក់ព័ន្ធទាំងអស់បន្តយន្តការផ្សព្វផ្សាយពីបទល្មើសនានាជាពិសេសករណីរំលោភសេពសន្ថវៈនេះតែម្ដង៖ «ទៅដល់មូលដ្ឋានដាច់ស្រយាលឲ្យពួកគាត់បានយល់ដឹងពាក់ព័ន្ធទៅនឹងផ្លូវច្បាប់ ហើយធ្វើឲ្យពួកគាត់មានការប្រុងប្រយ័ត្ន ចំពោះក្មេងស្រីដែលគាត់ទៅសាលា វាងាយប្រឈមនឹងបញ្ហា»។
ជនសង្ស័យ ឈ្មោះ ហន ពៅ អាយុ ២៦ ឆ្នាំ ត្រូវបានសមត្ថកិច្ចចាប់ខ្លួនកាលពីព្រឹកថ្ងៃទី ៨ ខែកក្កដា ហើយបានឆ្លើយសារភាពថាខ្លួនពិតជាបានប្រព្រឹត្តដូចការចោទប្រកាន់ពិតមែន។ ដូច្នេះហើយស្នងការសម្រេចឃុំខ្លួនជនសង្ស័យបណ្ដោះអាសន្ន រង់ចាំការកោះហៅរបស់តុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។