មន្ត្រីអង្គការសង្គមស៊ីវិល មានការិយាល័យនៅខេត្តរតនគិរី ចាត់ទុកការសម្រេចរបស់អាជ្ញាធរខេត្ត ថាមិនអនុលោមតាមច្បាប់បោះឆ្នោត និងច្បាប់រដ្ឋធម្មនុញ្ញស្ដីពីសិទ្ធិសេរីភាពក្នុងការជួបប្រាស្រ័យបំពេញការងាររបស់ពលរដ្ឋ និងអង្គការសង្គមស៊ីវិល។
អ្នកសម្របសម្រួលអង្គការបណ្ដាញការពារទន្លេបី លោក មៀច មាន ចាប់អារម្មណ៍ថា ការសម្រេចនេះធ្វើឲ្យរំខានដល់កម្មវិធីការងារនៅមូលដ្ឋានរបស់អង្គការក្រៅរដ្ឋាភិបាល និងប៉ះពាល់សិទ្ធិជួបប្រាស្រ័យរវាងអង្គការសង្គមស៊ីវិល និងពលរដ្ឋ។ លោកពន្យល់ថា អាជ្ញាធរខេត្តអាចកំណត់ ឬណែនាំមន្ត្រីអង្គការសង្គមស៊ីវិល កុំឲ្យធ្វើអ្វីដែលប៉ះពាល់ដល់គោលការណ៍ ឬច្បាប់បោះឆ្នោត គឺជាការសមស្រប៖ «ព្រោះរយៈពេលនៃការបោះឆ្នោត គឺមួយខែពេញ។ ប្រសិនសកម្មភាពនៅថ្នាក់មូលដ្ឋានត្រូវអាក់ខាន អាហ្នឹងជាការលំបាក។ រដ្ឋាភិបាលក៏ដូចអាជ្ញាធរខេត្ត គាត់គ្រប់គ្រងត្រឹមតែមិនឲ្យយើងផ្សព្វផ្សាយប៉ះពាល់នយោបាយផ្សេង វាជារឿងត្រឹមត្រូវវាស្របទៅនឹងគោលនយោបាយ វាស្របទៅនឹងបទបញ្ជាផ្ទៃក្នុងផ្សេងៗច្បាប់បោះឆ្នោត»។
ដូចគ្នានេះដែរ មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តរតនគិរី លោក ឆាយ ធី បានហៅការសម្រេចរបស់អាជ្ញាធរខេត្តថា ជាការសម្រេចមិនអាចយកមកអនុវត្តបាន។ លោកកត់សម្គាល់ថា ច្បាប់បោះឆ្នោតមិនបានហាមមិនឲ្យមានការជួបប្រជុំធ្វើសិក្ខាសាលាអប់រំផ្សព្វផ្សាយបញ្ហានានា និងទស្សនកិច្ចសិក្សាក្នុងអំឡុងថ្ងៃឃោសនាបោះឆ្នោតដែរ។ ចំណែកច្បាប់បោះឆ្នោត ក៏មិនបានកំណត់ថា ប្រជាពលរដ្ឋមិនអាចខកខានមិនទៅបោះឆ្នោតបាននោះឡើយ៖ «វាមិនមែនជាផ្លូវច្បាប់ណាមួយអាចហាមឃាត់បានទេបាទ!។ វាអាចប៉ះពាល់ដល់សិទ្ធិសេរីភាពប្រជាពលរដ្ឋ ប៉ះពាល់ដល់ដំណើរការជួបប្រជុំផ្សេងៗលើអង្គការសង្គមស៊ីវិល មានសកម្មភាពនៅតាមមូលដ្ឋាន»។
អភិបាលខេត្តរតនគិរី កាលពីថ្ងៃទី១៣ ខែមិថុនា ឆ្នាំ២០១៣ បានធ្វើលិខិតជម្រាបជូនប្រធានអង្គការក្រៅរដ្ឋាភិបាលក្នុងខេត្ត ស្ដីពីការមិនអនុញ្ញាតនេះ និងបានលើកហេតុផលថា ការមិនអនុញ្ញាតនេះដើម្បីទុកពេលវេលានៃរយៈពេលឃោសនាបោះឆ្នោតថ្ងៃស និងថ្ងៃបោះឆ្នោតឲ្យអាជ្ញាធរមូលដ្ឋានមានពេលវេលាពេញលេញចាត់ចែងការងារ និងដើម្បីឲ្យប្រជាពលរដ្ឋទទួលបានឱកាសប្រើប្រាស់សិទ្ធិនយោបាយពេញលេញស្ដីពីការបោះឆ្នោត។
ឆ្លើយតបការអះអាងរបស់មន្ត្រីសង្គមស៊ីវិលនេះ អភិបាលខេត្តរតនគិរី លោក ប៉ាវ ហមផាន មានប្រសាសន៍បញ្ជាក់ថា សេចក្តីសម្រេចដែលអាជ្ញាធរខេត្តបានជម្រាបជូនប្រធានអង្គការក្រៅរដ្ឋាភិបាលនេះ គឺជាសារទំនាក់ទំនង និងរំឭកមន្ត្រីសង្គមស៊ីវិលឲ្យពិចារណាទុកពេលវេលាឲ្យមន្ត្រីមូលដ្ឋាន និងប្រជាពលរដ្ឋបានគ្រប់គ្រាន់បំពេញការងារ និងចូលរួមការងារឃោសនា និងរៀបចំការបោះឆ្នោតថ្នាក់ជាតិបានប្រសើរ។ លោកបដិសេធថា មិនបានបំបិទសិទ្ធិសេរីភាពមន្ត្រីសង្គមស៊ីវិលក្នុងការជួបប្រាស្រ័យជាមួយប្រជាពលរដ្ឋ និងមន្ត្រីមូលដ្ឋាននោះទេ៖ «ខ្ញុំចេញលិខិតក្នុងគោលបំណងដើម្បីសង្គមស៊ីវិលហ្នឹងដឹងដែរ មិនមែនដាក់កម្មវិធីចំយុទ្ធនាការ អាហ្នឹងចៀសៗទៅ។ ខ្ញុំឧទាហរណ៍ បើគាត់ទៅប្រជុំភូមិហ្នឹង គាត់ប្រជុំនៅភូមិហ្នឹងបាន។ ប៉ុន្តែ នាំគេទៅសិក្ខាសាលាប៉ុន្មានថ្ងៃ មកខេត្តឆ្លងខេត្តតទៅទៀត អាហ្នឹងអត់បានទេ»។
មន្ត្រីច្បាប់នៃមជ្ឈមណ្ឌលអប់រំច្បាប់សម្រាប់សហគមន៍ លោក គឹត ទូច បានកត់សម្គាល់ថា គោលការណ៍បទបញ្ជាស្ដីពីការឃោសនាបោះឆ្នោត និងច្បាប់បោះឆ្នោត មិនបានហាមប្រាម ឬមិនអនុញ្ញាតឲ្យមន្ត្រីអង្គការសង្គមស៊ីវិល បំពេញការងារដែលមិនពាក់ព័ន្ធការហាមឃាត់របស់គណៈកម្មាធិការជាតិរៀបចំការបោះឆ្នោតនោះឡើយ។ លោកបន្តថា សេចក្តីសម្រេចរបស់អាជ្ញាធរខេត្តនេះមិនមានសុពលភាពសម្រាប់អនុវត្តបានឡើយ៖ «ថ្នាក់ខេត្តគួរតែបើកចំហលើកទឹកចិត្ត ធ្វើយ៉ាងណាដើម្បីឲ្យមានផលប្រយោជន៍ច្រើនយ៉ាងក្នុងការអន្តរាគមន៍សង្គម»។
ការឃោសនាបោះឆ្នោតជាតិអាណត្តិទី៥ មានរយៈពេល ៣០ថ្ងៃ ចាប់ផ្ដើមពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា។ ថ្ងៃទី២៧ ខែកក្កដា គឺជាថ្ងៃស ចំណែកថ្ងៃទី២៨ ខែកក្កដា គឺជាថ្ងៃបោះឆ្នោតចុងក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។