រដ្ឋមន្ត្រីក្រសួងព័ត៌មាន អះអាងថា រដ្ឋសភាជាតិជាកន្លែងដែលអ្នកកាសែតមានសិទ្ធិចេញចូល ដើម្បីយកព័ត៌មាន។ ទោះបែបនេះក្តី លោករដ្ឋមន្ត្រីមិនមានប្រតិកម្មលើពាក្យសម្ដីរបស់ លោក ឈាង វុន ដែលបណ្ដេញអ្នកកាសែតចេញពីមន្ទីររដ្ឋសភា ក្នុងពេលសុំសម្ភាសតំណាងរាស្ត្របក្សប្រឆាំងនៅក្នុងបរិវេណរដ្ឋសភា កាលពីពេលកន្លងទៅនោះឡើយ។
ការបណ្ដេញអ្នកកាសែតចេញពីមន្ទីររដ្ឋសភា ឈានដល់ការឆ្លើយតបពីរដ្ឋមន្ត្រីក្រសួងព័ត៌មាន ដោយបញ្ជាក់ថា ការបណ្ដេញអ្នកកាសែតចេញ គឺប៉ះពាល់សិទ្ធិរបស់ពួកគេ។
ផ្តល់បទសម្ភាសន៍ដល់ក្រុមអ្នកសារព័ត៌មានក្រោយចប់កិច្ចពិភាក្សា ស្ដីពីរួមគ្នាជំរុញការពាក់មួកសុវត្ថិភាពនៅកម្ពុជា ថ្ងៃទី១៥ ខែកក្កដា រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បញ្ជាក់ថា អ្នកកាសែតមានសិទ្ធិចេញចូលរដ្ឋសភា ប៉ុន្តែក្នុងករណីប្រជុំបិទទ្វារ ទើបអ្នកកាសែតមិនអាចចូលបាន៖ «ជាធម្មតាទេ អ្នកកាសែតគាត់មានសិទ្ធិចេញចូលនៅកន្លែងណាជាកន្លែងសាធារណៈ ហើយរដ្ឋសភាជាកន្លែងសាធារណៈ»។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មិនថ្លែងលម្អិតពីប្រតិកម្មរបស់លោកចំពោះទង្វើ ឬក៏សម្ដីរបស់ លោក ឈាង វុន ដែលបានបណ្ដេញអ្នកកាសែតចេញពីបរិវេណរដ្ឋសភានោះទេ ដោយលោកនិយាយថា ព្រោះលោកគ្មានវត្តមាននៅក្នុងហេតុការណ៍នោះ។
ការបណ្ដេញអ្នកសារព័ត៌មានចេញពីមន្ទីររដ្ឋសភារបស់ លោក ឈាង វុន ទទួលរងការរិះគន់ពីសាធារណជនទូទៅ ថាជាការរំលោភសិទ្ធិអ្នកកាសែត។
ថ្លែងនៅក្នុងវេទិកាអ្នកស្តាប់វិទ្យុអាស៊ីសេរី កាលពីថ្ងៃទី៧ ខែកក្កដា នាយកប្រតិបត្តិនៃមជ្ឈមណ្ឌលដើម្បីប្រព័ន្ធផ្សព្វផ្សាយឯករាជ្យនៅកម្ពុជា លោក ប៉ា ងួនទៀង និយាយថា លោក ឈាង វុន គួរកែប្រែឥរិយាបថ។ លោកថា ទង្វើរបស់ លោក ឈាង វុន គឺគ្រាន់តែចង់បង្ហាញពីឥទ្ធិពលរបស់ខ្លួនប៉ុណ្ណោះ៖ «ចំណុចហ្នឹងខ្ញុំយល់ថា ជាចំណុចខុសឆ្គង ទី១ គាត់បណ្ដេញអ្នកកាសែតចេញ អត់មានច្បាប់ណាចែងពីសិទ្ធិអំណាចគាត់ប៉ុណ្ណឹង។ ទី២ គាត់អត់យល់ពីតួនាទីអ្នកសារព័ត៌មាន»។
អ្នកនាំពាក្យរដ្ឋសភា លោក ឈាង វុន បដិសេធមិនផ្តល់បទសម្ភាសន៍ទាក់ទងរឿងបណ្ដេញអ្នកកាសែតនេះទេ នៅថ្ងៃទី១៥ ខែកក្កដា។ ប៉ុន្តែកាលពីពេលថ្មីៗនេះ អ្នកតំណាងរាស្ត្រគណបក្សកាន់អំណាចរូបនេះ បានលើកឡើងនៅក្នុងលិខិតបំភ្លឺរបស់ខ្លួនថា អ្នកកាសែតដែលបណ្ដេញចេញ ជាអ្នកកាសែតធ្វើខុសវិជ្ជាជីវៈ ដែលសន្យាថាសម្ភាសលោកតែម្នាក់ តែបែរជាចង់សម្ភាសតំណាងរាស្ត្រគណបក្សប្រឆាំងថែមទៀត។
នាយកប្រតិបត្តិនៃក្លឹបអ្នកកាសែត លោក ឆាយ សុផល លើកឡើងថា តួនាទីអ្នកនាំពាក្យត្រូវតែសម្របសម្រួលដល់អ្នកសារព័ត៌មានក្នុងការយកព័ត៌មាន និងជាដៃគូរបស់អ្នកសារព័ត៌មាន ដើម្បីផ្តល់ព័ត៌មានទៅកាន់សាធារណជន។ លោកស្នើឲ្យអ្នកនាំពាក្យគ្រប់ស្ថាប័ន គួរដឹងថា អ្វីដែលអ្នកកាសែតចង់បាន៖ «តួនាទីអ្នកនាំពាក្យ ឬមន្ត្រីព័ត៌មាន ដាច់ខាតគាត់ជាដៃគូ សហការី ការងារប្រចាំថ្ងៃ ដើម្បីផ្តល់ព័ត៌មាន។ ឧទាហរណ៍ គាត់ជាមន្ត្រីគណបក្ស "ក" មិនមែននិយាយតែពីគណបក្ស "ក" នោះទេ ហើយបើគណបក្ស "ខ" ក៏មិនមែននិយាយតែគណបក្ស "ខ" នោះដែរ»។
កាលពីថ្ងៃទី១ ខែកក្កដា សារព័ត៌មានមួយក្រុម បានអនុញ្ញាតឲ្យចូលមន្ទីររដ្ឋសភា ដើម្បីរង់ចាំសម្ភាសក្រុមតំណាងរាស្ត្រដែលប្រជុំពិភាក្សាស្ដីពីសេចក្តីព្រាងច្បាប់សមាគម និងអង្គការមិនមែនរដ្ឋាភិបាល។ ក្រុមអ្នកកាសែត ពុំមាននរណាម្នាក់បញ្ជាក់ថា ចូលទៅក្នុងមន្ទីររដ្ឋសភា ដើម្បីសម្ភាស លោក ឈាង វុន តែម្នាក់នោះទេ។ ផ្ទុយទៅវិញ លោក ឈាង វុន ឯណោះទេដែលផ្តល់សម្ភាសរួច ហើយកាងមិនឲ្យក្រុមអ្នកកាសែតសម្ភាសតំណាងរាស្ត្របក្សប្រឆាំង លោក អ៊ុំ សំអាន និងព្រមានបោកកម្ទេចម៉ាស៊ីនថតរូបអ្នកយកព័ត៌មាននៃវិទ្យុអាស៊ីសេរី ដែលព្យាយាមថតយករូបភាពនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។