ក្រុមអ្នកធ្វើធម្មយាត្រាសិទ្ធិយាត្រាពីតាមផ្លូវជាតិធំៗទាំង៦ ឆ្ពោះមកភ្នំពេញ បានធ្វើដំណើរទៅដល់គោលដៅតាមខេត្តហើយនៅថ្ងៃទី៤ ធ្នូ នេះ។ ក្រុមទាំងនោះ ភាគច្រើនមិនមានបញ្ហាអ្វីទេ ប៉ុន្តែក្រុមខ្លះមានបញ្ហាជាមួយអាជ្ញាធរ។
យ៉ាងហោចណាស់មានក្រុមអ្នកធ្វើធម្មយាត្រាសិទ្ធិយាត្រា ២ក្រុមផ្សេងគ្នា ដែលទៅដល់ចំណុចចាប់ផ្ដើម ហើយជួបបញ្ហាជាមួយអាជ្ញាធរ។
សិទ្ធិយាត្រាតាមផ្លូវជាតិលេខ៦ ពីខេត្តកំពង់ចាម វិញ អាជ្ញាធរខេត្តបានដាក់ពង្រាយកម្លាំងជាច្រើននាក់នៅក្នុងវត្តមួយចំនួននៅក្នុងស្រុកព្រៃឈរ។ ចំណែកសោទ្វាររបងវត្តត្រពាំងព្រះ ជាវត្តដែលក្រុមអ្នកហែក្បួនគ្រោងស្នាក់នៅ រួមនឹងវត្តមួយចំនួនទៀត ត្រូវបានបិទមិនឱ្យក្រុមអ្នកហែធម្មយាត្រាសិទ្ធិយាត្រាតាមផ្លូវជាតិលេខ៦ អាចចូលសម្រាកក្នុងវត្តបានឡើយ។ ពួកគាត់នាំគ្នាទៅសម្រាកនៅផ្ទះប្រជាពលរដ្ឋវិញ។
មន្ត្រីតស៊ូមតិនៃសម្ព័ន្ធសហគមន៍កសិករកម្ពុជា លោក ស៊ុម ម៉ាណែត ដែលដឹកនាំក្បួននោះ ឱ្យដឹងថា ដំបូងឡើយខាងលោកបានទាក់ទងជាមួយព្រះចៅអធិការវត្តត្រពាំងព្រះ ដើម្បីស្នើសុំស្នាក់នៅទីនោះ ហើយព្រះអង្គក៏យល់ព្រមហើយដែរ។ ប៉ុន្តែដល់ថ្ងៃកំណត់ ទ្វារក៏បិទ ចៅអធិការ និងព្រះសង្ឃក្នុងវត្តមិនបានចេញមកជួបពួកគាត់ ដើម្បីឆ្លើយតបបញ្ហានេះទេ៖ «អាជ្ញាធរខេត្តកំពង់ចាម រំលោភសិទ្ធិសេរីភាពទាំងមូលដែលខ្ញុំនឹងស្នាក់នៅហ្នឹង ហើយបែរជាបិទសិទ្ធិសេរីភាព។ សូម្បីតែសិទ្ធិយាត្រា ដើម្បីបង្ហាញពីសិទ្ធិរបស់ខ្លួន ដែលមានក្នុងអន្តរជាតិជាដើមហ្នឹង បែរជាអាជ្ញាធរគាត់បិទសិទ្ធិសេរីភាពប្រជាពលរដ្ឋ គឺជាចំណុចមួយរំលោភច្បាប់ទាំងស្រុង»។
យ៉ាងណា ស្នងការនគរបាលខេត្តកំពង់ចាម លោក ប៉ែន រ័ត្ន បញ្ជាក់ថា កម្លាំងដែលដាក់នោះ គឺដើម្បីការពារក្រែងប៉ះទង្គិចគ្នារវាងកម្លាំងព្រះសង្ឃនៅក្នុងវត្ត និងក្រុមអ្នកហែក្បួនទាំងនោះតែប៉ុណ្ណោះ ហើយសមត្ថកិច្ចក៏មិនបានហាមឃាត់ ឬរារាំងអ្នកហែក្បួនទាំងនោះដែរ។
ចំណែកមន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) លោក នាង សុវ៉ាត ដែលបានតាមដានក្បួនដង្ហែនោះ យល់ថា ការដាក់កម្លាំងតាមវត្តជាច្រើនមានទាំងស្លៀកពាក់ឯកសណ្ឋាន និងស៊ីវិលផងនោះ គឺមិនមែនដាក់ដើម្បីការពារខ្លាចក្រែងប៉ះទង្គិចគ្នានោះទេ ប៉ុន្តែគឺដាក់ដើម្បីរារាំងក្រុមហែក្បួនមិនឱ្យចូលសម្រាកក្នុងវត្ត ឬបង្កការរំខានតែម្ដង។ លោកបន្តថា សកម្មភាពនេះ គឺរំលោភសិទ្ធិមនុស្ស និងសបញ្ជាក់ថា អាជ្ញាធរខេត្តកំពង់ចាម ហាក់មិនបានគោរពទៅតាមអ្វីដែលរាជរដ្ឋាភិបាលប្រទេសកម្ពុជា បានចុះហត្ថលេខាជាមួយអង្គការសហប្រជាជាតិ ទទួលយកគោលការណ៍ស្ដីពីសិទ្ធិមនុស្សបញ្ចូលក្នុងរដ្ឋធម្មនុញ្ញ ដែលជាច្បាប់កំពូលរបស់ប្រទេសទៀតផង។
រីឯក្រុមអ្នកធ្វើធម្មយាត្រាសិទ្ធិយាត្រាពីខាងផ្លូវជាតិលេខ២ ដែលនឹងត្រូវចាប់ផ្ដើមពីស្រុកគិរីវង់ ខេត្តតាកែវ ឱ្យដឹងថា អាជ្ញាធរខេត្តមិនអនុញ្ញាតឱ្យធ្វើធម្មយាត្រាពីខេត្តនេះទេ។
អ្នកទំនាក់ទំនងនៅក្នុងក្រុមខាងផ្លូវជាតិលេខ២ កាត់តាមខេត្តតាកែវ គឺលោក ញ៉ិល ភាព ថ្លែងបញ្ជាក់ថា តំណាងក្រុមរបស់លោក និងអភិបាលរងខេត្ត គឺលោក គាវ សុវណ្ណឌី និងអាជ្ញាធរពាក់ព័ន្ធមួយចំនួនទៀត បានជួបប្រជុំចរចាគ្នារហូតមកដល់ពេលល្ងាច ក៏អាជ្ញាធរខេត្តនៅតែមិនអនុញ្ញាតឱ្យធ្វើធម្មយាត្រាសិទ្ធិយាត្រានេះទេ ហើយក៏បង្គាប់ឱ្យរំសាយក្បួននោះទៀត ក្រោមហេតុផលថា ការធ្វើធម្មយាត្រានេះមិនមានលិខិតអនុញ្ញាតពីក្រសួងមហាផ្ទៃ។ លោកថា អាជ្ញាធរព្រមានចាត់វិធានការ ប្រសិនបើមិនរំសាយ។ ប៉ុន្តែទោះជាមានការគំរាមចាត់វិធានការពីអាជ្ញាធរក្ដី ក៏ក្រុមលោកនៅតែបន្តធ្វើធម្មយាត្រាសិទ្ធិយាត្រាទៅតាមគម្រោងដដែល។
ក្រុមរបស់លោក មិនត្រូវបានអនុញ្ញាតឱ្យសម្រាកនៅក្នុងវត្តសោម តាមការគ្រោងទុកទេ។ ដូច្នេះក្រុមលោកត្រូវស្នាក់នៅក្រោមតង់តាមរបងវត្ត។
ដោយឡែកក្រុមផ្សេងទៀត ដូចជា ផ្លូវជាតិលេខ១ ចាប់ពីវត្តកអណ្ដើក ស្រុកកំពង់ត្របែក ខាងកើតអ្នកលឿង ក្រុមផ្លូវជាតិលេខ៣ ផ្លូវជាតិលេខ៥ ផ្ដល់ដំណឹងមកថា មិនមានបញ្ហាអ្វីទេ។ ចំពោះក្រុមធម្មយាត្រានៅតាមផ្លូវជាតិលេខ៤ វិញ កាលពីដំបូងក៏អាជ្ញាធរមិនឱ្យស្នាក់នៅក្នុងវត្តពេជ្រនិល ដែរ ប៉ុន្តែបន្ទាប់ពីបានចរចាគ្នា អាជ្ញាធរមូលដ្ឋានក៏ព្រមឱ្យស្នាក់នៅវិញ។
ក្រុមអ្នកធ្វើធម្មយាត្រាសិទ្ធិយាត្រាទាំងនេះ នឹងចាប់ផ្ដើមដំណើរធម្មយាត្រាសិទ្ធិយាត្រារបស់ខ្លួនពីបណ្ដាខេត្ត ឆ្ពោះមកភ្នំពេញ តាមផ្លូវជាតិធំៗទាំង៦ ហើយគ្រោងមកជួបគ្នានៅភ្នំពេញ ដើម្បីប្រារព្ធធ្វើទិវាសិទ្ធិមនុស្សអន្តរជាតិ នៅថ្ងៃទី១០ ធ្នូ សប្ដាហ៍ក្រោយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។