ក្បួនដង្ហែធម្មយាត្រាសិទ្ធិយាត្រា បន្តចូលដល់ថ្ងៃទី២ហើយនៅថ្ងៃទី៦ ខែធ្នូ។ ក្រុមអ្នកហែក្បួនតាមផ្លូវជាតិលេខ៦ នៅខេត្តកំពង់ចាម នៅតែជួបបញ្ហាខ្លះ ព្រោះថាវត្តនៅតាមផ្លូវនៅតែបន្តបិទទ្វារមិនឱ្យក្រុមធម្មយាត្រាអាចចូលសម្រាកបានឡើយ។
ចំណែកក្បួនដង្ហែនៅតាមបណ្ដាផ្លូវជាតិផ្សេងៗទៀត គឺមិនមានចោទជាបញ្ហានោះទេ រួមទាំងផ្លូវជាតិលេខ២ ចេញដំណើរពីខេត្តតាកែវ ដែលមានរឿងចម្រូងចម្រាសកាលពីថ្ងៃទី៥ ខែធ្នូ នោះ ក៏លែងមានបញ្ហាទៀតដែរ។
ក្បួនដង្ហែធម្មយាត្រាសិទ្ធិយាត្រាក្រុមផ្លូវជាតិលេខ៦ និងលេខ៧ នៅក្នុងទឹកដីខេត្តកំពង់ចាម ត្បិតតែអាចធ្វើដំណើរឆ្ពោះទៅក្រុងភ្នំពេញ ដោយមិនមានការរារាំងពីអាជ្ញាធរក៏ដោយចុះ ក៏ប៉ុន្តែវត្តអារាមនៅតាមដងផ្លូវនៅតែបន្តបិទទ្វាររបង មិនឱ្យក្រុមអ្នកហែក្បួនចូលស្នាក់នៅដដែល។ ក្រុមអ្នកហែក្បួន រួមទាំងព្រះសង្ឃ ត្រូវគង់ និងសម្រាកតាមផ្ទះអ្នកស្រុកចំនួនពីរយប់មកហើយ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ដែលជាសមាជិកដឹកនាំក្បួនដង្ហែនោះ ឱ្យដឹងថា អ្នកចូលរួមក្បួនដង្ហែនៅថ្ងៃទី៦ ធ្នូ នៅខេត្តកំពង់ចាម ប្រមាណជាង ៣០០អង្គនិងនាក់ គ្រោងថានឹងចូលសម្រាកនៅវត្តច័ន្ទមូលី ស្ថិតនៅឃុំផ្អាវ ស្រុកបាធាយ ប៉ុន្តែមិនបានសម្រេចដូចបំណងឡើយនាពេលដំបូង ពីព្រោះរបងទ្វារបិទជិត ហើយថែមទាំងមានកម្លាំងសមត្ថកិច្ចមួយចំនួនដាក់នៅទីនោះទៀតផង៖ «គាត់ស្រែកមេក្រូសូមឱ្យព្រះសង្ឃ ក៏ដូចជាអាជ្ញាធរ បើកទ្វារវិញ ដើម្បីឱ្យព្រះសង្ឃ និងអ្នកហែក្បួនធម្មយាត្រា និងសិទ្ធិយាត្រា ចូលឆាន់អាហារនៅក្នុងវត្តនេះ»។
ពលរដ្ឋនៅក្បែរៗវត្ត ក៏និមន្តព្រះសង្ឃ និងអញ្ជើញអ្នកហែក្បួន ឱ្យទៅឆាន់ និងពិសារបាយនៅផ្ទះពួកគាត់វិញ។ លុះក្រោយពីព្រះសង្ឃឆាន់ចង្ហាន់រួច ទើបខាងតំណាងចៅអធិការវត្តច័ន្ទមូលី ព្រមបើកទ្វារឱ្យក្រុមអ្នកហែក្បួនអាចចូលសម្រាកនៅក្នុងវត្តបាន។ យ៉ាងណាក៏ដោយ មានព្រះសង្ឃគង់ក្នុងវត្តខ្លះ ថាមិនចង់បិទទ្វាររបងនោះទេ ក៏ប៉ុន្តែមានបញ្ជាពីខាងមន្ទីរធម្មការ និងសាសនាខេត្ត។ បន្ទាប់ពីបានសម្រាកក្នុងវត្តច័ន្ទមូលី រួចមក ក្រុមហែក្បួនផ្លូវជាតិលេខ៦ និងលេខ៧ បានបន្តដំណើរទៅមុខទៀត ក៏ប៉ុន្តែពួកគាត់ហាក់មិនមានសង្ឃឹមថា នឹងបានស្នាក់នៅក្នុងវត្តទេនៅយប់ថ្ងៃទីពីរនេះ ពីព្រោះពេលពួកគាត់ចេញដំណើរ ឃើញស្ទើរគ្រប់វត្តនៅតាមដងផ្លូវ នៅតែបិទទ្វាររបងដដែល។
ទាក់ទងបញ្ហានេះ ប្រធានមន្ទីរធម្មការ និងសាសនាខេត្តកំពង់ចាម លោក ស្រី សុភ័ក្ត្រ មិនបានឆ្លើយតបយ៉ាងណាទេ ដោយលោកថាជាប់ប្រជុំ។
ចំណែកអភិបាលខេត្តស្ដីទីនៃខេត្តកំពង់ចាម លោក ជឹម លាវ ក៏មិនអាចទាក់ទងបានដែរនៅថ្ងៃទី៦ ធ្នូ។
យ៉ាងណា លិខិតរបស់អភិបាលខេត្តស្តីទីរូបនេះ បានផ្ញើជូនមកក្រុមអ្នកដឹកនាំហែក្បួន កាលពីថ្ងៃទី៤ ធ្នូ បញ្ជាក់ថា អាជ្ញាធរខេត្តមិនអនុញ្ញាតឱ្យមានសកម្មភាពហែក្បួនធម្មយាត្រានៅលើទឹកដីខេត្តកំពង់ចាម ឡើយ។ ក្នុងលិខិតបន្ថែមថា សកម្មភាពព្រះសង្ឃក្នុងការហែក្បួន គឺខុសពីខ្លឹមសារព្រះរាជសង្ឃប្រកាសកាលពីឆ្នាំ២០១៣។ ម្យ៉ាងទៀត ខាងគណៈកម្មការរៀបចំពិធីហែក្បួន មិនបានផ្តល់នូវឯកសារចាំបាច់មួយចំនួនតាមការស្នើសុំរបស់អាជ្ញាធរឡើយ។ ដោយឡែកពលរដ្ឋនៅស្រុកបាធាយ ខ្លះឱ្យដឹងថា ពួកគេមិនខឹងនឹងព្រះសង្ឃក្នុងវត្តនោះទេ ប៉ុន្តែពួកគាត់ខឹងចំពោះអាជ្ញាធរ រួមទាំងខាងមន្ទីរធម្មការ និងសាសនា ដែលបានរឹតត្បិតអ្នកមានបំណងលើកស្ទួយសិទ្ធិមនុស្ស។
ពាក់ព័ន្ធរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) លោក នាង សុវ៉ាត មានប្រសាសន៍ថា ការមិនអនុញ្ញាតឱ្យក្បួនដង្ហែអាចចូលសម្រាក ឬឆាន់ចង្ហាន់នៅក្នុងវត្តកន្លងមកនោះ គឺជាកំហុសធ្ងន់ធ្ងរសម្រាប់អាជ្ញាធរ ដែលមិនយល់ពីបញ្ហាសិទ្ធិមនុស្ស និងមិនយល់ពីនីតិរដ្ឋប្រទេសខ្លួន៖ «ប្រតិទិន ១០ធ្នូ គឺជាថ្ងៃសម្រាកបុណ្យសិទ្ធិមនុស្ស គោរពសិទ្ធិមនុស្ស។ ហ្នឹងជាកំហុសធ្ងន់ណាស់ដែលយើងថានីតិរដ្ឋ ប្រជាពលរដ្ឋថាគាត់មិនយល់ពីនីតិ ប៉ុន្តែអាជ្ញាធរខេត្ត អាជ្ញាធរស្រុក គាត់អត់យល់ពីនីតិដែរ ហើយថាប្រទេសយើងជានីតិរដ្ឋ វាអត់ត្រូវ»។
លោកបន្ថែមថា ច្បាប់កំពូលនៃប្រទេស គឺច្បាប់រដ្ឋធម្មនុញ្ញ។ ដូចនេះ រាល់សេចក្តីប្រកាស ឬសេចក្តីសម្រេចផ្សេងៗដែលផ្ទុយពីច្បាប់រដ្ឋធម្មនុញ្ញ គឺចាត់ទុកនិរាករណ៍ មិនអាចយកមកប្រើប្រាស់បានឡើយ។
ទោះបីជាយ៉ាងណាក៏ដោយ ក្បួនដង្ហែនៅតាមបណ្ដាផ្លូវជាតិសំខាន់ៗ រួមមានផ្លូវជាតិលេខ១ ចេញពីខេត្តព្រៃវែង ផ្លូវជាតិលេខ៣ ចេញពីខេត្តកំពត ផ្លូវជាតិលេខ៤ ចេញពីខេត្តកំពង់ស្ពឺ ផ្លូវជាតិលេខ៥ ចេញពីខេត្តកំពង់ឆ្នាំង រួមនឹងផ្លូវជាតិលេខ២ ចេញពីខេត្តតាកែវ ដែលមានការរារាំងពីសំណាក់អាជ្ញាធរកាលពីថ្ងៃទីមួយនោះ មកដល់ថ្ងៃទីពីរ គឺមិនមានអ្វីចោទជាបញ្ហាទៀតឡើយ ហើយស្ទើរគ្រប់វត្តអារាម គឺមានការទទួលស្វាគមន៍យ៉ាងល្អទៀតផង។ យ៉ាងណា សមាជិកដឹកនាំការហែក្បួនទាំងនោះ សង្ឃឹមថានៅថ្ងៃបន្តបន្ទាប់ អាជ្ញាធរ និងបណ្ដាវត្តទាំងអស់ នឹងបន្តសហការល្អជាមួយគ្នាថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។