គោលនយោបាយភូមិឃុំមានសុវត្ថិភាព គឺហាមឃាត់មិនឲ្យមានអាជីវកម្មផ្លូវភេទ ដែលបង្ការមិនអោយមានការជួញដូរមនុស្ស ការបើកបនពេស្យា ជាដើម។ យ៉ាងណាក៏ដោយ រហូតមកទល់នឹងបច្ចុប្បន្ន មុខរបរពេស្យាកម្មនៅតែបន្តកើតមានច្រើនរូបភាពនៅខេត្តរតនគិរី បើទោះបីក្រុមអាជ្ញាធរបានព្យាយាមបញ្ឈប់មិនឲ្យធ្វើសេវាកម្មនេះនៅមូលដ្ឋានយ៉ាងណាក្តី។
បនពេស្យាចារបានបញ្ចប់អាជីវកម្មទាំងស្រុង នៅក្រុងបានលុង ខេត្តរតនគិរី នាពេលបច្ចុប្បន្ន ក៏ប៉ុន្តែក្រុមបុរសមានចំណូលចិត្តកម្សាន្តផ្លូវភេទ អាចរកសេវាកម្មនេះនៅតាមហាងម៉ាស្សា ក្លិបខារ៉ាអូខេ ផ្ទះលក់កាហ្វេ ឬភោជនីយដ្ឋានដែលបង្កប់ដោយនារីធ្វើអាជីវកម្មផ្លូវភេទ។
ការបម្រើផ្លូវភេទនៅកន្លែងទាំងអស់នោះ គឺស្ត្រីអ្នកបម្រើផ្លូវភេទមិនត្រូវអនុញ្ញាតបម្រើផ្លូវភេទនៅនឹងកន្លែងទេ អតិថិជន និងអ្នកបម្រើផ្លូវភេទអាចស្វែងរកផ្ទះសំណាក់ ឬសណ្ឋាគារ ជាកន្លែងកម្សាន្តផ្លូវភេទ កាលណាពួកគេព្រមព្រៀងគ្នាក្នុងតម្លៃណាមួយ។
ហាងលក់កាហ្វេមួយនៅជាប់នឹងសណ្ឋាគារ កុលសម្ព័ន្ធ ឋិតក្នុងសង្កាត់ឡាបានសៀក ក្រុងបានលុង មានស្ត្រីជនជាតិវៀតណាម ៦នាក់ ត្រូវបានគេរៀបចំដើម្បីបម្រើសេវាកម្មផ្លូវភេទ។ ជាទូទៅ បុរសៗដែលត្រូវការសេវាកម្មបម្រើផ្លូវភេទពីស្ត្រីវៀតណាម ទាំងនោះ អាចទៅអង្គុយពិសារកាហ្វេនៅហាងនោះ ហើយទាក់ទងជាមួយមេការជាស្ត្រីវៀតណាម ដូចគ្នា ដើម្បីមើលរូបរាងស្ត្រីបម្រើផ្លូវភេទដោយផ្ទាល់ ដែលជាអ្នកបម្រើក្នុងហាងកាហ្វេ ឬរូបថតរបស់ពួកគេបាន។ ប្រសិនអតិថិជនពេញចិត្តស្ត្រីមួយណា គឺត្រូវចរចាតម្លៃជាមួយមេការនោះរួចរាល់ អតិថិជនអាចប្រើប្រាស់រថយន្ត ឬមធ្យោបាយផ្ទាល់ខ្លួន ដឹកជញ្ជូនស្ត្រីរកស៊ីផ្លូវភេទទៅផ្ទះសំណាក់ ឬសណ្ឋាគារដែលគេពេញចិត្ត។ ដោយឡែក ប្រសិនអតិថិជនណាខ្លាច ឬលាក់ការណ៍មិនឲ្យគេដឹង អតិថិជននោះអាចទាក់ទងទូរស័ព្ទមេការស្ត្រីទាំងនោះ ដើម្បីទទួលសេវាកម្មផ្លូវភេទទៅដល់បន្ទប់ស្នាក់នៅរបស់អតិថិជននោះ៖ «គេទៅទាក់ទងតាមខារ៉ាអូខេ តាមហាងបៀរហ្គាឌិន តាមហាងហូបចុកទាក់ទងខ្លួនគេ មនុស្សស្រីហ្នឹងគេនិយាយខ្លួនគេ គេនិយាយតម្លៃត្រូវរ៉ូវគ្នាទៅក្រៅទៅ។ អ្នកមកដឹកចេញទៅដូចនៅហ្វុងលីនអ៊ីចឹង»។
ករណីដូចគ្នានេះដែរ ក៏កើតមាននៅតាមក្លិបរាត្រី ហាងខារ៉ាអូខេ កន្លែងម៉ាស្សា ជាដើម ក៏ប៉ុន្តែគេសង្កេតឃើញអាជីវកម្មផ្លូវភេទខ្លះ គឺស្ត្រីរកស៊ីផ្លូវភេទខ្លួនឯងស្ម័គ្រចិត្តទទួលបម្រើផ្លូវភេទ ដើម្បីប្រាក់ ក៏ប៉ុន្តែមានករណីខ្លះទៀត សេវាកម្មនេះត្រូវបានគេរៀបចំចាត់តាំងឡើងដោយមានខ្សែសង្វាក់ មានមេដឹកនាំតាមរូបភាពធ្វើអាជីវកម្មផ្លូវភេទ។
តួលេខរបស់អាជ្ញាធរក្រុងបានលុង យ៉ាងហោចណាស់មានក្លិបខារ៉ាអូខេជាង ២០កន្លែង ហាងម៉ាស្សា ៨កន្លែង ហាងលក់កាហ្វេ និងភោជនីយដ្ឋានរាប់សិបកន្លែងទៀត ដែលស្ត្រីបម្រើការងារនៅទីនោះមួយចំនួន ពាក់ព័ន្ធបម្រើ និងជួញដូរផ្លូវភេទ។
កាលពីខែកក្កដា អាជ្ញាធរក្រុងបានលុង បានបង្ក្រាបទីតាំងម៉ាស្សាឈ្មោះ ហ្វុងលីន ដែលបង្កប់ការជួញដូរផ្លូវភេទ ក៏ប៉ុន្តែមន្ត្រីបង្ក្រាបក៏រងផលលំបាកច្រើនក្នុងការស្វែងរកភស្តុតាងដាក់បន្ទុកទៅលើម្ចាស់អាជីវកម្មម៉ាស្សាទាំងនោះ។
អធិការប៉ូលិសក្រុងបានលុង លោក ឯម វុន កត់សម្គាល់ថា ការបិទផ្ទះបន និងការបង្ក្រាបទីតាំងលួចលាក់នៃបនពេស្យាចារ ធ្វើឲ្យលេចចេញរូបភាពធ្វើអាជីវកម្មផ្សេងទៀតទាក់ទិនមុខរបរផ្លូវភេទនេះ។ លោកថា ប៉ូលិសជំនាញកំពុងស្រង់តួលេខនៃកន្លែងសេវាកម្មផ្សេងទៀត ដែលបង្កប់ការរកស៊ីផ្លូវភេទ រួមទាំងស៊ើបអង្កេតជាក់លាក់ប្រមូលវត្ថុតាង ដើម្បីបង្ក្រាបកន្លែងមានការចាត់តាំងសេវាកម្មផ្លូវភេទនេះ៖ «ក្រោយពីបិទអ៊ីចឹង យើងឃើញមានលេចរូបភាពគ្រាន់តែយើងដឹងថា មានជ្រកក្រោមផ្លាកហ្នឹង ខារ៉ាអូខេខ្នាតតូច ប៉ុន្តែឥឡូវយើងកំពុងចុះស្រង់ យើងកំពុងធ្វើរាល់ថ្ងៃ ប្រហែលមួយអាទិត្យទៀតហើយ។ ពេលមួយអាទិត្យហើយ បានយើងវាយតម្លៃថាអាណាមានប៉ុន្មានៗ អាណាត្រូវធ្វើម៉េចទៀត»។
អ្នកឃ្លាំមើលសិទ្ធិមនុស្សសមាគមអាដហុក (adhoc) ខេត្តរតនគិរី លោក ឆាយ ធី ហៅការកើនឡើងកន្លែងសេវាកម្មផ្លូវភេទ នឹងរួមចំណែកឲ្យមានការប្រើប្រាស់ថ្នាំញៀន និងការជួញដូរស្ត្រីកើនឡើង ប្រសិនអាជ្ញាធរមិនយកចិត្តទុកដាក់បង្ក្រាប។ លោកបង្ហាញក្តីបារម្ភទាក់ទិនបទល្មើស ដូចជាអំពើចោរកម្ម លួចប្លន់ ល្បែងស៊ីសង អំពើហិង្សាក្នុងគ្រួសារ ក៏ដូចជាអសន្តិសុខសង្គម នឹងកើតបន្ថែមទៀត ដែលធ្វើឲ្យប្រជាពលរដ្ឋក្នុងមូលដ្ឋានមិនមានសុវត្ថិភាព៖ «ការបណ្ដែតបណ្តោយឲ្យមានសេវាកម្មផ្លូវភេទ ការជួញដូរផ្លូវភេទហ្នឹង យើងមើលទៅឃើញអាចប្រឈមក្នុងសង្គម ប៉ះពាល់ដល់សន្តិសុខ សណ្ដាប់ធ្នាប់ថ្នាក់មូលដ្ឋាន។ សមត្ថកិច្ចពេលខ្លះដឹង ប៉ុន្តែគាត់មិនអើពើ ដោយសារសមត្ថកិច្ចមានឱកាសបិទបាំងរឿងហ្នឹងដែរ»។
ក្នុងឆ្នាំ២០១៤ នេះ ការិយាល័យប្រឆាំងការជួញដូរស្ត្រី នៃស្នងការដ្ឋានប៉ូលិសខេត្តរតនគិរី បានបង្ក្រាបករណីជួញដូរស្ត្រីក្នុងកន្លែងម៉ាស្សាមួយ ដែលជួយរំដោះស្ត្រីរងគ្រោះបាន ៤នាក់ និងចាប់ខ្លួនជនពាក់ព័ន្ធពីរនាក់បញ្ជូនទៅតុលាការ។
ស្នងការរងប៉ូលិសខេត្តរតនគិរី លោកស្រី កែវ ដាវី ថ្លែងថា សមត្ថកិច្ចជំនាញកំពុងយកចិត្តទុកដាក់ត្រួតពិនិត្យ និងស៊ើបអង្កេតករណីកើនឡើងនៃសេវាកម្មផ្លូវភេទថ្មីនេះ ដើម្បីចាត់វិធានការបង្ក្រាប។ ចំណែកករណីស្ត្រីរកស៊ីផ្លូវភេទដោយស្ម័គ្រចិត្ត វិធានការអប់រំត្រូវបានយកមកអនុវត្ត ដើម្បីឲ្យស្ត្រីទាំងនោះប្រុងប្រយ័ត្នផលប៉ះពាល់ផ្នែកសុខភាព និងសីលធម៌សង្គម៖ «មិនប្រព្រឹត្តនៅកន្លែងក៏ដោយ យើងធ្វើការស៊ើបអង្កេត បើសិនជាមានការជួញដូរដោយមានការចាត់តាំង មានក្បាលម៉ាស៊ីនដឹកនាំគ្រប់គ្រងអ៊ីចឹង អាហ្នឹងយើងដាក់វិធានការបង្ក្រាបតែម្តង។ ជួនកាលជនរងគ្រោះប្រព្រឹត្តខ្លួនវា យើងអត់មានស្អីទៅដាក់ទោសទណ្ឌគាត់ទេ យើងគ្រាន់តែធ្វើការអប់រំណែនាំកុំឲ្យប៉ះពាល់កិត្តិយសស្ត្រីខ្មែរ»។
ការប៉ាន់ប្រមាណរបស់មន្ត្រីឃ្លាំមើលសិទ្ធិមនុស្ស យ៉ាងហោចណាស់ស្ត្រីលក់ខ្លួនមិនតិចជាង ៥០០នាក់ កំពុងទទួលបម្រើផ្លូវភេទក្នុងនាមជាស្ត្រីកំដរភ្ញៀវក្នុងក្លិបខារ៉ាអូខេ ស្ត្រីម៉ាស្សា អ្នកបម្រើហាងកាហ្វេ និងស្ត្រីផ្សព្វផ្សាយស្រាបៀតាមភោជនីយដ្ឋាននៅក្រុងបានលុង។ ស្ត្រីមួយចំនួនមកពីខេត្តកំពង់ចាម ខេត្តបាត់ដំបង ខេត្តក្រចេះ ខេត្តស្ទឹងត្រែង និងទីក្រុងភ្នំពេញ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។