មន្ត្រីនាំពាក្យក្រសួងមហាផ្ទៃ អំពាវនាវឲ្យជនជាតិចារ៉ាយវៀតណាម ដែលគេហៅថា ម៉ុងតាញ៉ា ចំនួន ១៣នាក់ ដែលកំពុងលាក់ខ្លួនក្នុងព្រៃនៅតាមព្រំដែនកម្ពុជា-វៀតណាម ត្រូវបង្ហាញខ្លួនដល់អាជ្ញាធរខេត្តរតនគិរី ដើម្បីជៀសផុតពីការស្លាប់ដោយសារដាច់ស្បៀងអាហារ និងជំងឺតម្កាត់។ ប៉ុន្តែជនភៀសខ្លួនម៉ុងតាញ៉ានោះឲ្យដឹងថា ពួកគេព្រួយបារម្ភពីការចាប់បញ្ជូនត្រឡប់ទៅប្រទេសវៀតណាមវិញ ប្រសិនបើគេចេញទៅជួបនឹងអាជ្ញាធរ។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់កាលពីយប់ថ្ងៃទី២៥ វិច្ឆិកា ថា លោកគ្រោងបញ្ជូនក្រុមការងារចុះទៅពិនិត្យផ្ទាល់ និងវាយតម្លៃពីស្ថានភាពរបស់ជនជាតិចារ៉ាយវៀតណាម ១៣នាក់ដែលបានភៀសខ្លួនមកពីខេត្តយ៉ាឡាយ (Gai Lai) ភាគកណ្តាលប្រទេសវៀតណាម។ លោកថា រដ្ឋាភិបាលនៅមិនទាន់មានវិធានការនៅឡើយទេ ដោយរង់ចាំរបាយការណ៍ជាមុនសិន។
លោក ខៀវ សុភ័គ បន្តទៀតថា ដំបូងជនជាតិចារ៉ាយវៀតណាម ១៣នាក់ ត្រូវចេញពីក្នុងព្រៃជាមុនដើម្បីឲ្យសមត្ថកិច្ចអាចជួយសង្គ្រោះ៖ «យោបល់ល្អរបស់ខ្ញុំឲ្យគាត់ចេញបង្ហាញមុខជាមួយអាជ្ញាធរ កុំនៅក្នុងព្រៃអ៊ីចឹង។ នៅក្នុងព្រៃអ៊ីចឹងពិបាកដែរ មិនដឹងជាទៅរកនៅឯណា។ រាជរដ្ឋាភិបាលកម្ពុជា រីករាយនឹងទទួលអ្នកទាំងអស់នោះ ដើម្បីសហការជាមួយ យូ.អិន.អេច្ឆ.ស៊ី.អ (UNHCR)»។
ក៏ប៉ុន្តែអ្នកភូមិជនជាតិដើមភាគតិចម្នាក់ដែលសុំមិនបញ្ចេញឈ្មោះដើម្បីសុវត្ថិភាពឲ្យដឹងថា ជនជាតិដើមចារ៉ាយវៀតណាម ទាំង ១៣នាក់នេះ មិនហ៊ានចេញពីកន្លែងលាក់ខ្លួនក្នុងព្រៃទេ ដោយសារភ័យខ្លាចអាជ្ញាធរវៀតណាម និងកម្ពុជា ចាប់ពួកគេបញ្ជូនត្រឡប់ទៅប្រទេសវៀតណាម វិញ។
បុរសជនជាតិដើមភាគតិចដដែលនោះអះអាងថា សូម្បីរូបលោកផ្ទាល់វិញក៏កំពុងរងការគាបសង្កត់ពីអាជ្ញាធរមូលដ្ឋានដែរ ដោយសារតែបានលួចផ្តល់ស្បៀងអាហារ និងថ្នាំសង្កូវសម្រាប់ជនជាតិម៉ុងតាញ៉ា ទាំងនោះ៖ «ទី១ គាត់អត់ហ៊ានចេញ សុខចិត្តលាក់ខ្លួនក្នុងព្រៃ។ ទី២ គាត់កំពុងដាច់ស្បៀង ហើយយើងអត់ហ៊ានយកទៅឲ្យគាត់ ព្រោះអាជ្ញាធរព្រមានថា ឲ្យត្រឡប់ទៅវិញ ហើយថាបើមិនទៅវិញ គេចាប់ខ្ញុំអ្នកចិញ្ចឹម អ្នកជួយហ្នឹងទៀត គេប្រាប់អ៊ីចឹង»។
ជនជាតិដើមចារ៉ាយវៀតណាមទាំង ១៣នាក់នេះ មានពីរក្រុម ក្នុងនោះមានស្ត្រីម្នាក់ដែលទើបចេញពីពន្ធនាគារ។ ក្រុមទី១ មានគ្នា ៨នាក់ បានរត់ចេញពីភាគកណ្តាលនៃប្រទេសវៀតណាម កាលពីបីសប្តាហ៍មុន និងមួយក្រុមទៀតមានគ្នាបីនាក់បានរត់ចេញពីភូមិកំណើតចូលមកលាក់ខ្លូនក្នុងព្រៃខេត្តរតនគិរី កាលពីថ្ងៃសុក្រ សប្តាហ៍មុន ដើម្បីគេចខ្លួនចេញពីការធ្វើទុក្ខបុកម្នេញរបស់អាជ្ញាធរវៀតណាម លើបញ្ហាជំនឿសាសនាគ្រិស្ត គឺសាសនាប្រូតេស្តង់ (Protestant)។
ពាក់ព័ន្ធនឹងស្ថានភាពជនភៀសខ្លួនទាំងនោះ មន្ត្រីសម្របសម្រួលសមាគមអាដហុក (Adhoc) លោក ឆាយ ធី មានប្រសាសន៍កាលពីយប់ថ្ងៃទី២៥ វិច្ឆិកា ថា សមាគមអាដហុក នៅក្រុងភ្នំពេញ កំពុងសហការជាមួយមន្ត្រីអង្គការសហប្រជាជាតិទទួលបន្ទុកជនភៀសខ្លួន (UNHCR) ដើម្បីស្វែងរកដំណោះស្រាយជាបន្ទាន់ជូនជនភៀសខ្លួនទាំងនោះ៖ «យើងបានអន្តរាគមន៍នៅអង្គការសហប្រជាជាតិប្រចាំនៅប្រទេសកម្ពុជា ព្រមទាំងសមាគមអាដហុក យើងនៅក្រុងភ្នំពេញ ដើម្បីឲ្យលោកធ្វើការជាមួយរដ្ឋាភិបាលទាក់ទងនឹងសន្ធិសញ្ញាជនភៀសខ្លួន។ តាមដំណឹងពួកគាត់លាក់ខ្លួនរស់នៅក្នុងព្រៃ ភ័យខ្លាចអាជ្ញាធរវៀតណាម តាមប្រកៀក ហើយថា អាជ្ញាធរខ្មែរក៏ប្រតិបត្តិការជាមួយដែរ។ អ៊ីចឹងហើយពិបាកទាក់ទងនិងជួបយកព័ត៌មានពីគាត់ណាស់»។
ចំណែកស្នងការប៉ូលិសខេត្តរតនគិរី លោក នូវ គឿន បានបញ្ជាក់ប្រាប់វិទ្យុអាស៊ីសេរី កាលពីថ្ងៃទី២៥ វិច្ឆិកា ថា ករណីជនភៀសខ្លួនម៉ុងតាញ៉ានេះ លោកពុំទាន់ដឹងច្បាស់ថាពិតជាបានលាក់ខ្លួនក្នុងព្រៃនៅតំបន់ព្រំដែនកម្ពុជា-វៀតណាម នៅឡើយទេ។ លោកកំពុងចាត់បញ្ជូនក្រុមសមត្ថកិច្ចដើម្បីស្វែងរកអ្នកទាំងនោះ៖ «ឥឡូវនេះយើងកំពុងចាត់ការឲ្យកម្លាំងរបស់យើងស្វែងរកពួកគាត់នៅទីតាំងណា ចំណុចណាពិតឬអត់។ នេះគ្រាន់តែជាព័ត៌មាន មិនទាន់ផ្លូវការទេ ចាំយើងរកឃើញយ៉ាងណាខ្ញុំរាយការណ៍ថ្នាក់លើខ្ញុំសិន មិនអាចប្រាប់បានយ៉ាងណាទេ»។
ជុំវិញបញ្ហាជនភៀសខ្លួនម៉ុងតាញ៉ានេះ ប្រធានមូលនិធិ ដេហ្គា (DEGAR Foundation) ដែលមានមូលដ្ឋាននៅក្នុងរដ្ឋ ណត្ស ការ៉ូឡាយណា (North Carolina) លោក កុក ស សំដែងក្តីព្រួយបារម្ភអំពីសុវត្ថិភាពជនភៀសខ្លួនទាំងនោះ។
លោកក៏បានសំណូមពរថ្នាក់ដឹកនាំគណបក្សសង្គ្រោះជាតិ ជួយគិតគូរនិងផ្ដល់ជំនួយសង្គ្រោះបន្ទាន់ដល់ពួកគេផង ចំណែកលោកនឹងជួយផ្ដល់ថវិកាពីខាងក្រៅប្រទេស៖ «ខ្លាចតែរដ្ឋាភិបាលកម្ពុជា មិនឲ្យជួយទេ។ ខ្ញុំចង់ប្រាប់លោក សម រង្ស៊ី លោក កឹម សុខា ឲ្យជួយពួកគាត់ផង មានការលំបាកអី...»។
លោក កុក ស បញ្ជាក់ថា មូលនិធិលោកបានជួយធានាជនភៀសខ្លួនម៉ុងតាញ៉ា ជាច្រើនពាន់នាក់ មករស់នៅសហរដ្ឋអាមេរិកពីមុន។ ប៉ុន្តែនៅពេលនេះ សមត្ថកិច្ចអន្តោប្រវេសន៍សហរដ្ឋអាមេរិក មិនអនុញ្ញាតឲ្យមានការធានាជនភៀសខ្លួនម៉ុងតាញ៉ា បន្ថែមមកអាមេរិក ទៀតឡើយ។
រដ្ឋាភិបាលកម្ពុជា បានបិទជំរំជនភៀសខ្លួនម៉ុងតាញ៉ា របស់អង្គការសហប្រជាជាតិទទួលបន្ទុកជនភៀសខ្លួននៅក្នុងរាជធានីភ្នំពេញ ជាផ្លូវការ កាលពីថ្ងៃទី១៥ ខែកុម្ភៈ ឆ្នាំ២០១១។ នៅពេលនោះ ជនភៀសខ្លួនមួយចំនួនបានទទួលសិទ្ធិជ្រកកោននៅក្នុងប្រទេសទី៣ រួមមានសហរដ្ឋអាមេរិក និងប្រទេសកាណាដាជាដើម ហើយខ្លះទៀត ត្រូវបានរដ្ឋាភិបាលកម្ពុជា បញ្ជូនពួកគេត្រឡប់ទៅប្រទេសវៀតណាមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។