ពលរដ្ឋ​មួយ​ចំនួន​នៅ​បាត់ដំបង​បាត់​សិទ្ធិ​បោះឆ្នោត

ការ​បាត់​ឈ្មោះ និង​ការ​ពុំ​មាន​ឈ្មោះ​នៅ​ក្នុង​បញ្ជី​បោះឆ្នោត តែង​តែ​កើត​មាន​ឡើង​ជា​រៀង​រាល់​ឆ្នាំ ហើយ​បញ្ហា​នេះ​ត្រូវ​គេ​ចោទ​ថា បង្ក​ឡើង​ដោយសារ​កំហុស​បច្ចេកទេស​របស់​គណៈកម្មការ​រៀបចំ​ការ​បោះឆ្នោត និង​ការ​រើសអើង​និន្នាការ​គណបក្ស​នយោបាយ។
ដោយ សួន សុផលមុន្នី
2013-07-13
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប្រជាពលរដ្ឋ​នៅ​ឃុំ​ព្រែកជីក ស្រុក​រុក្ខគិរី ខេត្ត​បាត់ដំបង ជា​ច្រើន​រយ​នាក់ កំពុង​បាត់​បង់​សិទ្ធិ​មិន​អាច​ចូលរួម​ក្នុង​ការ​បោះឆ្នោត​ជ្រើស​តាំង​តំណាង​រាស្ត្រ​នីតិកាល​ទី៥ ដែល​នឹង​ធ្វើ​ឡើង​នៅ​ថ្ងៃ​ទី២៨ ខែ​កក្កដា ឆ្នាំ​២០១៣។ ការ​បាត់​ឈ្មោះ​អ្នក​បោះឆ្នោត​នេះ ត្រូវ​បាន​មន្ត្រី​បក្ស​ប្រឆាំង​ចោទ​ថា បណ្ដាល​មក​ពី​ការ​រើសអើង​ខាង​ផ្នែក​នយោបាយ។

ប្រជាពលរដ្ឋ​ឈ្មោះ សុន សែន អាយុ ៣១​ឆ្នាំ រស់នៅ​ភូមិ​ព្រែកតាវេន ឃុំ​ព្រែកជីក អះអាង​ថា រូប​លោក និង​អ្នក​ភូមិ​ជា​ច្រើន​នាក់ ដែល​ធ្លាប់​មាន​ឈ្មោះ​បោះឆ្នោត​ក្នុង​អាណត្តិ​កន្លង​ទៅ និង​មាន​ឈ្មោះ​ក្នុង​ការ​បោះឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់​កាល​ពី​ឆ្នាំ​២០១២ នោះ ឥឡូវ​នេះ ឈ្មោះ​របស់​ពួក​គាត់​បាន​បាត់​បង់​ពី​បញ្ជី​បោះឆ្នោត។

មន្ត្រី​គណបក្ស​សង្គ្រោះ​ជាតិ ប្រចាំ​ឃុំ​រុក្ខគិរី លោក ចក់ បូថា អះអាង​ថា យ៉ាង​ហោច​ណាស់​មាន​ប្រជាពលរដ្ឋ​ជិត ៣០០​នាក់ នៅ​ឃុំ​ព្រែកជីក ពុំ​មាន​ឈ្មោះ​បោះឆ្នោត​ទេ។ ក្នុង​នោះ ប្រជាពលរដ្ឋ​ខ្លះ​គ្រប់​អាយុ​បោះឆ្នោត និង​អ្នក​ខ្លះ​ទៀត​មាន​ឈ្មោះ​បោះឆ្នោត​កាល​បី​អាណត្តិ​មុន ប៉ុន្តែ​នៅ​អាណត្តិ​នេះ​បែរ​ជា​បាត់​ឈ្មោះ​ទៅ​វិញ។

មន្ត្រី​គណបក្ស​សង្គ្រោះ​ជាតិ អះអាង​ថា ភាព​មិន​ប្រក្រតី​ក្នុង​ការ​បាត់​ឈ្មោះ​ប្រជាពលរដ្ឋ​ពី​បញ្ជី​បោះឆ្នោត​នេះ កើត​ឡើង​ដោយសារ​ការ​រើសអើង​និន្នាការ​គណបក្ស​នយោបាយ។

ទាក់ទិន​ការ​បាត់​ឈ្មោះ​ពី​បញ្ជី​បោះឆ្នោត​នេះ ប្រធាន​គណៈកម្មការ​រៀបចំ​ការ​បោះឆ្នោត​ខេត្ត​បាត់ដំបង លោក វន ពន បញ្ជាក់​ថា ក្នុង​រយៈពេល​កន្លង​ទៅ​នេះ មាន​លេច​ឮ​ព័ត៌មាន​ច្រើន​ជុំវិញ​ករណី​ថា ប្រជាពលរដ្ឋ​បាត់​ឈ្មោះ​ពី​បញ្ជី​ឈ្មោះ​បោះឆ្នោត។ លោក​ពន្យល់​ថា ប្រជាពលរដ្ឋ​ទាំង​នោះ​អាច​មក​ជួប​មន្ត្រី​រៀបចំ​ការ​បោះឆ្នោត ដើម្បី​រក​ឈ្មោះ​ឡើង​វិញ។

ភាព​មិន​ប្រក្រតី​ក្នុង​ការ​បាត់​បង់​ឈ្មោះ​ប្រជាពលរដ្ឋ​ពី​បញ្ជី​បោះឆ្នោត​នេះ គេ​កត់​សម្គាល់​ឃើញ​កើត​មាន​គ្រប់​អាណត្តិ​បោះឆ្នោត ហើយ​បញ្ហា​នេះ​បណ្ដាល​ឲ្យ​មាន​ការ​រិះគន់​ពី​គណបក្ស​នយោបាយ។

អ្នក​សម្រប​សម្រួល​សមាគម​អាដហុក (Adhoc) ប្រចាំ​ខេត្ត​បាត់ដំបង លោក យិន ម៉េងលី ថ្លែង​ថា រយៈ​កាល​កន្លង​ទៅ​នេះ សមាគម​បាន​ទទួល​ព័ត៌មាន​ច្រើន​ពី​ប្រជាពលរដ្ឋ។ អ្នក​ខ្លះ​មាន​ឈ្មោះ​បោះឆ្នោត​កាល​ពី​ឆ្នាំ​២០១២ ឥឡូវ​បាត់​ឈ្មោះ​នៅ​ឆ្នាំ​២០១៣។

តាម​នីតិវិធី​បោះឆ្នោត ប្រជាពលរដ្ឋ​ត្រូវ​នាំគ្នា​ទៅ​ពិនិត្យ​ឈ្មោះ​បោះឆ្នោត​នៅ​ពេល​គណៈកម្មការ​រៀបចំ​ការ​បោះឆ្នោត​បិទ​ប្រកាស​បញ្ជី​ឈ្មោះ​អ្នក​បោះឆ្នោត ប៉ុន្តែ​ប្រជាពលរដ្ឋ​ខ្លះ​ខកខាន​ពុំ​បាន​ទៅ​ពិនិត្យ​ឈ្មោះ​របស់​ខ្លួន​នោះ​ទេ។ បញ្ហា​នេះ​បង្ក​ឲ្យ​មាន​បញ្ហា​កើត​ឡើង។ លោក យិន ម៉េងលី បាន​លើក​ឡើង​នូវ​បទ​ពិសោធន៍​របស់​ខ្លួន​ដែល​បាន​ជួប​ប្រទះ​កន្លង​មក។

ករណី​បាត់​ឈ្មោះ​ប្រជាពលរដ្ឋ​ពី​បញ្ជី​បោះឆ្នោត​នៅ​ក្នុង​ខេត្ត​បាត់ដំបង នេះ លោក យិន ម៉េងលី បាន​ស្នើ​ឲ្យ​មាន​ការ​ពិនិត្យ​បញ្ហា​នេះ​ឡើង​វិញ ព្រោះ​ថា បើ​សិន​ការ​បាត់​ប្រជាពលរដ្ឋ​ពី​បញ្ជី​បោះឆ្នោត​នេះ មាន​ចំនួន​ភាគ​រយ​កើន​ឡើង​ច្រើន​នោះ វា​នឹង​នាំ​ទៅ​រក​ផល​ប៉ះពាល់​ដល់​លទ្ធផល​នៃ​ការ​បោះឆ្នោត​ថែម​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

ទស្សនៈក្មេង

តើការធ្វើសវនកម្មរបស់គ ជ ប ពិតត្រឹមត្រូវមែនទេ? ជាក់ស្តែង យាយរបស់ខ្ញុំទទួលមរណៈភាពជាង ៥ ឆ្នាំមកហើយ ហេតុអ្វី គ ជ ប នៅតែហើយគាត់មកបោះឆ្នោត ក្នុងនីតិកាលទី ៥ នេះទៀត?

Jul 14, 2013 11:47 PM