ជំទប់ទី២ ឃុំស្រែសំបូរ ស្រុកសៀមប៉ាង ខែត្រស្ទឹងត្រែង មកពីគណបក្ស សម រង្ស៊ី ចោទអាជ្ញាធរស្រុកសៀមប៉ាង ដែលមកពីគណបក្សប្រជាជនកម្ពុជា ថា បានរារាំងពួកគេមិនឲ្យប្រមូលស្នាមមេដៃពលរដ្ឋដើម្បីដាក់ញត្តិថ្វាយព្រះមហាក្សត្រ។ ពួកគេអះអាងថា អាជ្ញាធរស្រុកសៀមប៉ាង បានព្រមានអនុវត្តច្បាប់ បើពួកគេនៅតែបន្តប្រមូលស្នាមមេដៃ។
ការចោទប្រកាន់នេះ ធ្វើឡើងបន្ទាប់ពីមេឃុំស្រែសំបូរ ក្រុមប្រឹក្សាស្រុកសៀមប៉ាង មកពីគណបក្សកាន់អំណាច និងកម្លាំងប្រដាប់អាវុធបានចុះដល់ផ្ទះជំទប់ទី២ នៃឃុំស្រែសំបូរ មកពីគណបក្ស សម រង្ស៊ី លោក ឌី សន កាលពីចុងខែឧសភា ហើយបានព្រមានលោកមិនឲ្យដើរប្រមូលស្នាមមេដៃ។
ជំទប់ទី២ ឃុំស្រែសំបូរ មកពីគណបក្ស សម រង្ស៊ី លោក ឌី សន រៀបរាប់ថា មេឃុំស្រែសំបូរ លោក ស៊ិង ម៉ាន់ និងក្រុមប្រឹក្សាស្រុកសៀមប៉ាង លោក ថាវ សុគន្ធ បានដកហូតតារាងប្រមូលស្នាមមេដៃគាំទ្រញត្តិពីលោកកាលពីថ្ងៃទី២១ ខែឧសភា និងគំរាមអនុវត្តច្បាប់ បើលោកនៅតែមានៈដើរប្រមូលស្នាមមេដៃពលរដ្ឋដែលមិនសុំច្បាប់អនុញ្ញាត។ លោកកត់សម្គាល់ថា កន្លងមកការរៀបចំរចនាសម្ព័ន្ធភូមិ-ឃុំ របស់គណបក្សសង្គ្រោះជាតិ ក៏គេតម្រូវឲ្យសុំច្បាប់អនុញ្ញាតជាមុនសិនដែរ៖ «អាហ្នឹងជាការបំបិទសិទ្ធិសេរីភាព ហើយក៏ជាការគំរាមកំហែង ដើម្បីកុំឲ្យពួកខ្ញុំធ្វើសកម្មភាពនយោបាយណាមួយ»។
ឆ្លើយតបការចោទប្រកាន់នេះ សមាជិកក្រុមប្រឹក្សាស្រុកសៀមប៉ាង មកពីគណបក្សកាន់អំណាច លោក ថាវ សុគន្ធ អះអាងថា អាជ្ញាធរមិនជំទាស់នឹងការប្រមូលស្នាមមេដៃនោះទេ តែសូមឲ្យសុំច្បាប់អនុញ្ញាតជាមុនសិន។ លោកបញ្ជាក់ថា ការដើរប្រមូលស្នាមមេដៃនោះ អាចធ្វើទៅបានលុះត្រាមានច្បាប់អនុញ្ញាតពីអាជ្ញាធរស្រុកជាមុនសិន៖ «មិនដឹងផ្ដិតមេដៃរឿងអី ម៉េចគេដឹង។ សំខាន់គឺប្រជាជននៅនេះជាប្រជាជនឆោតល្ងង់ អត់ដឹងរឿងអីសោះ។ ដូច្នេះផ្ដិតមេដៃហ្នឹងមិនដឹងធ្វើផលប្រយោជន៍អី»។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល យល់ថា ពុំមានច្បាប់ណាហាមមិនឲ្យគណបក្សនយោបាយដើរប្រមូលស្នាមមេដៃពីអ្នកគាំទ្ររបស់ខ្លួននោះទេ។ លោកថា ការសម្រេចចិត្តផ្ដិតមេដៃពីពលរដ្ឋ គឺជាការសម្រេចចិត្តរបស់ពលរដ្ឋផ្អែកលើសិទ្ធិសេរីភាពចូលរួមបញ្ហានយោបាយដែលមានចែងក្នុងច្បាប់រដ្ឋធម្មនុញ្ញ៖ «អ៊ីចឹងនៅក្នុងច្បាប់ដូចជាមិនមានការហាមឃាត់ទេ។ ដោយឡែកប្រសិនជាអាជ្ញាធរស្រុកហាមជាតិហ្នឹងគឺប៉ះពាល់សិទ្ធិសេរីភាពរបស់គាត់»។
ប្រធានប្រតិបត្តិគណបក្សសង្គ្រោះជាតិ ខែត្រស្ទឹងត្រែង លោក ពុយ ចាន់ថាឡា កត់សម្គាល់ថា ការប្រមូលស្នាមមេដៃអ្នកគាំទ្រញត្តិថ្វាយព្រះមហាក្សត្រនៅទូទាំងស្រុកនៃខែត្រស្ទឹងត្រែង មានការរារាំង កើតមានតែស្រុកសៀមប៉ាង ប៉ុណ្ណោះ។ លោកចាត់ទុកការរារាំងនោះថា បិទសិទ្ធិសេរីភាពពលរដ្ឋមិនឲ្យចូលរួមបញ្ហានយោបាយ និងជាទង្វើល្មើសច្បាប់៖ «ខុសច្បាប់ហើយគាត់និយាយអ៊ីចឹងគឺប្រើអំណាចផ្ដាច់ការរហើយ ព្រោះអីសិទ្ធិពលរដ្ឋផ្ដិតមេដៃជារឿងរបស់គាត់ ជាឆន្ទៈរបស់គាត់»។
មកទល់ពេលនេះ ការប្រមូលស្នាមមេដៃរបស់គណបក្សសង្គ្រោះជាតិ ពីអ្នកគាំទ្រនៅខែត្រស្ទឹងត្រែង មានចំនួន ៥៨០ស្នាមមេដៃ។ ញត្តិនោះដើម្បីថ្វាយព្រះមហាក្សត្រសុំឲ្យព្រះអង្គជួយអន្តរាគមន៍ទៅរាជរដ្ឋាភិបាលករណីចាប់ខ្លួនតំណាងរាស្ត្រ និងសង្គមស៊ីវិល និងអន្តរាគមន៍ចំពោះការអនុវត្តច្បាប់របស់តុលាការមានស្តង់ដារពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។