សមាជិក និងសកម្មជនរបស់សមាគមនេះ បានរងនូវការគំរាមកំហែងផ្ទួនៗបន្ទាប់ពីស្ថានការណ៍នយោបាយតានតឹង និងមានការបង្ក្រាបដោយកម្លាំងប្រដាប់អាវុធទាំងកម្រោលទៅលើកម្មកររោងចក្រ ដែលធ្វើបាតុកម្មទាមទារសុំដំឡើងប្រាក់ខែកាលពីថ្ងៃទី២ និងទី៣ ខែមករា កន្លងមកនេះ។
ប្រធានសមាគមគ្រូបង្រៀនកម្ពុជាឯករាជ្យ ប្រចាំខេត្តទាំងពីរ នៅថ្ងៃទី៩ ខែមករា បានចោទប្រកាន់អាជ្ញាធរ និងថ្នាក់ដឹកនាំស្ថាប័នអប់រំមួយចំនួន ថាមានការរឹតត្បិត និងគំរាមកំហែងបំបាក់ស្មារតីទៅលើក្រុមគ្រូបង្រៀន ជាពិសេសសកម្មជនរបស់សមាគមមិនឲ្យហ៊ានងើបឡើងតវ៉ា ដើម្បីទាមទារសិទ្ធិ និងប្រាក់ខែសមរម្យរបស់ខ្លួន។
ប្រធានសមាគមគ្រូបង្រៀនកម្ពុជាឯករាជ្យ ប្រចាំខេត្តកំពង់ឆ្នាំង លោក ជួន ចាំ មានប្រសាសន៍ថា ក្រុមគ្រូបង្រៀន និងសកម្មជនរបស់លោកមួយចំនួនមានការភ័យខ្លាច បន្ទាប់ពីខាងស្នងការនគរបាលខេត្ត កោះហៅលោកទៅសួរនាំទាក់ទងនឹងរឿងធ្វើបាតុកម្ម និងការញុះញង់ផ្សេងៗនៅព្រឹកថ្ងៃទី៨ ខែមករា រួចមក។ លោកបន្តថា ចំពោះកាលបរិច្ឆេទនៃការធ្វើកូដកម្មទាមទារសុំដំឡើងប្រាក់ លោកមិនទាន់កំណត់នៅឡើយ ប៉ុន្តែលោករង់ចាំមើលសកម្មភាពធ្វើកូដកម្មរបស់គ្រូបង្រៀននៅតាមបណ្ដាខេត្តក្រុងធំៗមួយចំនួន ដូចជា ខេត្តកណ្ដាល កំពង់ចាម និងរាជធានីភ្នំពេញ ជាមុនសិន ទើបខេត្តកំពង់ឆ្នាំង ធ្វើតាមក្រោយ៖ «មានការគំរាមកំហែង អ៊ីចឹងគ្រាន់តែសមាជិកហ្នឹងបាក់ខ្លបខ្លាច ជាពិសេសអ្នកដែលចូលមុនគេថាចូលរួមច្រើនណាស់គម្រោងធ្វើហ្នឹង ១០០នាក់ សុរាម្រិត។ អត់ទាន់ដឹងប្រាកដទេ ចាំមើលសភាពការណ៍បន្តិចសិន ចាំមើលបែបរាងធូរស្បើយបន្តិច»។
ចំណែកប្រធានសមាគមគ្រូបង្រៀនកម្ពុជាឯករាជ្យ ប្រចាំខេត្តពោធិ៍សាត់ អ្នកស្រី គឹម ដារ៉ានី បញ្ជាក់ថា រយៈពេលចុងក្រោយនេះ សមាជិករបស់សមាគម រួមទាំងរូបអ្នកស្រីផ្ទាល់ផង បានទទួលរងនូវការបំភិតបំភ័យពីជនមិនស្គាល់មុខ និងថ្នាក់ដឹកនាំក្នុងស្ថាប័នអប់រំមួយចំនួនទៀត។ អ្នកស្រីថា បើទោះបីជានៅខេត្តពោធិ៍សាត់ មានសមាជិករបស់សមាគមជាង ៤០នាក់ ក៏ប៉ុន្ដែការធ្វើកូដកម្មមិនសូវស្រុះគ្នាឡើយ ហើយកាន់តែមានភាពភ័យខ្លាច បន្ទាប់ពីក្រសួងអប់រំ ចេញសេចក្ដីណែនាំស្ដីអំពីការពង្រឹងការអនុវត្តកាតព្វកិច្ចរបស់បុគ្គលិកអប់រំ ដែលអ្នកស្រីចាត់ទុកថាជាការគំរាមកំហែងមកលើក្រុមគ្រូបង្រៀន ដែលមានគម្រោងធ្វើកូដកម្មទាមទារដំឡើងប្រាក់ខែនោះ។
វិទ្យុអាស៊ីសេរី មិនអាចទាក់ទងរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី៩ ខែមករា។
យ៉ាងណា សេចក្ដីណែនាំកម្រាស់បីទំព័ររបស់ក្រសួងអប់រំ យុវជន និងកីឡា កាលពីថ្ងៃទី៣ ខែមករា បានលើកយកមាត្រាច្បាប់ និងទណ្ឌកម្មខាងផ្នែកវិន័យរបស់បុគ្គលិកអប់រំជាច្រើនចំណុច មកបញ្ជាក់អំពីទណ្ឌកម្ម និងការពិន័យជាប្រាក់ជាច្រើនលានរៀលទៀតផង។ ខ្លឹមសារនៃសេចក្ដីណែនាំនោះ ក៏បានបញ្ជាក់ដែរថា បុគ្គលិកអប់រំទាំងអស់ត្រូវបង្កើននូវការយកចិត្តទុកដាក់ចំពោះកាតព្វកិច្ចរបស់ខ្លួន និងជៀសវាងការញុះញង់ ឬធ្វើកូដកម្មខុសច្បាប់ដែលនាំឲ្យប៉ះពាល់ដល់វិស័យអប់រំនៅកម្ពុជា។
ទាក់ទងនឹងបញ្ហានេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍ថា សមាគមលោកមិនបានផ្លាស់ប្ដូរជំហរក្នុងការធ្វើកូដកម្ម ដើម្បីទាមទារប្រាក់ខែសមរម្យជូនគ្រូបង្រៀនឡើយ ហើយលោកនឹងប្រកាសធ្វើកូដកម្មដោយចំហនៅទូទាំងប្រទេសក្នុងពេលឆាប់ៗខាងមុខ៖ «ឥឡូវហ្នឹងលោកគ្រូអ្នកគ្រូកំពុងតែបន្តធ្វើកូដកម្មជាបន្តបន្ទាប់ហើយៗសមាគមនឹងប្រកាសទៅដល់លោកគ្រូអ្នកគ្រូមួយចំនួន ដែលមិនទាន់បានធ្វើ យើងនឹងប្រកាសជាចំហតែម្ដងហើយបាទ»។
មន្ត្រីសមាគមគ្រូបង្រៀនកម្ពុជាឯករាជ្យ ប្រចាំខេត្តពោធិ៍សាត់ និងខេត្តកំពង់ឆ្នាំង តែងតែទទួលរងនូវការរើសអើង និងគំរាមកំហែងតាមរូបភាពផ្សេងៗពីសំណាក់អាជ្ញាធរ និងថ្នាក់ដឹកនាំមន្ទីរ ឬសាលារបស់ខ្លួន ចំពោះការចូលរួមយ៉ាងសកម្មរបស់ពួកគាត់ ក្នុងការទាមទារសិទ្ធិ ឬប្រាក់បៀវត្សសមរម្យជូនគ្រូបង្រៀនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។