ការដាក់បម្រាមហាមឃាត់នេះ បានអូសបន្លាយអស់រយៈពេលជិតមួយខែមកហើយ បន្ទាប់ពីបង្ក្រាបការតវ៉ារបស់ក្រុមកម្មករនៅលើបណ្ដោយផ្លូវវ៉េងស្រេង និងការបង្ក្រាបបាតុកម្មបក្សសង្គ្រោះជាតិ នៅទីលានប្រជាធិបតេយ្យ កាលពីដើមខែមករា នេះ។ ការបង្ក្រាបចុងក្រោយចំនួនពីរថ្ងៃជាប់ៗគ្នានេះ គឺការតវ៉ារបស់សហព័ន្ធសហជីពកម្មករពីបញ្ហាប្រាក់ខែ និងការតវ៉ារបស់ក្រុមលោក ម៉ម សូណង់ដូ នៅមុខក្រសួងព័ត៌មាននៅព្រឹកថ្ងៃច័ន្ទ ទី២៧ មករា បានបណ្ដាលឲ្យមានអ្នករងរបួសជាច្រើននាក់។ចំណែកក្រុមសិទ្ធិមនុស្សបានថ្កោលទោសចំពោះសកម្មភាពបង្ក្រាបដោយហិង្សានេះ។
ពលរដ្ឋរងរបួសដោយសារកងកម្លាំងសន្តិសុខសាលារាជធានីភ្នំពេញ និងកម្លាំងកងរាជអាវុធហត្ថវាយដំឲ្យរបួសធ្ងន់នោះ ទាមទារឲ្យមានក្រុមស៊ើបអង្កេតរកជនដៃដល់ដែលបានប្រើអំពើហិង្សាវាយដំលើប្រជាពលរដ្ឋយកមកផ្ដន្ទាទោស។
ជនរងគ្រោះម្នាក់ក្នុងចំណោមមនុស្សប្រមាណជិត ១០នាក់ គឺជាជំទប់ទីមួយនៃឃុំគគីរធំ ស្រុកកៀនស្វាយ ខេត្តកណ្តាល មកពីគណបក្ស សម រង្ស៊ី ឈ្មោះ មឹក ជា។ លោកមានអាយុប្រមាណជាង ៦០ឆ្នាំ បានរងរបួសធ្ងន់ដោយសារកម្លាំងសមត្ថកិច្ចបង្ក្រាបបាតុកម្មវាយដំរូបលោកក្នុងពេលគាត់ចូលរួមទាមទារជាមួយលោក ម៉ម សូណង់ដូ ប្រធានវិទ្យុសំបុកឃ្មុំ នៅមុខក្រសួងព័ត៌មាន កាលពីថ្ងៃទីច័ន្ទ ទី២៧ ខែមករា។
លោក មឹក ជា បានឲ្យអ្នកសារព័ត៌មានដឹងទាំងឈឺចាប់មុខរបួស ឈាមប្រឡាក់ពេញមុខ ចំណែកមាត់ និងភ្នែកនៅជាប់បង់រុំមុខរបួស ហើយបានព្យាយាមរៀបរាប់ពីហេតុការណ៍កងកម្លាំងវាយដំរូបលោក៖ «ខ្ញុំកំពុងតែនៅជាមួយលោកប្រធាន ម៉ម សូណង់ដូ ដើម្បីការពារ ស្រាប់តែកងកម្លាំងគេបុកសម្រុកមក ស្រាបតែខ្ញុំដួល គេអុកនឹងជង្គង់ច្រើនជើងណាស់ បួនដប់ជើងនោះ…។ ...សាហាវជាងប៉ុលពតទៀតបង! ប៉ុលពតវាសម្លាប់មនុស្ស វាចាត់រណសិរ្សស្ងាត់ៗ ហៅទៅសម្លាប់តែម្ដង ប៉ុន្តែសង្គមនេះវាធ្វើបាបស្រស់តែម្ដង សាហាវជាងប៉ុលពតឆ្ងាយណាស់»។
ការរៀបរាប់បានខ្លះនេះ បន្ទាប់ពីក្រុមគ្រូពេទ្យអង្គការលីកាដូ និងក្រុមសង្គ្រោះបន្ទាន់ជម្លៀសរូបលោក និងអ្នករបួសដទៃទៀតយកមកព្យាបាលនៅតំបន់បឹងកក់។
លោក មឹក ជា បានរងរបួសក្បាលខ្លាំង បែកគល់ចិញ្ចើម បែកមាត់ចេញឈាមខ្លាំង ត្រូវខ្លួន និងជើង។
ចំណែកអ្នករត់ម៉ូតូឌុបម្នាក់ទៀត ក៏ត្រូវក្រុមបង្ក្រាបបាតុកម្មវាយដំរូបលោកឲ្យរបួសពេញខ្លួន និងបែកក្បាលឈាមហូរស្រោចពេញខ្លួនដែរ។
បុរសម្នាក់នេះឈ្មោះ សុខ នី មានមុខរបរត់ម៉ូតូឌុប។ លោកថា ការប្រើអំពើហិង្សាវាយដំលើរូបលោកនោះជារឿងអយុត្តិធម៌បំផុត ពីព្រោះលោកមិនបានចូលរួមធ្វើបាតុកម្មនោះទេ ដោយគ្រាន់តែលោកធ្វើដំណើរលើផ្លូវព្រះមុនីវង្ស ឆ្លងកាត់ក្រសួងព័ត៌មាននោះដោយចៃដន្យប៉ុណ្ណោះ៖ «តាមពិតទៅខ្ញុំអត់ដឹងក្បួននោះទេ ខ្ញុំគេធ្វើចរាចរណ៍ឲ្យទៅ ដល់អ៊ីចឹងខ្ញុំទៅ ទៅដល់ត្រង់ហ្នឹងកម្លាំងគេមកដល់ទៅហើយហ្នឹង ដល់ពេលកម្លាំងគេមកដល់ ខ្ញុំចូលទៅក្នុងកន្លែងក្រុមហ៊ុនគេហ្នឹង ដល់ពេលខ្ញុំចូលទៅដល់ក្នុងស្រាប់តែថា ឲ្យចេញមកវិញ អ៊ីចឹងខ្ញុំព្រមចេញ ស្រាប់តែមានកម្លាំងសន្តិសុខគេហ្នឹងមកទាញវ៉ៃខ្ញុំតែម្ដង ខ្ញុំពាក់មួយសុវត្ថិភាព គេទាញក្បាលខ្ញុំវ៉ៃ ហើយខ្ញុំអោនចុះទៅក៏គេវ៉ៃម៉ាំងៗ ពីលើពីក្រោយ»។
អ្នករងរបួសដោយសារការបង្ក្រាបក្បួនតវ៉ានៅមុខក្រសួងព័ត៌មាន កាលពីព្រឹកថ្ងៃទី២៧ មករានោះ មានប្រមាណជិត ១០នាក់។ អ្នកទាំងនោះទាមទាររកយុត្តិធម៌ និងគ្រោងដាក់ពាក្យប្ដឹងទៅតុលាការឲ្យរកជនដៃដល់នៃការប្រើអំពើហិង្សាលើពលរដ្ឋ និងទាមទារឲ្យមានអ្នកទទួលខុសត្រូវក្នុងរឿងនេះ។
លោក សុខ នី និង លោក មឹក ជា៖ «ខ្ញុំទាមទារឲ្យរកយុត្តិធម៌ក្នុងសង្គមឲ្យបានត្រឹមត្រូវ កុំឲ្យវាអ៊ីចឹង ព្រោះជនដៃដល់ហ្នឹងគិតទៅគាត់ធ្វើហ្នឹងខ្លាំងណាស់ ដូចថា បើសម័យខ្មែរក្រហមគេឲ្យគាត់អារកហុតឈាម តាមមើលទៅប្រហែលជាគាត់អារកហុតឈាមតែម្ដង តាមអ្វីដែលគាត់ធ្វើហ្នឹង។ ត្រូវតែចង់ដាក់ពាក្យប្ដឹងដែរ ដើម្បីរកមុខអ្នកដែលប្រើអំពើហិង្សាលើរូបខ្ញុំ និងអ្នករបួសជាច្រើននាក់ទៀត»។
កាលពីព្រឹកថ្ងៃច័ន្ទ ទី២៧ មករា លោក ម៉ម សូណង់ដូ បានដឹកនាំក្បួនដង្ហែមួយដែលមានអ្នកចូលរួមជាច្រើនរយនាក់ ដោយចេញដំណើរពីទីលានប្រជាធិបតេយ្យនៅម៉ោងប្រមាណជាង ៩ព្រឹក។ ក្បួនដង្ហែនោះបានទម្លុះការរារាំងរបស់សមត្ថកិច្ចនៅម្ដុំស្ពាននាគខាងត្បូងវត្តភ្នំ ហើយឆ្ពោះទៅមុខក្រសួងព័ត៌មាន។
លោក ម៉ម សូណង់ដូ៖ «ការជួបជុំថ្ងៃនេះមិនមែនជារឿងដំឡើងប្រាក់ខែទេ គឺពលរដ្ឋស្វែងយល់ចង់មានការចេះដឹង ចង់ស្ដាប់វិទ្យុសំបុកឃ្មុំ ដែលប្រជាពលរដ្ឋមួយចំនួនមិនបានស្ដាប់ នេះជាចំណុចសំខាន់បំផុតដែលប្រជាពលរដ្ឋត្រូវស្វែងយល់ អាហ្នឹងវាស្របទៅតាមរដ្ឋធម្មនុញ្ញវាស្របទៅតាមគោលការណ៍រដ្ឋាភិបាល…»។
បន្ទាប់ពីក្បួនបានទៅដល់គោលដៅប្រមាណជាងកន្លះម៉ោង គឺនៅម៉ោងប្រមាណជាង ១០ព្រឹកថ្ងៃទី២៧ មករា ក្រុមអាជ្ញាធរដែលដឹកនាំដោយមេបញ្ជាការអាវុធហត្ថរាជធានីភ្នំពេញ លោក រ័ត្ន ស្រ៊ាង បានប្រកាសតាមឧគ្ឃោសនស័ព្ទឲ្យពលរដ្ឋនិងបាតុករទាំងអស់ចេញពីមុខក្រសួងព័ត៌មាន និងបើកចរាចរណ៍ឡើងវិញ ដោយសមត្ថកិច្ចទាំងនោះទុកពេលឲ្យ ៥នាទី។
ក្រុមអ្នកតវ៉ាហាក់មិនអើពើចំពោះការប្រកាសជូនដំណឹងនោះឡើយ ព្រោះពួកគេមិនទាន់ទទួលបានការឆ្លើយតបពីរដ្ឋមន្ត្រីក្រសួងព័ត៌មានថាយ៉ាងណានោះទេ។ ភ្លាមៗនោះ កម្លាំងកងរាជអាវុធហត្ថរាជធានីភ្នំពេញ ប្រមាណជាង ៥០០នាក់ អមទៅដោយកម្លាំងនគរបាលបង្ក្រាបបាតុកម្មរាប់សិបនាក់ រួមនឹងកម្លាំងសន្តិសុខសាលារាជធានីភ្នំពេញ ជាច្រើនផ្សេងទៀត ត្រូវបានបញ្ជាឲ្យចូលវាយសំពងបង្ក្រាបក្រុមបាតុករដែលដឹកនាំដោយលោក ម៉ម សូណង់ដូ។
ការបង្ក្រាបនោះសមត្ថកិច្ចបានបាញ់គ្រាប់ផ្សែងជាច្រើនគ្រាប់ផង ធ្វើឲ្យស្ថានការណ៍នៅមុខក្រសួងព័ត៌មាននោះ ស្ថិតក្នុងសភាពជ្រួលច្របល់ខ្លាំងប្រៀបបាននឹងការរត់គេចចេញពីសមរភូមិសង្គ្រាមប្រដាប់អាវុធដូច្នោះដែរ។
ការបង្ក្រាបដោយហិង្សាពីសំណាក់អាជ្ញាធររាជធានីភ្នំពេញ បែបនេះ ត្រូវបានមន្ត្រីសិទ្ធិមនុស្សក្នុងស្រុក និងក្រៅស្រុករិះគន់យ៉ាងខ្លាំង ព្រមទាំងបានថ្កោលទោសចំពោះការបង្ក្រាបនោះ។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍រិះគន់ក្រោយការបង្ក្រាបនោះថា ក្រុមអ្នកតវ៉ាព្យាយាមទាមទារនូវអ្វីដែលពួកគេចង់បាននោះដោយអហិង្សា ដោយសន្តិវិធី ប៉ុន្តែផ្ទុយទៅវិញ អាជ្ញាធររដ្ឋាភិបាលបានជ្រើសរើសនូវមធ្យោបាយបង្ក្រាបពួកគាត់ដោយហិង្សា ដោយប្រើប្រាស់កម្លាំងច្រើនលើសលប់វាយទៅលើក្រុមបាតុករ។
លោក អំ សំអាត៖ «យើងឃើញថា ការប្រើប្រាស់នូវកម្លាំងកងរាជអាវុធហត្ថរាប់រយនាក់ ដើម្បីបង្ក្រាបទៅលើក្រុមបាតុករដោយពុំមានការចរចា ឬក៏សន្ទនាគ្នាណាមួយ ដោះស្រាយគ្នាជាមុន គឺយើងចាត់វិធានការក្នុងការបង្ក្រាប ហើយដេញវាយដំដូចសត្វធាតុ ដែលទង្វើនេះ យើងសូមថ្កោលទោសដាច់ខាត ចំពោះអំពើឃោរឃៅ អមនុស្សធម៌ដែលបង្ក្រាបទៅលើក្រុមបាតុករនោះ»។
ឆ្លើយតបបញ្ហានេះ មន្ត្រីអ្នកនាំពាក្យកងរាជអាវុធហត្ថលើផ្ទៃប្រទេសលោក ខេង ទីតូ មានប្រសាសន៍ថា សមត្ថកិច្ចអនុវត្តតាមតួនាទីរបស់ខ្លួនក្នុងការរក្សាសណ្ដាប់ធ្នាប់សាធារណៈ៖ «ដោយសារក្រុមបាតុករនោះគាត់បំពាននឹងបម្រាមហាមឃាត់របស់អាជ្ញាធរសាលារាជធានីភ្នំពេញ ហើយគាត់បានបិទផ្លូវ ហើយគាត់បានធ្វើឲ្យមានការកកស្ទះ ធ្វើឲ្យបាត់បង់សណ្ដាប់ធ្នាប់ ហើយគាត់បានបដិសេធនឹងសំណូមពររបស់កងកម្លាំងដែលបានសុំឲ្យគាត់បែកជួរ ប៉ុន្តែគាត់មិនព្រម អ៊ីចឹងកងកម្លាំងសមត្ថកិច្ចគឺត្រូវតែបំបែក»។
កាលពីដើមខែមករា ក្រសួងព័ត៌មាន បានប្រាប់លោក ម៉ម សូណង់ដូ ថា ក្រសួងមិនមានហ្វ្រេកង់ស៍ សម្រាប់ផ្ដល់ជូនវិទ្យុសំបុកឃ្មុំឡើយ។
ការបង្ក្រាបការតវ៉ានេះ មិនមែនជារឿងចៃដន្យឡើយ ពីព្រោះសាលារាជធានីភ្នំពេញ បានច្រានចោលសំណើសុំធ្វើបាតុកម្មរបស់ប្រធានវិទ្យុសំបុកឃ្មុំ ដោយអោយលោក ម៉ម សូណង់ដូ លើកពេលធ្វើបាតុកម្ម និងត្រឡប់ទៅពិភាក្សាជាមួយក្រសួងព័ត៌មាន ម្ដងទៀត។
អភិបាលរងរាជធានីភ្នំពេញ លោក ឃួង ស្រេង បានព្រមានមុនការធ្វើបាតុកម្មនេះ ៣ថ្ងៃថា ប្រសិនបើលោក ម៉ម សូណង់ដូ នៅតែចចេសធ្វើបាតុកម្មនោះ អាជ្ញាធរនឹងចាត់វិធានការតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។