របាយការណ៍អង្គការការពារសិទ្ធិជនជាតិភាគតិចស្ដីពីជនអន្តោប្រវេសន៍រស់នៅលើភូមិបណ្ដែតទឹក នៅលើបឹងទន្លេសាប នាខេត្តកំពង់ឆ្នាំង ផ្សាយកាលពីថ្ងៃទី១៩ មីនា រកឃើញថា ជនអន្តោប្រវេសន៍វៀតណាម កំពុងជួបផលលំបាកទាំងសេដ្ឋកិច្ច និងរងការរំលោភសិទ្ធិមនុស្ស។
របាយការណ៍ដែលមានចំណងជើងថា «មនុស្សតែលតោលនៅលើពិភពលោក (Limbo on Earth)» ដែលបានសិក្សាទៅលើជនអន្តោប្រវេសន៍វៀតណាម ចំនួនប្រមាណ ៥ពាន់នាក់ រស់នៅក្នុងឃុំផ្សារឆ្នាំង នៅខេត្តកំពង់ឆ្នាំង បង្ហាញថា ជនអន្តោប្រវេសន៍ទាំងនោះបានបាត់បង់សិទ្ធិជាពលរដ្ឋ។
របាយការណ៍ដែលមាន ២០ទំព័រ បានសិក្សាទៅលើក្រុមជនអន្តោប្រវេសន៍វៀតណាម សហគមន៍តូចមួយក្នុងចំណោមសហគមន៍ ជនអន្តោប្រវេសន៍វៀតណាម ផ្សេងទៀតនៅក្នុងខេត្តកំពង់ឆ្នាំង។
ប្រធានអង្គការការពារសិទ្ធិជនជាតិភាគតិច លោក អាង ចន្ទរិទ្ធ មានប្រសាសន៍ថា ជនអន្តោប្រវេសន៍វៀតណាម ទាំងនោះ ដែលមួយចំនួនបានកើត និងរស់នៅកម្ពុជា ចាត់ទុកប្រទេសកម្ពុជា ដូចជាប្រទេសដើមកំណើតរបស់ខ្លួន ប៉ុន្តែពួកគេបាត់បង់ទាំងស្រុងនូវសិទ្ធិទទួលបានការអប់រំ សេដ្ឋកិច្ច សង្គម និងនយោបាយ។
លោកបន្តថា អាជ្ញាធរខេត្តបានបដិសេធមិនផ្តល់អត្តសញ្ញាណប័ណ្ណដល់ជនអន្តោប្រវេសន៍វៀតណាម ដែលបង្កជាឧបសគ្គជាច្រើនដល់ការរស់នៅរបស់ពួកគេ។ លោកស្នើឲ្យអាជ្ញាធរនៅតាមមូលដ្ឋានត្រូវផ្ដល់លិខិតកំណើតដល់កូនជនអន្តោប្រវេសន៍វៀតណាម ដែលរស់នៅកម្ពុជា ដើម្បីឲ្យមានលទ្ធភាពទទួលបានឱកាសល្អសម្រាប់ថ្ងៃអនាគត។
លោក អាង ចន្ទរិទ្ធ បន្តថា ក្រៅតែពីបញ្ហាជីវភាព និងការគាបសង្កត់ពីអាជ្ញាធរ ជនអន្តោប្រវេសន៍វៀតណាម ទាំងនោះ ក៏បន្តរងគ្រោះផ្នែកនយោបាយផងដែរ។ របាយការណ៍បន្តថា ជនអន្តោប្រវេសន៍វៀតណាម ប្រមាណ ៩៧ភាគរយ នៅតំបន់នោះ មិនបានចូលរួមបោះឆ្នោតកាលពីឆ្នាំ២០១៣ ឡើយ ដោយសារតែអាជ្ញាធរទាមទារឲ្យពួកគេផ្តល់អត្តសញ្ញាណប័ណ្ណ។
ទាក់ទងនឹងបញ្ហាជនអន្តោប្រវេសន៍វៀតណាម រស់នៅលើផ្ទៃទឹកបឹងទន្លេសាប ប្រធានមន្ទីរបរិស្ថានខេត្តកំពង់ឆ្នាំង លោក ពៅ ប៊ុនថន ថ្លែងថា បានបណ្ដាលឲ្យបរិស្ថាន ជាពិសេសទឹកទន្លេមានការបំពុលធ្ងន់ធ្ងរ។ លោកបន្តថា មន្ត្រីបរិស្ថានបានចុះអប់រំពីអនាម័យ និងហាមឃាត់រាល់សកម្មភាពផលិត ឬការជួសជុលគ្រឿងម៉ាស៊ីន និងបញ្ចូលអាគុយដែលអាចធ្វើឲ្យប៉ះពាល់ទឹកជារៀងរាល់ ១សប្ដាហ៍ម្ដង។
ប្រធានអង្គការការពារសិទ្ធិជនជាតិភាគតិច លោក អាង ចន្ទរិទ្ធ ឱ្យដឹងថា កន្លងមកជនអន្តោប្រវេសន៍វៀតណាម ដែលរស់នៅលើភូមិបណ្ដោយទឹក ក្នុងបឹងទន្លេសាប បានបន្តស្នើសុំឲ្យអាជ្ញាធរខេត្តកំពង់ឆ្នាំង ផ្តល់ដីសម្បទានសេដ្ឋកិច្ចដល់ពួកគេរស់នៅ ដើម្បីជៀសវាងការបំពុលបរិស្ថានបឹងទន្លេសាប។ ប៉ុន្តែអាជ្ញាធរខេត្តនៅមិនទាន់អាចស្វែងរកដីធ្លី ដើម្បីផ្ដល់ដល់ក្រុមសហគមន៍ជនជាតិវៀតណាម ទាំងនោះបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។