ជនជាប់ចោទ ២១នាក់ ក្នុងចំណោមមនុស្ស ២៣នាក់ ដែលជាប់ឃុំក្នុងពន្ធនាគារត្រពាំងផ្លុង ខេត្តកំពង់ចាម ពាក់ព័ន្ធនឹងអំពើហិង្សានៅរោងចក្រយ៉ាកជីន ក្បែរតំបន់សេដ្ឋកិច្ចពិសេសភ្នំពេញ និងផ្លូវវ៉េងស្រេង ក្នុងពេលតវ៉ាដំឡើងប្រាក់ខែកម្មករ ១៦០ដុល្លារ ត្រូវបានមន្ត្រីខាងអគ្គនាយកដ្ឋានពន្ធនាគារនៃក្រសួងមហាផ្ទៃ សហការជាមួយមន្ត្រីពន្ធនាគារនៅទីនោះ ដឹកជញ្ជូនតាមរថយន្តយកមកឃុំនៅពន្ធនាគារព្រៃស ក្នុងរាជធានីភ្នំពេញ កាលពីព្រឹកថ្ងៃទី២៣ មេសា។
អ្នកទាំង ២១នាក់នោះ គឺត្រូវឃុំក្នុងពន្ធនាគារព្រៃសបណ្ដោះអាសន្ន រង់ចាំសាលាដំបូងរាជធានីភ្នំពេញ បើកសវនាការជំនុំជម្រះក្តីនៅថ្ងៃសុក្រ ទី២៥ មេសា ខាងមុខ។
ប្រធានផ្នែកបច្ចេកទេសនៃអង្គការលីកាដូ (Licadho) លោក អំ សំអាត គិតថា នេះជាលើកទី១ហើយដែលមានវត្តមានអ្នកទាំង ២១នាក់នៅភ្នំពេញ និងក្នុងតុលាការ បន្ទាប់ពីកម្លាំងអាជ្ញាធរមានសមត្ថកិច្ចនិងទាហានចាប់ខ្លួនកាលពីដើមខែមករា។
លោក សំអាត៖ «យើងគ្រាន់តែមានសង្ឃឹមទុកជាមុនថា ពេលសវនាការខាងមុខអ្នកទាំង ២១នាក់ ឬក៏ ២៣នាក់នោះត្រូវបានទទួលការលើកលែងការចោទប្រកាន់ ហើយដោះលែងឲ្យមានសេរីភាពជួបជុំគ្រួសារ។ បច្ចុប្បន្នយើងមើលទៅស្ថានភាពអ្នកនយោបាយ ហាក់ដូចជាមានការធូរស្រាល ការចរចាគ្នាហ្នឹង បើយើងនិយាយទៅអ្នកទាំង ២៣នាក់ វាគ្រាន់តែជាកូនអុក ឬជាឧបករណ៍ នយោបាយសម្រាប់អ្នកនយោបាយតែប៉ុណ្ណោះទេ អ៊ីចឹងក្នុងស្ថានភាពបែបនេះ ខ្ញុំជឿថា អ្នកទាំងអស់ហ្នឹងមានសេរីភាពឡើងវិញ»។
សាលាដំបូងរាជធានីភ្នំពេញ នឹងបើកអង្គជំនុំជម្រះ ៣ករណីផ្សេងគ្នាក្នុងថ្ងៃតែមួយលើករណីជនជាប់ចោទ ២៣នាក់ ដែលបានចាប់ខ្លួនកាលពីថ្ងៃទី២ និងទី៣ មករា នៅពេលដែលពួកគេតវ៉ាទាមទារសុំដំឡើងប្រាក់ខែ ១៦០ដុល្លារ។ អង្គការសង្គមស៊ីវិល និងសហជីពកម្មករ បានត្រៀមមេធាវី ១០នាក់ជួយការពារក្តីឲ្យពួកគេទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។